Янгиликлар

ЯНГИ БИНОДА ЯНГИ ШАРОИТЛАР

Шўманай туманида замонавий услубда қурилиб фойдаланишга топширилган “Бахт уйи”нинг муҳташам биноси туман аҳолиси учун муносиб совға бўлди.

Сўнгги йилларда бюджет маблағлари ҳисобига адлия органлари фуқаролик ҳолати далолатномаларини ёзиш қисқача айтганда, ФҲДЁ бўлимлари ва давлат нотариат идораларининг моддий-техник базасини янада мустаҳкамлаш масаласига алоҳида аҳамият қаратилмоқда. Йигит қизларни оилага тайёрлаш ва уларни никоҳдан ўтказиш маросимларини тантанали, бир умр эсда қоладиган тарзда ташкил этиш борасида ҳудудларда замонавий ФҲДЁ ва “Бахт уйи”ларининг қурилиб фойдаланишга топширилаётганлиги аҳолига юридик хизмат кўрсатиш сифатини янада яхшилашга хизмат қилмоқда.

Замонавий ва миллий архитектура ечимлари уйғунлигида қад ростлаган муҳташам бинода янги оилаларнинг никоҳини қайд этиш тантанасини юқори савияда ташкил этиш учун барча қулайликлар яратилган. Никоҳ маросимларини қайд этиш зали, “Оила дорилфунуни”, «ÐšÐµÐ»Ð¸Ð½-куёвлар», ҳужжатларни сақлаш ва бошқа хизмат хоналари бугунги кун талаблари асосида жиҳозланган. Шунингдек, фуқароларга хуқуқий хизмат кўрсатиш сифатини яхшилаш мақсадида қуёш батареялари ҳам ўрнатилган.

Тадбирда иштирок этганлар давлат ва жамият тараққиётида оилалар мустаҳкамлигининг аҳамияти ва соҳа ривожига давлат томонидан берилаётган эътибор хусусида сўз юритдилар.

Мамлакатимизда амалга оширилаётган ёшлар сиёсатининг мазмун-моҳияти ҳам жисмонан бақувват, маънавий етук авлодни камол топтириш, ёш оилаларни моддий ва маънавий жиҳатдан қўллаб-қувватлашдан иборатдир. Зеро, “Оила соғлом экан - жамият мустаҳкам, жамият мустаҳкам экан - мамлакат барқарордир”. Бугун бахт кўрғонининг беназир нуфузи, улкан ижтимоий аҳамиятга молик воқелик экани ҳеч кимга шубҳа туғдирмайди. Оила жамиятнинг асосий таянчи. Унинг аҳил-тотувлиги ва фаровонлиги пировард натижада жамият барқарорлигига хизмат қилади.

Бу борадаги дастурларда фуқароларга ҳуқуқий хизмат кўрсатиш самарадорлигини янада ошириш, никоҳ маросимларини тантанали ўтказиш учун қулай шарт-шароитлар яратиш белгиланганлиги қайд этилди. Ушбу тадбир барча иштирокчиларда мустақил диёримизда инсон манфаатлари йўлида амалга оширилаётган эзгу амалларнинг узвий давоми сифатида чексиз шукроналик ва миннатдорлик ҳисларини уйғотди.

Шу куни янги “Бахт уйи”да ёшларнинг никоҳлари тантанали қайд этилиб, уларга Никоҳ гувоҳномалари топширилди.