Янгиликлар
02
Балаларға тәлим ҳәм тәрбия бериў менен шуғылланыўшы педагог ҳәм басқа хызметкерлердиң медициналық көриклерден өтиўи дәўиринде шығындар болғанлығы жағдайы бойынша мониторинг өткерилди
Өзбекстан Республикасы Олий Мажлисиниң Инсан ҳуқықлары бойынша ўәкилиниң Қарақалпақстан Республикасы бойынша аймақлық ўәкили ҳәм Қарақалпақстан Республикасы Әдиллик министрлигиниң
2021-жыл I ярым жыллыққа (I ҳәм II шереклик) мөлшерленген ис-режесине тийкар, улыўма билим бериў мектеплери ҳәм мектепке шекемги билим бериў шөлкемлериниң тиккелей балаларға тәлим ҳәм тәрбия бериў менен шуғылланыўшы педагог ҳәм басқа хызметкерлердиң медициналық көриклерден өтиўи дәўиринде шығындар болғанлығы жағдайы мониторинг қылынды.
Ɵткерилген мониторинг даўамында, 2020-жыл даўамында улыўма билим бериў мектеплериниң ҳәм мектепке шекемги билим бериў шөлкемлериниң жәми 60,521 хызметкерлери медициналық көриктен өтиў дәўиринде шығындар болғанлығы анықланды.
Яғный, улыўма билим бериў мектеплериниң 44074 хызметкерлери (Нөкис қаласы 8786, Нөкис районы 1817, Кегейли районы 1963, Бозатаў районы 309, Шымбай 3194, Қараөзек районы 1335, Тахтакөпир районы 1198, Хожели районы 2316, Тақыятас районы 1839, Шоманай районы 304, Қанлыкөл районы 1190, Қоңырат районы 2373, Мойнақ районы 955, Әмиўдарья районы 5208, Беруний районы 4335, Төрткүл районы 4018) мектепке шекемги билим бериў шөлкемлериниң 16447 хызметкерлери (Нөкис қаласы 5545, Нөкис районы 372, Кегейли районы 371, Бозатаў районы 70, Шымбай 909, Қараөзек районы 425, Тахтакөпир районы 651, Хожели районы 906, Тақыятас районы 721, Шоманай районы 349, Қанлыкөл районы 424, Қоңырат районы 879, Мойнақ районы 431, Әмиўдарья районы 1593, Беруний районы 913, Төрткүл районы 1053) медициналық көриктен өтиў дәўиринде шығындар болған.
Бул өз нәўбетинде, тийисли мәкеме ҳәм шөлкемлер тәрепинен төмендеги нызам ҳүжжетлери талапларына толық әмел етилиегенлигинен яки лазым дәрежеде усы нызам ҳүжжетлери талапларын орынламағанлығынан дерек береди.
Яғный, Өзбекстан Республикасы Мийнет кодексиниң 214-статьясында ҳәмде Мийнетти қорғаў ҳаққындағы Нызамның 24-статьясында жумыс бериўши мийнет шәртнамасын дүзиў ўақтында дәслепки тәризде ҳәм кейинала (жумыс даўамында) ўақты-ўақты менен хызметкерлерди медициналық көриктен өткериўди шөлкемлестириў шәртлиги ҳәмде медициналық көриклерден өтиўи мүнәсибети менен хызметкерлер шығындар болмаўы көрсетилген.
Сондай-ақ, Өзбекстан Республикасының “Билимлендириў ҳаққында”ғы Нызамының 45-статьясында педагог хызметкерлер мәмлекетлик ден саўлықты саўлаў мәкемелеринде бийпул медициналық көриктен өтиў ҳуқықына ийе екенлиги ҳәмде “Мектепке шекемги билимлендириў ҳәм тәрбия ҳаққында”ғы Нызамның 11-статьясында Өзбекстан Республикасы Ден саўлықты сақлаў министрлигиниң мектепке шекемги билимлендириў ҳәм тәрбия тараўындағы ўәкилликлери көрсетилген болып, оған көре Өзбекстан Республикасы Ден саўлықты сақлаў министрлиги мектепке шекемги билимлендириў шөлкемлери хызметкерлериниң медициналық тексериўден өткерилиўин шөлкемлестиреди.
