Янгиликлар
01
xalıq hám isbilermenlerdi qıynap kiyatırǵan ayırım byurokratiyalıq tosıqlar 2021-jıl 1-iyun kúninen baslap qısqartırıladı. Bul qaysı tosıqlar?
Ózbekstan Respublikası Prezidentiniń 2021-jıl 23-marttaǵı “Xalıq hám isbilermenlik sub'ektlerine mámleketlik xızmetlerinen paydalanıwda jánede qolaylı sharayatlar jaratıw, bul baǵdarda byurokratiyalıq tosıqlardı qısqartırıw boyınsha qosımsha ilajlar haqqında”ǵı Pármanı menen bir qatar jeńillikler jaratıldı.
Pármanǵa muwapıq, xalıq hám isbilermenlerdi qıynap kiyatırǵan ayırım byurokratiyalıq tosıqlar 2021-jıl 1-iyun kúninen baslap qısqartırıladı. Bul qaysı tosıqlar?
- Párman menen 1-iyun – yaǵnıy búginnen baslap puqaralardıń dizimnen ótken jerine qaramastan, puqaralıq halatı aktlerin dizimge alıw, nekeleniwshi shaxslardı medicinalıq kórikten ótkeriw hám shet elge shıǵıw biometrik pasportın rásmiylestiriw eksterritorial princip tiykarında ámelge asırıladı.
Yaǵnıy, shaxs jasaw jerine qaramastan, ózine qolaylı bolǵan orındaǵı tiyisli mámleketlik uyımlarına barıp bul ámeliyatlardı ámelge asırıwı múmkin.
Notarial háreketlerdi ámelge asırıwda puqaralıq halatı aktleri jazıwları menen baylanıslı maǵlıwmatnama talap etilmeydi.
Bunday maǵlıwmat notarial keńseler tárepinen ǵárezsiz túrde, “PHAJdıń birden bir elektron arxivi” málimleme sisteması arqalı alınadı.
Isbilermenlik sub'ekti bolǵan yuridikalıq shaxslarǵa mámleketlik xızmetlerden paydalanıw ushın belgilengen jıyım hám mámleketlik bajı tólemlerin tólewde olardıń wákili tárepinen naq pul formasında tólemdi ámelge asırıwǵa ruqsat beriledi.
Shet el kommerciyalıq shólkemleriniń Ózbekstan Respublikası aymaǵındaǵı wákilxana xızmetkerin akkreditaciya etiwde adamnıń immunitet jetispewshiligi virusı keselligi joq ekenligi haqqındaǵı sertifikattı talap etiw ámeliyatı biykar etiledi.
Mámleketlik xızmetler orayları arqalı xızmetlerden paydalanıwda fizikalıq hám yuridikalıq shaxslar tárepinen artıqsha tólengen tólemler, sonday-aq mámleketlik xızmetin tezlestirgen tártipte kórsetiw ushın qosımsha tólengen jıyımlar summası ápiwayılastırılǵan tártipte Mámleketlik xızmetler agentliginiń byudjetten tısqarı qarjıları esabınan bir jumıs kúni ishinde qaytarıladı.
Bunda, qaytarıp berilgen qarjılar Agentlik tárepinen tiyisli mámleketlik uyımlar hám shólkemlerinen regress tártipte óndirip alınadı.
Mámleketlik xızmetin kórsetiw nátiyjesinde beriletuǵın hújjetler QR-kod qoyıw arqalı berilgende olardıń dublikatların beriw tártibi biykar etiledi. Bunda, usı hújjetler elektron formada Birden bir interaktiv mámleketlik xızmetler portalı arqalı sheklenbegen muǵdarda biypul alınadı.
Mámleketlik uyımlar, xojalıq birlespeleri, jergilikli atqarıwshı hákimiyat uyımları, xojalıq birlespeleri, jergilikli atqarıwshı hákimiyat uyımları, mámleketlik shólkemler hám mákemeler tárepinen xalıq, sonıń ishinde isbilermenlik sub'ektlerinen ruwxıy kesellikler boyınsha dispanser esabında turıwı yamasa turmawı, narkologiya boyınsha dispanser esabında turıwı yamasa turmawı, sudlanǵanlıq, mánzil-maǵlıwmat málimlemesi, puqaranıń atında jeke turaq jaydıń bar yamasa joq ekenligi, turaq jaydıń maydanı, salıq qarzınıń bar yamasa joq ekenligi, salıq tólewshi fizikalıq táreplerdiń mámleketlik salıq xızmeti uyımlarında esapqa turǵanı, pensiya hám napaqa muǵdarı, pensiya hám napaqa alıwshılar diziminde bar yamasa joq ekenligi, neke dizimge alınǵanı, nekede joq ekenligi yamasa nekeden ajırasqanlıǵı haqqındaǵı hújjetlerdi soraw biykar etiledi.
