Янгиликлар
15
Давлат нотариуслари фойдаланувида бўлган бинолар хусусий нотариусларга ижарага берилади
Ўзбекистон Республикаси Вазирлар Маҳкамасининг 2020 йил 11 апрель куни 213-сонли “Хусусий нотариал фаолиятни ташкил этишни қўллаб-қувватлаш чора-тадбирлари тўғрисида” қарори қабул қилинди.
Мазкур қарорга мувофиқ, ҳудудий адлия органларига бириктирилган ҳамда давлат нотариуслари фойдаланувида бўлган бино ва иншоотларни хусусий нотариусларга ижарага бериш, шунингдек идора инвентарларини сотиш ҳудудий адлия органлари ҳамда хусусий нотариуслар ўртасида қонун ҳужжатларида белгиланган тартибда амалга оширилиши белгиланди.
Хусусий амалиёт билан шуғулланиш истагини билдирган давлат нотариуслари бино ва иншоотларни ижарага олишда хусусий нотариусларга нисбатан устунликка эга бўлади.
Бунда, давлат нотариуси бино ва иншоотларни ижарага олишни ёзма равишда рад этган тақдирда ёки 2 ой давомида устунлик ҳуқуқидан фойдаланмаганда ушбу бино ва иншоотлар ҳудудий адлия органларига бириктирилмаган бинода фаолият кўрсатаётган хусусий нотариусларга ижарага берилади.
Давлат нотариал идораси нотариусига бириктирилган инвентарлар уларни сотиб олиш истагини билдирган хусусий амалиёт билан шуғулланувчи нотариусларга баланс қийматида сотилади.
Бино ва иншоотлар хусусий нотариуслар томонидан ижарага олинмаган ҳолларда уларда давлат нотариусларини жойлаштирилиши, шунингдек Ўзбекистон Республикаси адлия вазирлиги билан келишилган ҳолда ҳудудий адлия органлари томонидан қонун ҳужжатларида белгиланган тартибда фойдаланилиши ёки ижарага берилиши мумкин.
Қорақалпоғистон Республикаси
Адлия вазири ўринбосари Турсунов Элмурад Эргашович