Янгиликлар
23
Mámleketlik xızmetler oraylarınıń jumısında jańa qolaylıqlar engizilmekte
Keyingi jılları Ózbekstanda mámleketlik xızmetler kórsetiw sistemasın modernizaciyalaw, puqaralar hám isbilermenler ushın qolaylı jáne ashıq-aydın xızmetler jaratıw maqsetinde keń kólemli reformalar ámelge asırılmaqta. Mámleketlik xızmetler orayları bul processtiń áhmietli buwını bolıp, xalıq ushın mámleketlik xızmetlerdi "bir ayna" principi tiykarında kórsetiwde áhmietli rol atqarıp kelmekte.
Mámleketlik xızmetler sanı basqıshpa-basqısh arttırılmaqta - Mámleketimizde mámleketlik xızmetler sistemasın bunnan bılay da rawajlandırıw maqsetinde qabıl etilgen hújjetlerge muwapıq, Mámleketlik xızmetler Orayları hám Birden-bir interaktiv mámleketlik xızmetler portalı arqalı kórsetiletuǵın xızmetler sanın sezilerli dárejede arttırıw rejelestirilgen.
Bul ilajlar mámleketlik xızmetlerdi ápiwayılastırıw, byurokratiyalıq tosqınlıqlardı azaytıw hám xalıqqa qolaylı xızmetler kórsetiw sistemasın bunnan bılay da jetilistiriwge xızmet etedi.
Sanlastırıw - qolaylıqlar gilti - Sońǵı jılları mámleketlik xızmetler kórsetiwde sanlı texnologiyalar keńnen engizilmekte. Kóplegen xızmetlerden onlayn paydalanıw imkaniyatınıń jaratılǵanı puqaralar ushın waqıt hám qarjını únemlewge xızmet etpekte. Elektron náwbet sisteması, QR-kod arqalı tólew hám onlayn arza tapsırıw sıyaqlı imkaniyatlar xızmet kórsetiw procesin jáne de tez hám ashıq-aydın etiwge járdem bermekte.
Sonday-aq, "Elektron húkimet" sisteması arqalı túrli uyımlar arasında maǵlıwmatlar almasıwı jolǵa qoyılǵanı sebepli puqaralardan artıqsha hújjetler talap etiw jaǵdayları da keskin azaymaqta.
Mámleketlik xızmetlerdi kórsetiwde xalıqqa qosımsha qolaylıq jaratıw maqsetinde 120 túrdegi maǵlıwmatnama hám hújjetlerdi puqaralardan talap etiw biykar etilgen. Endi bul maǵlıwmatlar mámleketlik organlar tárepinen vedomstvolar aralıq elektron sistemalar arqalı alınadı.
Bul bolsa puqaralardıń túrli uyımlarǵa qatnap, artıqsha waqıt jumsalıwınıń aldın alıw menen birge xızmetlerdiń tez hám nátiyjeli kórsetiliwin támiyinlemekte.
Mámleketlik xızmetler oraylarında xızmet kórsetiwdiń sapasın arttırıw maqsetinde elektron náwbet sisteması, zamanagóy xızmet kórsetiw zalları, másláhát beriw xızmetleri hám onlayn platformalar engizilgen. Bunıń nátiyjesinde puqaralar kóplegen mámleketlik xızmetlerden qısqa waqıt ishinde paydalanıw imkaniyatına ie bolmaqta.
Bunnan tısqarı, xalıqtıń ayırım kategoriyaları - pensionerler, hámiledar hayallar hám kishi jastaǵı balası bar puqaralar ushın xızmet kórsetiwde qosımsha qolaylıqlar jaratılǵan.
Búgingi kúnde Mámleketlik xızmetler orayları puqaralar hám isbilermenlik subektlerine tez, ashıq-aydın hám qolaylı xızmet kórsetetuǵın zamanagóy sistemaǵa aylanbaqta. Sanlastırıw, byurokratiyalıq tosqınlıqlardı qısqartıw hám xızmetler sanın kóbeytiw arqalı mámleketlik xızmetlerdiń sapası barǵan sayın jaqsılanıp barmaqta.
Shımbay rayonı ádillik bólimi
MXO bas qánigesi R.Toreniyazov