Янгиликлар
17
Pedagoglar ushın turaq jay subsidiyasın alıw tártibi hám imkaniyatları
Mámleketimiz tárepinen bilimlendiriw tarawı pidayıların qollap-quwatlaw, olardıń jasaw sharayatın jaqsılaw hám múnásip turaq jay menen táminlew maqsetinde birqatar jeńillikler jaratılmaqta.
Sonday áhmiyetli imkaniyatlardıń biri — pedagoglar ushın turaq jay satıp alıwda beriletuǵın mámleketlik subsidiyalardır.
1.Subsidiya ózi ne hám ol kimlerge beriledi?
Turaq jay subsidiyası — bul úy-jay sharayatın jaqsılawǵa mútaj bolǵan puqaralarǵa, sonday-aq bilimlendiriw tarawında nátiyjeli miynet etip atırǵan qániygelerge turaq jay satıp alıwda baslanǵısh bádeldiń (pervonachalniy vznos) bir bólimin yaki kredit procentleriniń bir bólimin qaplaw ushın mámleket tárepinen qaytarıp alınbaytuǵın pul qarjısı túrindegi qollap-quwatlaw bolıp tabıladı.
Pedagoglar arasında tómendegi kategoriyalar subsidiya alıwda joqarı baha (ball) toplaw imkaniyatına iye:
Úy-jay sharayatın jaqsılawǵa mútaj dep tabılǵanlar;
Óz tarawında joqarı nátiyjelerge erisken, kóp jıllıq miynet stajına iye bolǵan qániygeler.
2. Arza tapsırıw ushın qanday hújjetler kerek?
Arza tapsırıw procesi tolıq cifrlastırılǵan bolıp, artıqsha qaǵazbázlıqtı talap etpeydi. Tómendegi maǵlıwmatlar kerek boladı:ID-karta yaki pasport maǵlıwmatları;
Neke gúwalıǵı hám shańaraq aǵzaları haqqında maǵlıwmat (eger bar bolsa);
Bántlik hám dáramatlar haqqında maǵlıwmat (sistema ózi avtomatikalıq tárizde anıqlaydı);
Turaq jaydı ijaraǵa alıp jasawı yaki mútajlikti tastıyıqlawshı basqa da maǵlıwmatlar.
3. Arza tapsırıw jolları Pedagoglar subsidiya alıw ushın úyden shıqpastan-aq, tómendegi usıllardıń biri arqalı múrájat etiwi múmkin:
YIDXP (my.gov.uz) portalı arqali: Sayttan dizimnen ótip, "Turaq jay subsidiyasın alıw" xizmetin tańlaw hám onlayn arza toldırıw.
Mámleketlik xizmetler orayı (MXO) arqalı:
Ózińizge jaqın bolǵan orayǵa barıp, operator járdeminde arza tapsırıw.
Esletpe: Arzalar arnawlı komissiya tárepinen belgilengen kriteriyalar (ball sisteması) tiykarında kórip shıǵıladı. Shańaraqtıń dáramatı, quramında mayıplıǵı bolǵan shaxslardıń bar-joqlıǵı hám házirgi jasaw sharayatı ball toplawda tiykarǵı rol oynaydı.
4. Subsidiya muǵdarı hám onnan paydalanıw
Subsidiya ajıratılıwı haqqında unamlı juwmaq (xabarnama) alǵanıńızdan soń, siz úy-jay satıp alıw ushın bankke múrájat etesiz:
Mámleket siz satıp almaqshı bolǵan turaq jaydıń baslanǵısh bádeliniń belgili bir bólimin tólap beredi.
Sonday-aq, ipoteka kreditiniń procent tólemleriniń bir bólimin de mámleket óz moynına aladı.
Sıpatlı máslahat: Subsidya xabarnaması belgilengen qatań múddetke (ádepte 4 ay) iye boladı. Bul waqıt ishinde siz úy-jaydı anıqlap, kredit hújjetlerin rásmiylestiriwińiz shárt.
Ustazlar — keleshek áwlad tıkarshıları. Olardıń turaq jay sharayatın jaqsılaw — mámleketimizdiń baslı maqsetleriniń biri.
Moynaq rayonı ádillik bólimi
MXO bas qanigesi G.Abdixanova