Янгиликлар
28
“Máhállebay” islew sistemasınan xabardarsız ba?
“Máhállebay” islew sistemasınan xabardarsız ba?
2021-jılda xalıqtıń dáramat tabıwǵa qaratılǵan isbilermenlik umtılıwların finanslıq qollap-quwatlaw, aymaqlarda “máhállebay” islew sistemasın engiziw arqalı xalıqtıń dáramatlı miynet penen bántligin támiyinlew mexanizmlerin jańa basqıshqa alıp shıǵıw, jaslar hám hayal-qızlardıń isbilermenlik baslamaların ámelge asırıwga finanslıq kómeklesiw maqsetinde 2021-jıl 19-mart kúni Ózbekstan Respublikası Ministrler Kabinetiniń 152-sanlı qararı qabıl etildi. Qarar menen “Máhállebay” islew sistemasın shólkemlestiriw hám ámelge asırıw haqqındaǵı waqtınsha reje tastıyıqlandı.
Bul reje máhállelerdiń “ósiw noqatlar”ın anıqlaw, bar bolǵan mashqalalardı sheshiw arqalı xalıqtı kásip-ónerge oqıtıw, bántligin támiyinlew hám isbilermenlikke tartıw, “drayver” joybarların ámelge asırıw boyınsha respublika hám aymaqlıq mámleketlik basqarıw uyımları hám kommerciyalıq banklerdiń ózara jaqın birge islesiwdegi “máhállebay” islew sistemasın shólkemlestiriw hám ámelge asırıw tártibin belgileydi.
Rejede máhállelerdiń “ósiw noqatları” hám “drayverler” joybarların anıqlaw, xalıqtı isbilermenlikke tartıw hám bántligin támiyinlew, máhálledegi mashqalalardı sheshiwdiń tiykarǵı baǵdarları belgilengen.
Hár bir máhállede kommerciyalıq bankleriniń rayon (qala) filiallarınan biriktirilgen 1 xızmetker turaqlı wákil sıpatında iskerlik júrgizedi. Turaqlı wákildiń wazıypaları tómendegilerden ibarat:
-xalıqtıń dáramat dereklerin, sonıń ishinde rásmiy emes dáramatqa iye bolǵan isbilermen shańaraqlardı “xanadanbay” úyreniw;
-bánt bolmaǵan xalıqtıń, atap aytqanda jaslar hám hayal-qızlardıń kásip-óner hám isbilermenlik kónlikpelerin úyreniwge bolǵan mútájligin anıqlap, tiyisli usınıslardı muwapıqlastırıwshı toparǵa usınıp barıw;
- xalıqtıń biznes penen shuǵıllanıw qálewin úyretip olardıń isbilermenlik iskerligin baslawına, sonıń ishinde jaslardıń isbilermenlik baslamaları hám startap ideyaların ámelge asırıwǵa kómeklesiw;
-úyreniwler tiykarında máhállelerdiń pasportların qáliplestiriw hám olardı hár sherekte jańalap barıw;
máhállede paydalanıwǵa tapsırılǵan joybarlar hám shańaraqlıq isbilermenlikti rawajlandırıw basqarmaları sheńberinde máhálle xalqına ajıratılǵan kreditlerdiń nátiyjeliligin úyreniw hám monitoring etiw;
- puqaralar jıyını baslıǵı hám máhálle belsendileri menen turaqlı baylanısta bolıw, máhálleni rawajlanıdırıw hám xalıqtı turaqlı dáramat penen támiyinlew boyınsha basqarıw ofisine usınıslar kirgizip barıw.
Rayon (qala) sektorlar basshıları “máhállebay” sistemasın nátiyjeli shólkemlestiriwge tikkeley juwapker bolıp esaplanadı.
Sonıń menen bir qatarda, rayon (qala) hákiminiń finans-ekonomika hám kámbaǵallıqtı qısqartıw máseleleri boyınsha birinshi orınbasarı basshılıq etetuǵın muwapıqlastırıwshı topar dúziledi.
Bul topar basqarıw ofisleri hám turaqlı wákillerdiń tómendegi baǵdarlarda wákillikli mámleketlik uyımları menen ózara birge islesiwin támiyinleydi:
1) «Temir dápter», «Hayallar dápteri» hám «Jaslar dápteri»ne kirgizilgen puqaralar menen islewde:
- ekonomikalıq rawajlanıw hám kámbaǵallıqtı qısqartırıw bólimleri;
- máhalle hám shańaraqtı qollap-quwatlaw bólimleri, Hayal-qızlar jámiyetshilik keńesleri, máhállelerde shólkemlestirilgen “Hayallar másláhat keńesleri”;
Jaslar isleri agentliginiń aymaqlıq bólimleri;
Xalıqtıń bántligine kómeklesiw orayları menen;
2) Jańa joybarlardı islep shıǵıw hám ámelge asırıwda:
kommerciyalıq bankler;
Sawda-sanaat palatasınıń rayon (qala) isbilermenlikke kómeklesiw orayları;
Ózbekstan Respublikası Bas ministriniń Isbilermenler múrájatların kórip shıǵıw qabıllawxanaları janındaǵı Isbilermenlerdiń jámiyetshilik keńesleri menen;
3) Mashqalalardı anıqlaw hám sheshiwde:
Ózbekstan Respublikası Prezidentiniń rayon (qala)lardaǵı Xalıq qabıllawxanaları;
Ózbekstan Respublikası Bas ministriniń Isbilermenler múrájatların kórip shıǵıw qabıllawxanaları;
Sawda-sanaat palatasınıń rayon (qala) isbilermenlikke kómeklesiw orayları;
Ádillik bólimleri menen;
4) Xalıqtı kásip-óner hám isbilermenlikke oqıtıwda:
xalıq bántligine kómeklesiw orayları;
ekonomikalıq rawajlanıw hám kámbaǵallıqtı qısqartıw bólimleri;
Sawda-sanaat palatasınıń rayon (qala) isbilermenlikke kómeklesiw orayları;
máhállelerdegi oqıw orayları, mámleketlik emes hám kommerciyalıq emems oqıw orayları;
orta hám orta arnawlı professional bilimlendiriw mákemeleri, kásip-óner mektepleri;
kollejlar hám texnikumlar, oqıw orayları menen ózara birge islesedi.