Янгиликлар
24
«Isenim telefon»ına kelgen múrájat: jer uchastkasın ajıratıp beriw haqqında sud qararı shıǵarıldı
«Isenim telefon»ına kelgen múrájat: jer uchastkasın ajıratıp beriw haqqında sud qararı shıǵarıldı
Qaraqalpaqstan Respublikası Ádillik ministrligi tárepinen Nókis qalasında jasawshı puqara I.A.nıń ózine tiyisli Nókis qalasında jaylasqan jer uchastkası mámleket hám jámiyet mútájlikleri ushın alıp qoyılǵan bolsa da, jeke tártipte úy-jay qurıw ushın belgilengen norma sheńberinde jer uchastkası ajıratıp berilmegenliginen narazı bolıp «Isenim telefon» arqalı Ózbekstan Respublikası Ádillik ministrligine jollaǵan múrájatı úyrenip shıǵıldı.
Anıqlanıwınsha, puqara I.A.ǵa tiyisli bolǵan turaq-jay Nókis qalası hákiminiń 2017-jıl 21-apreldegi 01/04-333-sanlı qararına tiykar buzılıwı rejelestirilgen.
Soǵan tiykar, usı turaq-jay 2019-jılda jeke-tártipte úy-jay qurıw ushın belgilengen norma sheńberinde jer ajıratıp berilmesten buzılǵan.
Ózbekstan Respublikası Jer kodeksiniń 41-stat'yasına tiykar, fizikalıq shaxslarǵa beriletuǵın jer uchastkaları mámleket yamasa jámiyet mútájlikleri ushın usı shaxslardıń qálewine kóre, rayon, qala, wálayat hákiminiń qararı menen aldınǵı jer uchastkası menen tap birdey jer uchastkası ajıratılǵannan keyin, sol jer uchastkası alıp berilip atırǵan kárxanalar, mákeme hám shólkemler alıp qoyılıp atırǵan jer uchastkasınıń ornına jańa orında úy-jay, islep shıǵarıw imaratları ham basqa imaratlardı qurıp bergennen keyin hámde usı Kodekstiń 86-stat'yasına muwapıq basqa barlıq zıyanlar tolıq kólemde qaplanıw kerek ekenligi kórsetilgen.
Joqarıdaǵılarǵa hámde 2020-jıl 1-yanvarǵa shekem ámelge bolǵan Ózbekstan Respublikası Ministrler Kabinetiniń 2006-jıl 29-maydaǵı 97-sanlı qararı menen tastıyıqlanǵan Reje talaplarına tiykar ministrlik tárepinen puqara I.A.ǵa jer uchastkası mámleket hám jámiyet mútájlikleri ushın alıp qoyılǵanlıǵı sebepli, jeke-tártipte úy-jay qurıw ushın belgilengen norma sheńberinde jer uchastkası ajıratıp beriw ilajların kóriw haqqında Nókis qalası hákimligine usınıs kirgizildi.
Biraq, Nókis qalası hákimligi tárepinen ministrlik usınısında kórsetilgen talaplar óz waqtında hám tolıq orınlanbadı.
Usıǵan tiykar, ministrlik tárepinen puqara I.A.ǵa er uchastkası mámleket hám jámiyet mútájlikleri ushın alıp qoyılǵanlıǵı sebepli, jeke-tártipte úy-jay qurıw ushın belgilengen norma sheńberinde jer uchastkası ajıratıp beriw májbúriyatın Nókis qalası hákimligine júklew haqqında Nókis rayonlararalıq hákimshilik sudına shaǵım arza kirgizilip, shaǵım arza sud tárepinen tolıq qanaatlandırıldı.
Sonıń menen bir qatarda, ministrlik usınısında kórsetilgen talaplar óz waqtında hám tolıq orınlanbaǵanlıǵı sebepli, Nókis qalası hákim orınbasarına qarata Hákimshilik juwapkershilik haqqındaǵı kodekstiń 1984-stat'yasına tiykar hákimshilik bayanlama rásmiylestirilip Nókis qalası Jınayat isleri boyınsha sudına hákimshilik usınıs kirgizildi. Hákim orınbasarına 1984-stat'yasına tiykar bazalıq esaplaw muǵdarınıń bir esesi muǵdarında járiyma qollaw haqqındaǵı sud qararı shıǵarıldı.
Esengeldi Utepov Berikbaevich,
Qaraqalpaqstan Respublikası
Ádillik ministrligi
Insan huqıqların qorǵaw bólimi
baslıǵı