Янгиликлар
06
Miynet nızamshılıǵına ámel etpew juwapkershilikke sebep boldı
Miynet nızamshılıǵına ámel etpew juwapkershilikke sebep boldı
Qaraqalpaqstan Respublikası Ádillik ministrligi tárepinen Qaraqalpaqstan Respublikası “Taza hudud” mámleketlik unitar kárxanasınıń Moynaq rayonı filialında islewshi puqara T.G.nıń “Isenim telefon” arqalı jollaǵan múrájatı úyrenip shıǵıldı.
Anıqlanıwınsha, puqara T.G.nıń 2021-jıl yanvar ayı ushın is haqıları 2021-jıl 12-mart kúni yaǵnıy, aradan 1 (bir) ay ótkennen keyin tólep berilgen. Buǵan, Qaraqalpaqstan Respublikası “Taza hudud” mámleketlik unitar kárxanası Moynaq filialınıń juwaplı xızmetkerleri tárepinen tabel jazıwda qoyılǵan qáte-kemshilikler sebep bolǵan.
Nátiyjede, tómendegi miynet nızamshılıǵı talapları buzılǵan:
Ózbekstan Respublikası Miynet kodeksiniń 154-statyasına muwapıq, jumıs beriwshi óziniń finanslıq jaǵdayına qaramastan, xızmеtkerge islegen jumısı ushın haqısın belgilengen miynet haqı shártlerine muwapıq usı Kodekstiń 161-statyasında kórsetilgen múddetlerde tólewi shárt.
Miynet shártnamasınıń tárepleri kelisiwi menen belgilengen miynet haqı muǵdarı jámáátlik shártnaması yaki kelisiminde ornatılǵan muǵdardan kem bolıwı múmkin emes.
Kodekstiń 161-statyasında miynetke haqı tólew múddetleri jámiyetlik shártnaması yaki basqa lokal normativ hújjette belgilenedi hám hár yarım ayda bir márteden kem bolıwı múmkin emes. Xızmetkerlerdiń ayrım túrleri ushın ayrıqsha jaǵdaylarda Ózbekstan Respublikası Húkimeti tárepinen is haqı tólewdiń basqa múddetleri belgilep qoyılıwı múmkin.
Haqı tólenetuǵın kún dem alıs kúni yaki bayram kúnine tuwrı kelip qalsa, miynet haqı usı kún qarsańında tólenedi.
Miynet shártnaması biykar etilgende xızmetkerge tiyisli bárshe summalardı tólew usı Kodekstiń 110-statyasına muwapıq tárizde ámelge asırıladı.
Jámáátlik shártnamasında jumıs beriwshiniń ayıbı menen xızmetkerge haqı tólew belgilengen múddetlerge qarata keshikkenligi ushın juwapkershilik názerde tutılıwı múmkin dep kórsetilgen.
Joqarıdaǵılarǵa tiykar, ministrlik tárepinen Qaraqalpaqstan Respublikası “Taza hudud” mámleketlik unitar kárxanasınıń Moynaq rayonı filialında islewshi puqara T.G.nıń is haqılarınıń óz waqtında tólenbewinde ayıplı bolǵan shaxslarǵa qarata nızamda belgilengen sharalardı kóriw haqqında Qaraqalpaqstan Respublikası “Taza hudud” mámleketlik unitar kárxanasına usınıs kiritildi.
Qollanılǵan tásir shara nátiyjesinde, Qaraqalpaqstan Respublikası “Taza hudud” mámleketlik unitar kárxanasınıń Moynaq rayonı filialı mexanigine ámeldegi miynet nızamshılıǵına tiykar “sógis” intizamıy jaza sharası qollanıldı.
E.Utepov,
Qaraqalpaqstan Respublikası Ádillik ministrligi
Insan huqıqların qorǵaw bólimi baslıǵı