Янгиликлар
15
Nızamshılıqtaǵı jańalıqlar
Nızamshılıqtaǵı jańalıqlar
Endigiden bılay Ózbekstanda tuwılǵan puqaralıǵı bolmaǵanlarǵa puqaralıq alıw ushın úzliksiz 5 jıl jasaw talap etilmeydi
“Ózbekstan Respublikasınıń puqaralıǵı haqqında”ǵı Ózbekstan Respublikası Nızamına qosımsha hám ózgerisler kirgiziw haqqında”ǵı Nızam (696-sanlı Nızam, 14.06.2021-j.) Prezident tárepinen imzalandı.
Nızamǵa “identifikaciyalawshı ID-kartası” túsinigi kirgizildi.
Ózgeriske kóre, 2005-jıl 1-yanvar'ǵa shekem Ózbekstanda turaqlı jasaw ornı boyınsha dizimge alınǵan hámde aldın shet mámleket puqaralıǵında bolmaǵan shaxs qálew bildirgen jaǵdayda, Ózbekstan puqarası dep tán alınadı.
Sonday-aq, ata-anasınan biri (jalǵız ákesi yamasa anası) Ózbekstan puqarası dep tán alınǵan, shet mámleket puqaralıǵın qabıl etpegen hám Ózbekstanda jasap kiyatırǵan bala qálew bildirgen jaǵdayda Ózbekstan puqarası dep tán alınadı.
Nızamǵa kóre, endigiden bılay Ózbekstan puqarası dep tán alıw ushın faktlerdi tastıyıqlawshı hújjetler joq bolǵan jaǵdayda, arza beriwshi usı faktlerdi sud tártibinde anıqlawı múmkin.
Bunnan tısqarı, Ózbekstan aymaǵında tuwılǵan hám jasap kiyatırǵan puqaralıǵı bolmaǵan shaxslar Ózbekstan puqaralıǵın alıw maqsetinde iltimasnama menen múrájat etken kúnge shekem 5 jıl dawamında (puqaralıǵı bolmaǵan shaxsqa jasaw guwalıǵın alǵan kúnnen baslap) úzliksiz jasaw shárti biykar etiliwi belgilendi.
Usı Nızam rásmiy járiyalanǵan kúnnen baslap kúshke kiredi.