Янгиликлар
16
Qurılıs tarawında jańa reformalar
2026-jıl 14-aprel kúni Prezident Shavkat Mirziyoevtiń basshılıǵında videoselektor májilisi bólıp ótti hám onda respublika hám wálayat studiyalarınan 500 den aslam developer, qurılısshı, joybarlawshı, arxitektor hám urbanistler qatnastı.
Mámleketimiz basshısı barlıq tarmaq hám aymaqlarda joqarı ekonomikalıq ósiw boyınsha belgilep alınǵan úlken sheklerge erisiwde qurılıs tarawınıń ayrıqsha ornı bar ekenin atap ótti.
Sońǵı toǵız jılda 10 mıńǵa shamalas jańa qurılıs kárxanaları jumıs basladı, aylanısı 1 trillion sumnan asqan 20, 100 milliard sumnan ótken 365 iri kompaniya payda boldı. Joybarlaw shólkemleri 2 mıńnan, olardan xalıqaralıq sertifikat alǵanları 650 den astı.
Usı jumıslardıń nátiyjesinde ótken dáwirde 210 million kvadrat metrlik imarat-obekt, 647 mıń kvartiralı 15 mıńnan aslam kóp qabatlı turaq jaylar qurıldı. Qurılıs jumıslarınıń kólemi 2016-jılı 30 trillion sumdı quraǵan bolsa, ótken jılı bul kórsetkish 314 trillion sumǵa jetti.
«Bir nárseni jaqsı túsiniw zárúr: eger urbanizaciya dárejesi 1 procentke arca, ekonomika da keminde 1 procentke kóbeedi, investiciya aǵımı, biznes hám startaplar, miynet ónimdarlıǵı eselep ósedi. Bunıń ushın respublikada urbanizaciyanı turaqlı rawajlandırıw boyınsha birden-bir kózqaras bolıwı kerek»- dedi Prezidentimiz. Soģan bola, wálayat hákimleri hám Urbanizaciya komitetine usı jılı byudjet qarjısı esabınan 6 qala, 44 posyolka boyınsha bas rejeni, jáne 104 awıl boyınsha master rejeni aqırına jetkeriw, oǵan qosımsha intaker biznes wákilleri menen jáne 50 elatlı punkt boyınsha qala qurılısı hújjetin islep shıǵıwdı baslaw tapsırıldı.
Sonday-aq, bas rejesi joq degen sıltaw menen 2025-jılı jerdi menshiklestiriw boyınsha 112 mıń arzanıń 14 procenti biykar etilgen bolsa, hákimlerge bunıń aqıbetinde 4 mıń gektar jerdi aktivke aylandırıw, menshiklestiriw esabınan byudjetke 550 milliard sum qosımsha túsim joǵaltılǵanı kórsetip ótildi. Úsh ayda jerlerdi menshiklestiriw boyınsha arzalarǵa insan faktorısız 5-10 minutta onlayn juwap beretuǵın sistemaǵa ótiw tapsırıldı.
Xalıq hám isbilermenler qurılıs islew ushın aldın joybarlastırıwǵa ruqsat alıwǵa, keyin arxitekturalıq rejelestiriw tapsırmasın islep shıǵıwǵa óz aldına arza berip, aylap waqıt jumsamaqta.
Tashkent qalasında 2 xızmetti bir basqıshta kórip shıǵıw jolǵa qoyılǵanı sebepli hújjetlerdi kelisiw waqtı 3-4 esege qısqarģan. Bul tájiriybeni 1-iyulden baslap, respublikanıń barlıq aymaqlarında engiziw tapsırıldı.
Házirgi waqıtta elektr, gaz, suw hám kanalizaciyaǵa jalǵanıw boyınsha texnikalıq shárt alıw ushın da hár bir kommunallıq uyımǵa óz aldına múrájat etiw kerek. 1-iyulden bir arza hám bir tólem menen barlıq kommunallıq tarmaqlarǵa texnikalıq shárt alıw imkaniyatın jaratıw wazıypası qoyıldı.
Qurılıs ministrligine lizingke alınǵan texnikalardıń elektron bazasın iske qosıp, "Shaffof qurilish" sistemasına integraciyalaw hám ball beriwdi baslaw tapsırıldı.
Bunnan tısqarı, jumıstı bólip alıp islewshi kárxanalarǵa sırt elden jılına bir arnawlı texnika alıp keliw boyınsha sheklewdi biykarlaw zárúr ekenligi atap ótildi.
Ulıwma, juwapkerlerge úsh ayda qurılısqa ruqsat alıwdan baslap, paydalanıwǵa tapsırıwǵa shekemgi barlıq processlerdi tallap, talaplar, múddetler hám tólemlerdi 2 esege shekem qısqartıw boyınsha qarar joybarın kirgiziw tapsırıldı.
Usı jıl 1-iyunnen baslap mámleketlik buyırtpashılardıń jumısı tolıq KPIǵa baylanıslı bolıwı, xızmetkerlerdiń aylıǵı 3 esege arttırılıwı belgilendi. Joybar hújjetin islep shıǵıw ushın obekt bahasınıń 5 procentine shekem qarjı beriledi, avtorlıq qadaǵalaw ushın bolsa óz aldına shártnama tiykarında tólem tólenedi.
Xojeli rayonı ádillik bólimi
YXKO bas yuriskonsulti N.Amangeldieva