Янгиликлар
04
Miynet migraciyasına ketip baratırǵan puqaralarǵa kompensaciya tólenedi
Miynet migraciyasına ketip baratırǵan puqaralarǵa kompensaciya tólenedi
“Sırt elge rejelestirilgen miynet migraciyasına ketip baratırǵan puqaralardı xoshametlew boyınsha qosımsha ilajlar haqqında”ǵı Prezident qararı (PQ–5205-san, 30.07.2021-j.) qabıl etildi.
Qararǵa kóre, 2021-jıl 1-sentyabrden baslap 2022-jıl 1-sentyabrge shekem “labor-migration” baǵdarlamalıq kompleksinde dizimnen ótken, kásip-óner yamasa shet tillerge oqıǵan hám shólkemlestirilgen miynet migraciyasına ketip baratırǵan puqaralarǵa:
- shet tiller yamasa kásip boyınsha mamanlıq imtixanların tapsırıw menen baylanıslı qárejetlerdi qaplaw ushın, eger olar tabıslı tapsırılǵanda – BEMnıń 3 esesine shekem muǵdarda (735 mıń sum);
- jol biletin satıp alıw menen baylanıslı qárejetlerdi qaplaw ushın – BEMnıń 2 esesine shekem muǵdarda (490 mıń sum);
- rawajlanǵan mámleketlerde miynet iskerligin ámelge asırıwǵa “jumısshı viza”nı rásmiylestiriw menen baylanıslı qárejetlerdi qaplaw ushın – BEMnıń 5 esesine shekem muǵdarda (1 mln 225 mıń sumǵa shekem) kompensaciya tólenedi.
Bunda:
- miynet migraciyasına ketip baratırǵan puqara “labor-migration” baǵdarlamalıq kompleksi arqalı aralıqtan turıp yamasa tikkeley Sırtqı miynet migraciyası agentligi hám Bántlikke kómeklesiw oraylarına arza menen múrájat etedi;
- arza Sırtqı miynet migraciyası agentligi tárepinen 1 jumıs kúni ishinde kórip shıǵıladı.
2021-jıl 1-sentyabrge shekem:
▪️ “labor-migration” baǵdarlamalıq kompleksinde miynet migraciyasına ketip baratırǵan puqaralarǵa kompensaciyalardı alıw imkaniyatın beriwshi óz aldına bet shólkemlestiriledi.
2021-jıl 1-avgusttan transport kompaniyalarınıń (zárúrlikke qarap, qıstawlı medicinalıq járdemniń kóshpe brigadalarınıń) miynet migraciyasında bolǵan dáwirde jaraqat alǵan, baxıtsız hádiysege dus kelgen, ótkir yamasa awır keselikke shalınǵan puqaralardı, sonıń ishinde olardıń erjetpegen perzentlerin Ózbekstanǵa alıp keliw menen baylanıslı qárejetleri qaplap beriledi.
2021-jılda tiyisli ilajlardı ámelge asırıw ushın Sırt elde miynet iskerligin ámelge asırıwshı puqaralardı qollap-quwatlaw hámde olardıń huqıq hám máplerin qorǵaw qorına 52 milliard sum muǵdarındaǵı qarjı ajıratıladı.