Янгиликлар
08
Intellektual múlk – mámleket qorǵawında
Ózbekstan Respublikası Prezidentiniń 2021-jıl 28-yanvar kúngi “Intellektual múlk obektlerin qorǵaw sistemasın jetilistiriw is-ilájları haqqında”ǵı Qararına tiykar Ózbekstan Respublikası Ádillik ministrligi janındaǵı Intellektual múlk agentliginiń Qaraqalpaqstan Respublikası, wálayatlar hám Tashkent qalasında “Intellektual múlkti qorǵaw orayları” shólkemlestirildi. Solar qatarında Qaraqalpaqstan Respublikası “Intellektual múlkti qorǵaw orayı” ashılǵanlıǵı munásibeti menen “Intellektual múlk – mámleket qorǵawında” atamasında ushırasıw ótkerildi. Ushırasıwda birge islesiwshi mámleketlik uyımlar wákilleri, ónim islep shıǵarıwshı iri isbilermenler, ónermentler, jazıwshılar, qosıqshılar hámde kompozitorlar qatnastı. Ótkerilgen ushırasıwda tiykarınan oraydıń ashılıw maqseti, wazıypaları, funkciyaları hámde kórsetetuǵın xızmetleri haqqında ushırasıw qatnasıwshılarına keńnen túsinikler berildi.
Atap aytqanda, oraydıń ashılıwınan tiykarǵı maqset Intellektual múlk huqıqı iyeleriniń nızamlı máplerin qorǵaw, sonday-aq, isbilermenlerdiń ózleriniń milliy brendlerin jaratıwda hámde bazarlarda óz orınların tabıwda jaqınnan járdemlesiw.
Oraylardıń tiykarǵı wazıypaları tómendegilerden ibarat:
kontrafakt ónimlerin islep shıǵarıw hám olardıń aylanısına, sonday-aq, intellektual múlk huqıqlarınıń buzılıwına qarsı sistemalı hám nátiyjeli gúresiwde qatnasıw, tiykarınan, eskertiw hám usınıs kirgiziw, hákimshilik bayanlamalar dúziw;
orınlarda intellektual múlk obektlerin mámleketlik dizimnen ótkeriw menen baylanıslı tarawǵa kómeklesiw;
intellektual múlk tarawında huqıqtı qollaw ámeliyatın birdey qollanılıwın támiyinlew boyınsha is-ilajlardı ámelge asırıw;
jámiyette intellektual múlkke bolǵan huqıqıy mádeniyattı asırıw hám húrmet sezimin qáliplestiriw maqsetinde intellektual múlk huquqları boyınsha qabıllanıp atırǵan nızamlar hámde normativ-huqıqıy hújjetlerdiń mazmun-mánisin hám áhmiyetin keń jámiyetshilikke jetkeriw bolıp esaplanadı.
Joqarıdaǵılarǵa tiykar isbilermenler, mádeniyat tarawı wákilleri hámde puqaralarımızdıń intellektual múlkke bolǵan huqıqları buzılǵan jaǵdaylarda orayımızǵa múrájat etiwin soraymız.
Mánzilimiz Nókis qalası, Tórtkúl gúzarı 59-jay. Baǵdar Qaraqalpaqstan Respublikası Ádillik ministrligi imaratı.
Baylanıs ushın telefonlar. (97) 355-86-50, (97) 787-75-75.
Qaraqalpaqstan Respublikası “Intellektual múlkti qorǵaw orayı”