Буннан тысқары, Өзбекстан Республикасы Министрлер Кабинетиниң 2019-жыл 13-май күнги 391-сан қарары менен тастыйықланған “Улыўма типтеги мәмлекетлик ҳәм мәмлекетлик емес мектепке шекемги билимлендириў шөлкемлери ҳаққында”ғы Режениң 50-бәнтинде мәмлекетлик мектепке шекемги билимлендириў шөлкеминиң штаттағы хызметкерлери ден саўлықты сақлаў мәкемелеринде белгиленген тәртипте бийпул медициналық тексериўден өтетуғынлығы белгиленген.
Соның менен бир қатарда, Өзбекстан Республикасы Әдиллик министрлигинен 2012-жыл 29-августта 2387-сан менен дизимнен өткерилген “Хызметкерлерди медициналық көриктен өткериў тәртиби ҳаққында”ғы Режениң 8-бәнтинде жумыс бериўши аймақлық мәмлекетлик санитария-эпидемиологиялық қадағалаў орайлары ҳәм шөлкемниң кәсиплик аўқам комитети менен биргеликте ҳәр календарь жылдың 1-декабрь күнине шекем шөлкемдеги медициналық көриктен өткерилиўи шәрт болған хызметкерлердиң лаўазым бойынша контингентин анықлаўы ҳәм бул ҳаққында усы Режениң 4-қосымшасына муўапық формада акт дүзиўи лазым деп көрсетилген.
Режениң 9-бәнтинде жумыс бериўши медициналық көриктен өткерилиўи шәрт болған хызметкерлердиң лаўазым контингентинен келип шығып аймақлық мәмлекетлик санитария-эпидемиологиялық қадағалаў орайлары ҳәм шөлкеминиң кәсиплик аўқамы комитети менен келисилген ҳалда медициналық көриктен өткерилиўи шәрт болған хызметкерлердиң дизимин дүзеди ҳәм медициналық көрикти өткериўши емлеў-профилактика мәкемесине усынады деп көрсетилген.
Режениң 13-бәнтине муўапық, медициналық көриклерди өткериў ушын медициналық көрикти өткериўши емлеў-профилактика мәкемеси басшысының буйрығы менен медициналық комиссия шөлкемлестириледи.
Медициналық комиссия қурамы шыпакер-терапевт, невропатолог, офтальмолог, дерматовенеролог, отоларинголог, психиатр, акушер-гинеколог ва хирург ҳәмде басқа қәнигелерден ибарат болып, олардың медициналық комиссия қурамына киритилиўи шыпакер-терапевт тәрепинен усы Режениң 1, 2 ҳәм 3-қосымшаларында белгиленген талапларынан келип шығып шешиледи.
Медициналық көриклерди өткериў бойынша дүзилген медициналық комиссияның баслығы профпатология яки кәсип кеселликлери бойынша кәсиплик таярлықтан өткен шыпакер болыўы лазым. Режениң 29-бәнтине тийкар, медициналық көриктиң сапалы өткерилиўине медициналық көриктен өткериўши емлеў-профилактика мәкемесиниң баслығы жуўапкер есапланады.
Жоқарыдағыларға тийкар, тийисли мәкеме ҳәм шөлкемлерге әмелдеги нызам талапларына қатаң әмел етиў ҳәм алдағы ўақытларда медициналық көриктен өтиўи шәрт болған лаўазымларда ислеўши хызметкерлерди шығындар қылмаған ҳалда медициналық көриктен өткериў ҳәмде медициналық көриктен өткериўди шөлкемлестириў бойынша тийисли көрсетпе ҳәм усыныслар берилди.
Қарақалпақстан Республикасы
Әдиллик министрлиги
Инсан ҳуқықларын қорғаў
бөлими баслығы Е.Утепов