Sonday-aq, shaxsın tastıyıqlawshı hújjettiń nusqası, shaxstıń belgilengen formadaǵı fotosúwreti, medicinalıq-sociallıq ekspert komissiyalarınıń maǵlıwmatnamaları, miynet dáptersheleri hám olardıń nusqaları (puqaralarǵa pensiya tayınlaw processinde usı hújjetti "Birden bir milliy miynet sisteması" vedomstvolararalıq baǵdarlamalıq-apparat kompleksi arqalı alıw imkaniyatı joq bolǵan jaǵdaylarda soraw bunnan tısqarı), is haqı hám is stajın, joqarı hám orta arnawlı bilimlendiriw mákemesinde oqıǵanlıǵın tastıyıqlawshı arxiv maǵlıwmatnamaları (puqaralarǵa pensiya tayınlaw processinde usı hújjetti "Birden bir milliy miynet sisteması" vedomstvolararalıq baǵdarlamalıq-apparat kompleksi arqalı alıw imkaniyatı joq bolǵan jaǵdaylarda soraw bunnan tısqarı), kadastr hújjetleri hám olardıń nusqaların talap etiw biykar etiledi.
Házirgi kúnde usı maǵlıwmat hám elektron kórinistegi hújjetlerdi usınıwshı ministrlik hám keńselerdiń elektron bazaları “Elektron húkimet” sisteması vedomstvolararalıq integraciyalasıw platformasına integraciya etildi.
16 jasqa tolǵan shaxslarǵa identifikaciya ID-kartaları beriw olardı mámleketlik salıq xızmeti uyımlarında salıq tólewshi sıpatında esapqa qoyıw hámde puqaralardı jámlenip barılatuǵın pensiya sistemasında esapqa qoyıw menen bir waqıttıń ózinde ámelge asırıladı.
Mámleketlik xızmetler agentligi yuridikalıq shaxslardı (mámleketlik emes kommerciyalıq emes shólkemler, bankler hám kredit byurolarınan tısqarı) mámleketlik dizimnen ótkeriw boyınsha birden bir wákillikli uyım dep belgilendi.
Endigiden bılay mámleketlik uyımlar hám shólkemler, yuridikalıq shaxs birlespeleri, baqshılıq-júzimshilik shirketleri, baspasóz, islep shıǵarıw hám awıl xojalıǵı kooperativleri hámde advokatlıq dúzilmelerin mámleketlik dizimnen ótkeriw mámleketlik xızmetler orayları tárepinen ámelge asırıladı.
Puqaralıq halatı aktlerin jazıw uyımları tárepinen mámleketlik statistika uyımlarına akt jazıwlarınıń nusqaların jiberiw hám esabatlardı tapsırıw ámeliyatı biykar boldı.
Huqıq qorǵaw uyımları, Monopoliyaǵa qarsı gúresiw komiteti hám Mámleketlik aktivlerdi basqarıw agentligi tárepinen isbilermenlik sub'ektleri haqqındaǵı maǵlıwmatlardı Mámleketlik xızmetler agentligi hám mámleketlik xızmetler oraylarınan soraw toqtatıldı.
Endigiden bılay usı shólkemler isbilermenlik sub'ektleri haqqındaǵı maǵlıwmatlardı Isbilermenlik sub'ektlerin mámleketlik dizimnen ótkeriw hám esapqa qoyıwdıń avtomatlastırılǵan sistemasınan ǵárezsiz túrde aladı.
Usı xızmetlerdiń jolǵa qoyılıwı hám elektronlastırılıwı nátiyjesinde jılına 10-12 millionnan artıq puqaranıń áwere bolıwınıń aldı alınadı hámde olardıń 150 milliard sumnan artıq qarjıları únemlenedi.