Янгиликлар
14
DENE TÁRBIYA MUǴÁLLIMINE ÚSTEME PULIN ÓNDIRIW BOYINSHA SUD BUYRIǴI SHIǴARILDI
Qaraqalpaqstan Respublikası Ádillik ministrligi tárepinen Ellikqala rayonı Xalıq bilimlendiriw bólimine qaraslı ulıwma bilim beriw mektebi oqıtıwshısı
A.N nıń xoshametlew pulları tólep berilmegenliginen narazı bolıp ministrlikke jollaǵan múrájatı úyrenip shıǵıldı.
Anıqlanıwınsha, A.N nıń oqıwshıları 2021-jıl fevral' ayında ótkerilgen sport jarıslarında Ózbekstan chempionatında sıylı 1 hám 2-orınlardı iyelegen.
Ózbekstan Respublikası Prezidentiniń 2020-jıl 24-yanvar' kúngi PP-5924-sanlı “Ózbekstan Respublikasında dene-tárbiya hám sporttı jánede jetilistiriw hám ulıwma ǵalabalastırıw is-ilájları haqqında”ǵı Pármanınıń 12-bántine muwapıq, Ózbekstan Respublikası Dene tárbiya hám sport ministrligi, Xalıq bilimlendiriw, Joqarı hám orta arnawlı bilimlendiriw ministrligi, Finans ministrliginiń 2020-jıl 1-fevral' kúninen baslap sport tarawındaǵı jetiskenliklerdi múnásip ráwishte xoshametlewdi názerde tutıwshı tómendegi usınısı maqullanǵan.
Yaǵnıy, jeńimpaz hám sıylıqlanǵanlardı (1 - 3 orın) tayarlaǵan dene-tárbiya páni oqıtıwshıların respublika kalendar' rejesinde názerde tutılǵan qarjılar esabınan iyelegen 1-orın ushın miynetke haqı tólew eń kem muǵdarınıń - 6 esesi, 2-orın ushın - 4 esesi, 3-orın ushın - 3 esesi muǵdarında bir márteleik pul sıylıqları menen xoshametlew haqqındaǵı usınısı maqullanǵan.
Usıǵan tiykar, puqara A.N ǵa oqıwshısı 2-orındı iyelegenligi ushın arnawlı xoshametlew pulları tólep berilgen bolsada, 2-oqıwshısı 1-orındı alǵanlıǵı ushın xoshametlew pulları tólep berilmegen.
Joqarıdaǵılarǵa tiykar, ministrlik tárepinen puqara A.N ǵa Ellikqala rayonı Xalıq bilimlendiriw bólimi tárepinen tólep berilmegen qosımsha xoshametlew pulların óndiriw boynsha sud buyrıǵın shıǵarıw haqqında puqaralıq isleri boyınsha sudına arza kiritildi. Arza sud tárepinen kórip shıǵılıp, tolıǵı menen qanaatlandırıldı. Yaǵnıy, puqara A.N ǵa tólep berilmegen qosımsha xoshametlew pulların óndiriw boyınsha sud buyrıǵı shıǵarıldı.
Qaraqalpaqstan Respublikası
Ádillik ministrligi
Insan huqıqların qorǵaw
bólimi baslıǵı E.UTEPOV