Янгиликлар
06
Ekologiyalıq mádeniyattı arttırıw
Sońǵı jıllarda elimizde ekologiyalıq jaǵdaydı qadaǵalaw, xalıqtıń salamatlıǵın jaqsılaw, tábiyǵıy resurslardı únemlew hám olardan aqılǵa muwapıq paydalanıw, ekologiyalıq turaqlılıqtı támiyinlew menen bir qatarda mámleketlik ekologiyalıq qadaǵalaw sistemasın jetilistiriw hám bul tarawdaǵı huqıqbuzarlıqlardıń aldın alıw ilajların kúsheytiw zárúrligi júzege kelmekte.
Usı jıl 4-mayda «Ekologiya, qorshaǵan ortalıqtı qorǵaw hám tábiyattan paydalanıw tarawındaǵı huqıqbuzarlıqlardı islegenlik ushın juwapkershilik kúsheyttiriliwi múnásibeti menen Ózbekstan Respublikasınıń ayırım nızam hújjetlerine qosımsha hám ózgerisler kirgiziw haqqında»ǵı Ózbekstan Respublikasınıń Nızamı qabıl etilgen edi. Mámleketimizde qorshaǵan ortalıqtı qorǵaw, xalıqtıń salamatlıǵın támiyinlew hám tábiyǵıy resurslardan aqılǵa uǵras paydalanıw máselelerine ayrıqsha itibar qaratılǵan bul nızamnıń qabıl etiliwi ekologiyalıq huqıqbuzarlıqlar ushın juwapkershilikti kúsheytiwde áhmiyyetli qádem boldı dep ayta alamız.
Sonı ayrıqsha atap ótiw de rek, bul hújjet penen ekologiya tarawındaǵı nızam talapların buzǵanı ushın juwapkershiliktiń jańa, tásirsheń mexanizmi engizildi. Nızam menen belgilengen eń tiykarǵı jańalıq – yuridikalıq shaxslarǵa finanslıq sankciyalar qollanıw tártibiniń belgilep qoyılǵanı boldı.
Nızamda belgilengenindey, ózlerine tiyisli bolǵan yamasa olarǵa biriktirilgen aymaqtaǵı tereklerdi qorǵaw hám saqlawǵa baylanıslı nızamshılıqta belgilengen ilajlardı kórmegeni ushın yuridikalıq táreplerge qorshaǵan ortalıqqa jetkerilgen zıyannıń 5 esesi muǵdarında járiyma túrindegi finanslıq sankciyalar qollanıladı.
Ulıwmalastırıp aytqanda, bul nızam tek ǵana ekologiyalıq huqıqbuzarlıqlardıń aldın alıwǵa emes, al, jámiyyette ekologiyalıq mádeniyattı arttırıwǵa da xızmet etip, hár bir xojalıq júrgiziwshi subyektti tábiyatqa juwapkershilikli qatnasta bolıwǵa shaqıradı.
Nókis qalası ádillik bólimi
YXKO bas yuriskonsultı G.Dauletova