Янгиликлар
02
DINIY SHÓLKEM SHÓLKEMLESTIRIW QANDAY TÁRTIPTE ÁMELGE ASIRILADI?
Diniy shólkemlerdi mámleketlik diziminen ótkeriw tártibi Ózbekstan Respublikası Ministrler Kabinetiniń 2018-jıl 31-maydaǵı 409-sanlı qararı menen tastıyıqlanǵan “Ózbekstan Respublikasında diniy shólkemlerdi mámleketlik diziminen ótkeriw, qayta dizimnen ótkeriw hám saplastırıw tártibi haqqında”ǵı Reje talaplarına muwapıq ámelge asırıladı.
Diniy shólkemler Ózbekstan Respublikası Konstituciyası, Ózbekstan Respublikasınıń “Hújdan erkinligi hám diniy shólkemler haqkında”ǵı Nızamı hámde basqa nızam hújjetlerine tiykar shólkemlestiriledi hám iskerlik kórsetedi.
Ózbekstan Respublikasında shólkemlestiriletuǵın diniy shólkemler Ózbekstan Respublikası Ádillik ministrliginde yaki tiyisli ráwishte Qaraqalpaqstan Respublikası Ádillik ministrligi, wálayatlar hám Tashkent qalası ádillik basqarmalarında (keyingi orınlarda dizimnen ótkeriwshi organ dep ataladı) mámleketlik diziminen ótkerilgennen soń yuridikalıq shaxs statusına iye boladı hám nızam hújjetlerinde názerde tutılǵan tártipte óz iskerligin ámelge asırıwı múmkin.
Diniy shólkmlerdiń oraylıq basqarıw organları hám diniy bilimlendiriw mákemelerin mámleketlik diziminen ótkeriw Ózbekstan Respublikası Ádillik ministrligi tárepinen, basqa diniy shólkemlerdi mámleketlik diziminen ótkeriw tiyisliginshe Qaraqalpaqstan Respublikası Ádillik ministrligi, wálayatlar hám Tashkent qalası ádillik basqarmaları tárepinen ámelge asırıladı.
Diniy shólkemlerdi mámleketlik diziminen ótkeriw ushın – bazalıq esaplaw muǵdarınıń on esesi muǵdarında mámleketlik bajı óndiriledi.
Diniy shólkemdi mámleketlik diziminen ótkeriw ushın dizimnen ótkeriwshi organǵa diniy shólkemdi shólkemlestiriw boyınsha shólkemlestiriw jıynalısı ótkerilgen kúnnen baslap úsh ay ishinde tómendegi hújjetler usınıladı.
Basqa diniy shólkemler ushın:
diniy shólkem dúziw baslamashıları bolǵan on segiz jasqa tolǵan júz adamnan kem bolmaǵan Ózbekstan Respublikası puqaraları imzalaǵan (qol qoyǵan) hám notarial tártipte tastıyıqlanǵan usı Rejeniń 1-qosımshasındaǵı formaǵa muwapıq arza;
eki dana túp nusqada notarial tártipte tastıyıqlanǵan diniy shólkemdi shólkemlestiriw, ustavın tastıyıqlaw hám basshı organların saylaw boyınsha maǵlıwmatlar bar bolǵan shólkemlestiriw jıynalısı protokolı hám diniy shólkem ustavı;
mámleketlik diziminen ótkeriw ushın mámleketlik bajı tólengenligi haqqındaǵı bank tólemi hújjeti;
diniy shólkem baslamashıları haqqındaǵı usı Rejeniń 2-qosımshasındaǵı formaǵa muwapıq maǵlıwmatlar;
diniy shólkemniń basshı organı aǵzaları haqqındaǵı usı Rejeniń 4-qosımshasındaǵı formaǵa muwapıq maǵlıwmat (basshı organları hám olardıń sanı, diniy shólkemniń oraylıq basqarıw organı (bar bolǵanda) hámde Ózbekstan Respublikası Ministrler Kabineti janındaǵı Din isleri boyınsha komitet penen kelisilgen halda belgilenedi);
diniy shólkem basshılarınıń diniy maǵlıwmatı haqqındagı notarial tártipte tastıyıqlanǵan hújjetleri nusqaları
(diniy maǵlıwmat haqqındaǵı hújjet sırt el mámlekette berilgende onıń nostrifikaciya etilgenligi boyınsha hújjet nusqası da usınıladı);
Ózbekstan Respublikası Ministrler Kabineti janındaǵı Din isleri boyınsha komitettiń razılıq xatı;
diniy shólkemniń yuridik (pochta) mánzili haqqında tiyisli jergilikli mámleketlik hákimiyatı organınıń (Ózbekstan Respublikası Qurılıs ministrligi, Mámleketlik sanitariya-epidemiologiya xızmeti, Ózbekstan Respublikası Ayırıqsha jaǵdaylar basqarması Mámleketlik órt qáwipsizligi xızmetiniń tiyisli bólimsheleri hám puqaralardıń ózin-ózi basqrıw organlarınıń razılıq xatı qosımsha etilgen halda) kepillik xatı.
Diniy shólkemlerdiń ustavında tómendegi maǵlıwmatlar bolıwı kerek:
diniy shólkemniń atı, túri, jaylasqan mánzili, qaysı dinge kiretuǵınlıǵı;
maqseti, wazıypaları hám iskerliginiń tiykarǵı túrleri;
qayta shólkemlestiriw hám saplastırıw tártibi;
dúzilisi hám basqarıw (basshı) organlarınıń wákillik sheńberi hám olardı qáliplestiriw tártibi, olardıń wákillik múddetleri;
pul qarejetleri hám basqa mal-múlkti qáliplestiriw derekleri, olardı biylik etiw barısındaǵı basqarıw organlarınıń wákillikleri;
óz ustavına ózgertisler hám qosımshalar kirgiziw tártibi;
usı diniy shólkemge baylanıslı basqa maǵlıwmatlar.
Oraylıq basqarıw organlarına iye bolǵan diniy shólkemlerdiń ustavları usı oraylıq basqarıw organları menen kelisilgen bolıwı kerek.
Dizimnen ótkeriwshi organ tárepinen diniy shólkemlerdi mámleketlik diziminen hám qayta dizimnen ótkeriw haqqındaǵı arza ol berilgen kúnnen baslap bir aylıq múddette kórip shıǵıladı.
Dizimnen ótkeriwshi organlar diniy shólkemlerdi mámleketlik diziminen ótkeriw boyınsha tiyisli organlardıń ekspertiza juwmaqların alıwǵa haqılı. Bunday jaǵdayda qarar dizimnen ótkeriw haqqında arza berilgen kúnnen baslap úsh ay múddette qabıl etiledi.
Diniy shólkemdi mámleketlik diziminen ótkeriw ushın Qaraqalpaqstan Respublikası Ádillik ministrligine nızam hújjetlerine muwapıq diniy shólkemdi shólkemlestiriw boyınsha tiyisli hújjetlerdi qosımsha etken halda múrájat etiw huqıqı nızam talapları tiykarında qorǵaladı.