Янгиликлар
23
Nızamshılıqtaǵı_jańalıqlar
Strategiyalıq rawajlanıw agentligi shólkemlestirildi
«Ózbekstan Respublikası Strategiyalıq rawajlanıw agentligin shólkemlestiriw is-ilajları haqqında»ǵı Prezident pármanı (PF-6264-san, 19.07.2021- jıl.) qabıl etildi.
Párman menen tómendegiler shólkemlestirildi:
- Strategiyalıq rawajlanıw agentligi (Agentlik);
- Prezident basshılıǵında Agentlik Keńesi;
- Agentlik janında yuridikalıq shaxs statusına iye bolmaǵan byudjetten tısqarı Strategiyalıq rawajlanıw agentligin qollap-quwatlaw qorı.
Agentliktiń tiykarǵı wazıypalarınan biri tarmaqlar hám aymaqlar kesiminde investiciyalardı tartıw hám joybarlardı ámelge asırıwdıń strategiyalıq máselelerin úyreniw, investiciya iskerliginiń perspektivalı tarmaqları hám baǵdarların anıqlaw esaplanadı.
Agentlik Prezident tárepinen lawazımǵa tayınlanatuǵın hám lawazımnan azat etiletuǵın bas direktor tárepinen basqarıladı.
Agentlik yuridikalıq shaxs huqıqına iye mámleketlik mákemesi esaplanadı.
Agentlik dáramatları salıqqa salıw ob'ekti esaplanbaydı.
Agentlik iskerligi tarawına kiriwshi máseleler boyınsha normativ-huqıqıy hújjetler joybarları májbúriy tártipte Agentlik penen kelisiwi lazım.
Mámleketlik uyımları hám shólkemleri, sonday-aq respublikanıń sırt eldegi diplomatiyalıq wákilxanaları agentliktiń sorawına kóre tiyisli maǵlıwmatlardı, sonıń ishinde birlemshi statistikalıq maǵlıwmatlardı ornatılǵan tártipte usınadı hám maǵlıwmatlar bazalarınan paydalanıwǵa ruqsat beredi.
Agentlik xızmetkerlerine aldın islegen ornında berilgen, sonıń ishinde kóp jıllıq miyneti, áskeriy hám arnawlı dárejeler (mártebe hám mamanlıq dárejeleri, diplomatiyalıq dárejeler hám basqalar) ushın ústemeler hám qosımsha haqlar saqlanıp qaladı, áskeriy hám arnawlı dárejelerge iye bolmaǵan joqarı yuridikalıq maǵlıwmatlı xızmetkerler ushın bolsa ornatılǵan tártipte ádillik uyımları hám mákemeleri xızmetkerleri ushın belgilengen mártebe dárejeleri beriliwi múmkin.
Pármanǵa kóre sonday-aq, investiciyalıq jedellikti asırıw tarawındaǵı eń aktual mashqalalardı tez hám nátiyjeli sheshiw maqsetinde Agentlik janında Strategiyalıq baslamalar akseleratorı (Akselerator) shólkemlestirildi.
Agentlik bas direktorı Akselerator baslıǵı esaplanadı.