Савол: Мен 1986 йил туғилганман, туғилганлик ҳақидаги гувоҳномамни йўқотиб қўйдим, менинг ўрнимга аёлим ФҲДЁ бўлимидан туғилганлик ҳақида такрорий гувоҳномани олса бўладими?
А.Аскаров, Нукус шаҳри
Жавоб: Туғилганлик ҳақидаги далолатнома ёзувидан нусхалар ва такрорий гувоҳнома фуқаронинг ўзига, вояга етмаган шахсларнинг қонуний вакилларига ёки нотариал тартибда тастиқланган ишончнома орқали бошқа шахсларга уларнинг аризаси асосида берилади.
Чет элда яшовчи фуқаро томонидан берилган ҳамда чет тилида тузилган ишончнома белгиланган тартибда легелизация қилинган ёки апостиль қўйилган бўлиши лозим.
Савол: Мен Андижон вилоятида туғилган неварамни фарзандликка олиб, туғилган жой Нукус шаҳри деб ўзгартирсам бўладими?
Е.Пирназарова, Нукус шаҳри
Жавоб: Ўн ёшдан ошмаган боланинг туғилган жойи суднинг ҳал қилув қарори асосида Ўзбекистон Республикаси ҳудуди доирасида ўзгартилиши мумкин ва бу ҳолатда фарзандликка олувчининг яшаш жойдаги ФҲДЁ органида тикланган далолатнома ёзуви қайд этилади ва етти кун ичида дастлабки далолатнома ёзуви қайд этилган ФҲДЁ органига уни бекор қилиш ҳакида хабарнома юборилади.
Савол: 2014 йили май ойида эрим билан суднинг ҳал қилув қарорига асосан никоҳимиз бекор қилинди. 2014 йил 30 сентябрда туғилган фарзандимни ўзимнинг номимга олишим мумкинми?
Б.Шамуратова, Хўжайли тумани
Жавоб: Ота-она никоҳда бўлган боланинг туғилиши тўғрисидаги далолатномани ёзиш шахсни тасдиқловчи ҳужжатлар асосида амалга оширилади.
Бола туғилганга қадар унинг отаси вафот этган вақтдан, ота-онаси никоҳи бекор қилингандан кейин 300 кундан кўп вақт ўтмаган бўлса, отаси тўғрисидаги маълумотлар белгиланган тартибда ёзилади.
Савол: Менинг эрим кўп йиллардан буён бедарак йўқолган, у билан бўлган никоҳимни бекор қилишим мумкинми?
Н.Джуманиязова, Тўрткўл тумани
Жавоб: Суднинг эр-хотиндан бирининг бедарак йўқолган деб топилганлиги тўғрисидаги қарори асосида никоҳдан ажратиш эр ёки хотиннинг бирининг турар жойидаги ФҲДЁ органи томонидан амалга оширилади.
Саволларга Нукус шаҳри ФҲДЁ бўлими мудираси в.б. Г.Досшанова жавоб берди.