Янгиликлар
14
Ózbekstan Respublikası Prezidentiniń 2019-jıl 7-noyabrdegi Qaraqalpaqstan Respublikasında sharwashılıq tarmaqların jedel rawajlandırıw is-ilajları haqqındaǵı PQ-4512-sanlı qararınıń mazmun-mánisi boyınsha
Qaraqalpaqstan Respublikası Bozataw, Moynaq, Taxtakópir ham Qońırat rayonların sharwashılıqqa qánigelestiriw, usı aymaqlarda zamanagóy sharwashılıq komplekslerin jumısqa túsiriw, jaylaw hám pishenzarlardan nátiyjeli paydalanıw esabına xalıqtıń sharwashılıq ónimleri, ásirese, gósh hám sút ónimlerine bolǵan talabın támiyinlew dárejesin jaqsılaw hámde dáramadın asırıw maqsetinde, Qaraqalpaqstan Respublikasında sharwashılıqtı jedel rawajlandırıw boyınsha komissiya tastıyıqlandı.
Komissiyanıń tiykarǵı wazıypaları etip tómendegiler belgilendi:
Sharwashılıqtı rawajlandırıw barısındaǵı isbilermenlik baslamaların hár tárepleme qollap-quwatlaw, sharwashılıq salasına xalıqtı keń qatnastırıw, olardıń sharwashılıq penen shuǵıllanıw ushın qolay shárt-shárayatlar jaratıw;
sharwashılıq iskerligi menen shuǵıllanıw qálewin bildirgen joybar baslamashıların, sonıń ishinde potencial investorlardı anıqlaw hám olardıń jumısın shólkemlestiriw jaǵınan támiyinlew;
qosılǵan qun shınjırın jaratıw maqsetinde sharwashılıq ónimleri islep shıǵarıwshıları hám qayta islewshileri arasında kooperaciyanı jolǵa qoyıwǵa, sharwashılıq salasında ilimiy jandasıwlar hám aldıńǵı zamanagóy texnologiyalardıń keń engiziliwine kómeklesiw;
násilli sharwa malları hám texnologiyalardı jetkizip beriwshiler haqqında maǵlıwmatlar toplaw, joybar baslamashılarınıń olar menen óz-ara nátiyjeli baylanısların jolǵa qoyıwlarında kómeklesiw;
joybar baslamashılarınıń kredit resursları hám jerga bolǵan talapların anıqlaw hámde olarǵa zárúr kredit qarjısı hám jer maydanı ajıratılıwında ámeliy járdem kórsetiw;
sharwashılıq salasın jedel rawajlandırıw boyınsha mámleketlik uyımları hámde jámiyetlik shólkemleri menen óz-ara birge islesiw jumısların shólkemlestiriw bolıp esaplanadı.
Sonıń menen qatarda, usı Qarar menen tómendegiler belgilendi:
Qaraqalpaqstan Respublikasınıń Bozataw, Moynaq, Taxtakópir hám Qońırat rayonlarında iri hám mayda shaqlı násilli sharwa malların sanaat usılında, sonday-aq, jaylaw hám pishenzarlarda baǵıw, sharwa malları ushın azıqlıq islep shıǵarıw, sharwashılıq ónimlerin qayta islewge tiyisli joybarlardı ámelge asırıw ushın joybar baslamashılarına:
sharwa malların sanaat usılında baǵıw ushın suwǵarılatuǵın jerler hámde olardı aydap baǵıw ushın pishenzar hám jaylawlar, sonday-aq, sharwashılıq kompleksleri, sharwashılıq ónimlerin qayta islew, ot-jem islep shıǵarıw maqsetinde bina hám soorujenieler qurıw ushın, awıl xojalıǵında paydalanılmaytuǵın jer uchastkası bolmaǵan táǵdirde, ónimdarlıǵı pás suwǵarılatuǵın jer uchastkaları, qaǵıyda retinde, tańlaw hám aukcion ótkizbesten Komissiyanıń usınısına tiykar ajıratıp beriledi;
ajıratılatuǵın jer uchastkaları kólemi olardıń ónimdarlıq dárejesine hám shólkemlestiriletuǵın sharwa bas sanına qarap Komissiya usınısına tiykar belgilenedi;
Qaǵıyda retinde, Ózbekstan Respublikası Prezidentiniń 2019-jıl 13-avgusttaǵı “Jeke múlkti qorǵaw hám múlk iyeleri huqıqlarınıń kepilliklerin kúsheyttiriw, isbilermenlik baslamaların qollap-quwatlaw boyınsha islerdi shólkemlestiriw sistemasın túp-tiykarınan jetilistiriw barısındaǵı is-ilajlar, sonday-aq, isbilermenlik sub'ektleriniń finanslıq resurslar hám islep shıǵarıw infradúzilmesinen paydalanıw imkaniyatların keńeyttiriw haqqında”ǵı PF-5780-sanlı Pármanına muwapıq Isbilermenlik iskerligin qollap-quwatlaw mámleketlik qorı tárepinen bir waqıttıń ózinde kompensaciya menen birgelikte kepillikte beriledi;
Paydalanıwǵa kirgizetuǵın jerlerge tek azıqlıq eginleri jaylastırıladı;
Rayonlar hákimleri tazadan paydalanıwǵa kirgizetuǵın jer maydanlarınıń
tek azıqlıq eginlerin egiw ushın ajıratıp beriliwine, azıqlıq ushın eginlerdiń
tolıq egiliwine hám olardıń agrotexnikasına, sonıń menen birge, jetilistiriletuǵın ónimniń sharwashılıq xojalıqları hám xalıqqa sistemalı jetkizip beriliwine shaxsan juwapker esaplanadı;
Jaylawlar sharwashılıǵında násilshilik jumısların shólkemlestiriw násildarlıǵın tastıyıqlaytuǵın hújjetleri bolǵan, identifikaciya etilgen hám zatı boyınsha rayonlastırılǵan násilli buǵalardıń muzlatılǵan urıqlarınan jasalma urıqlantırıw arqalı ámelge asırıladı.
Qarar menen Samarqand veterinariya medicinası institutınıń Nókis filialı janında Veterinariya texnikumı shólkemlestirilmekte.
Ózbekstan Respublikası Veterinariya hám sharwashılıqtı rawajlandırıw mámleketlik komiteti Joqarǵı hám orta arnawlı bilimlendiriw ministirligi
menen birgelikte Samarqand veterinariya medicinasi institutı Nókis filialı bakalavriatınıń 2020/21-2022/23 oqıw jıllarına kúndizgi tálim forması ushın mámleket buyırtpası tiykarında oqıwǵa qabıllaw parametrlerine usınıslardı qáliplestiriwde Bozataw, Moynaq, Taxtakópir hám Qońırat rayonlarında keminde 5 jıl islep beriw shárti menen tiyisli tálim baǵdarları maydanınan Bozataw, Moynaq, Taxtakópir
hám Qońırat rayonları boyınsha mámleket grantı tiykarında bólek maqsetli qabıllaw kórsetkishlerin názerde tutıw belgilendi.
Qaraqalpaqstan Respublikası Ádillik ministrligi