Янгиликлар
11
Nızamshılıqtaǵı jańalıqlar
Nızamshılıqtaǵı_jańalıqlar
Jetim balalar hám ata-ana qaramaǵınan ayırılǵan balalardı úy-jay menen támiyinlewdiń jańa tártibi ornatıladı
“Jetim balalar hám ata-ana qaramaǵınan ayırılǵan balalardı mámleket tárepinen qollap-quwatlawdıń jańa sistemasın engiziw ilajları haqqında”ǵı Prezident qararı qabıl etildi.
Qararǵa kóre, 2021-jıl 15-avgusttan:
turaq jayǵa iye bolmaǵan hám turaq jayǵa mútájlar sıpatında esapta turǵan jetim balalar hám ata-ana qaramaǵınan ayırılǵan balalarǵa olar 18 jasqa tolǵan jılda kóp kvartiralı úy-jaylardan maydanı 25 kvadrat metrden kem bolmaǵan 1 xanalı, erjetken jetim balalar ortasında neke dúzilgen jaǵdayda, 50 kvadrat metrden kem bolmaǵan 2 xanalı kvartiralar ajıratıladı. Bunda, usı toparǵa kiriwshi mayıplıǵı bolǵan balalarǵa kvartiralar kóp qabatlı úylerdiń úshinshi qabatına shekem ajıratıladı;
kvartiralar hákimlikler tárepinen kóshpes múlktiń birlemshi bazarındaǵı qala hám rayonlarda qurılǵan kóp kvartiralı úy-jaylardan satıp alınadı;
kóshpes múlk birlemshi bazarında kórsetkishlerge (kriteriylerge) sáykes keletuǵın kvartiralar bolmaǵanda, aymaqlıq “Xalqparvar” komissiyaları juwmaǵına tiykar kvartiralar kóshpes múlktiń ekilemshi bazarınan satıp alınadı;
úy-jaylar menen támiyinlew “onlayn-náwbet” sisteması tiykarında ámelge asırıladı, bunda náwbetke ózgeris kirgiziliwine hámde náwbetinen aldın keyingi náwbettegi balalarǵa úy-jay ajıratılıwına jol qoyılmaydı.
Jetim balalar hám ata-ana qaramaǵınan ayırılǵan balalarǵa úy-jaylar múlkke iyelik etiw huqıqı tiykarında, biraq olar 30 jasqa tolǵanǵa shekem úy-jaydı satıw, sawǵa etiw yamasa girewge qoyıw yamasa ijaraǵa beriw hámde úy-jayda ózi hám shańaraq aǵzaları (kúyewi yamasa hayalı, perzentleri)nan tısqarı basqa puqaralardı turaqlı jasaw ornı boyınsha dizimge alıw huqıqısız ajıratıladı.
Bunda, jetim bala yamasa ata-ona qaramaǵınan ayırılǵan balanıń tiykarlandırılǵan múrájatı tiykarında jergilikli hákimlikler tárepinen úy-jaydıń ulıwma maydanın keńeytiriw hám tiyisli talaplardı saqlap qalıw shárti menen satıwǵa ruqsat beriledi.