Янгиликлар
02
17 xızmetkerge nızamsız intizamiy shara qollanıw haqqındaǵı buyrıqlar biykar etildi.
17 xızmetkerge nızamsız intizamiy shara qollanıw haqqındaǵı buyrıqlar biykar etildi.
Qaraózek rayonı ádillik bólimi tárepinen Qaraózek rayonlıq medicina birlespesiniń KTP patranaj miyirbikesi bolıp islewshi puqara E.U.dıń iskerligi dawamında intizamiy jaza sharası qollanılǵanlıǵınan narazı bolıp, bul intizamiy jaza sharasın biykarlap beriwdi sorap jollaǵan múrájatı úyrenip shıǵıldı hám úyreniw dawamında tómendegiler anıqlandı.
E.U. óz iskerligi dawamında, óz xızmet wazıypasın tolıq orınlamay atırǵanlıǵı, yaǵnıy, nawqas G.K. menen qatnasta bolǵan shańaraq aǵzalarınıń flyurografiyadan ótkenligin tastıyıqlawshı hújjetti tiyisli tártipte usınbaǵanlıǵı haqqındaǵı rayonlıq Mámleketlik sanitariya tınıshlıq hám jámiyet salamatlıǵı bólimi tárepinen jollanǵan 15.01.2021-jılǵı 2-46 sanlı xatqa tiykar, rayonlıq medicina birlespesiniń 11.01.2021-jılǵı 65-k sanlı buyrıq penen is haqısınan 20% muǵdarda “járiyma” intizamiy jazası qollanılǵan.
Bunnan tısqarı usınday jaǵday boyınsha joqarıda kórsetilgen buyrıqlar menen 16 xızmetkerge intizamiy shara retinde “sógis” hám járiyma qollanılǵan. Úyreniw nátiyjesinde xızmetkerlerge intizamiy shara qollanıwda miynet nızamshılıǵı talaplarına ámel etilmegenligi anıqlandı.
Atap aytqanda, Ózbekstan Respublikası Miynet Kodeksiniń 178-statyasında, xızmetker ózine júkletilgen xızmet wazıypaları menen aldınnan tanıstırılıwı lazımlıǵı, 181-statyasında bolsa is beriwshi tárepinen xızmetkerlerge qarata qollanılıwı múmkin bolǵan intizamiy jaza sharalarınıń túrleri belgilengen bolıp, olarǵa sógis, ortasha is haqısınıń 30 payızınan aspaǵan muǵdardaǵı járiyma jazası xám tiyisli tártipte miynet shártnamasın biykarlaw sıyaqlı túrleri belgilengen. 182-statyada “Intizamiy jaza qollanılıwınan aldın xızmetkerden jazba túrde túsinik xatı talap etiliwi lazım. Xızmetkerdiń túsinik xat beriwden bas tartıwı onıń is-háreketi ushın intizamiy jaza sharası qollanıwǵa tosıq bola almaydı, intizamiy jaza berilgeni haqqındaǵı buyrıq (biylik) yaki qarar xızmetkerge málim etilip, tilxat alınadı”-dep kórsetilgen. Biraq, úyreniw dawamında Miynet Kodeksiniń bul talaplarınıń orınlanǵanlıǵın tastıyıqlawshı hújjetler usınılmadı.
Bunnan tısqarı, intizamiy juwapkershilikke tartıw haqqındaǵı 65-k buyrıqta Mámleketlik sanitariya tınıshlıq hám jámiyet salamatlıǵı bólimi tárepinen 15.01.2021-jıl 2-46-sanlı jollanǵan xatı tiykar etip kórsetilgen, bul buyrıqtıń shıǵarılıwına tiykar bolǵan xattıń jollanılıwınan aldınǵı dáўir menen, yaǵnıy 11.01.2021-jıl menen rásmiylestirilgen halda qabıl etilgen. Bul óz gezeginde buyrıq qabıl etiw ushın tiykardıń bolmaǵanlıǵın kórsetedi.
20.01.2021-jılǵı 133-k sanlı buyrıǵına tiykar, tiyisli tártipte hám óz múddetinde emlew profilaktika sharaları kóriliwi kerek bolǵan balalardıń rayonlıq medicina birlespesine kelip, emlew profilaktika islerine qatnasıwın támiyinlemegenligi boyınsha is haqısınan 30% muǵdarında járiyma jazası qollanılǵan.
Usı halatta, xızmetkerdiń is haqısına qaratılǵan “járiyma” intizamiy jaza sharasın qollanıwda ortasha is haqısına qaratılıwı kerekligi haqqındaǵı miynet nızamshılıǵı talabı buzılǵan.
Bul jaǵdayda da, Miynet kodeksiniń 182-statyasında belgilengen talaplardıń orınlanǵanlıǵın tastıyıqlawshı hújjetler usınılmadı.
Bunnan tısqarı, joqarıdaǵı intizamiy jaza sharaların qollanıw haqqında shıǵarılǵan buyrıqta kórsetilgen xızmetkerler hám bul buyrıq penen tiyisli tártipte tanıstırılmaǵanlıǵı málim boldı.
Bul óz gezeginde xızmetkerlerdiń óz xızmet wazıypaların tolıq bilmewine hám iskerligi dawamında kemshiliklerge jol qoyıwına sebep bolǵanlıǵı, bul kemshilik nátiyjesinde olarǵa Miynet Kodeksiniń 178, 181, hám 182-statyalarında kórsetilgen miynet nızamshılıǵı talaplarınıń buzılıwına jol qoyǵan halda intizamiy jaza sharaları qollanılǵanlıǵı anıqlandı.
Ádillik bólimi tárepinen Qaraózek rayonı medicina birlespesine miynet nızamshılıǵı talaplarına qayshı túrde shıǵarılǵan 11.01.2021-jılǵı 65-k sanlı hám 20.01.2021-jılǵı 133-k sanlı buyrıqlardı biykar etiw hám nızambuzıwshılıq jaǵdaylarına jol qoyǵan xızmetkerlerdiń intizamıy juwapkershilik máselesin kórip shıǵıw boyınsha usınıs kiritilip, buyrıqlar biykar etilip, xızmetkerlerdiń is haqısınan uslap qalınǵan qarjılar qaytarılıp tólep berildi hámde qáte-kemshilikke jol qoyǵan xızmetkerge intizamiy jaza sharası qollanıldı.
Oralbay Djumaniyazov,
Qaraózek rayonı ádillik bólimi baslıǵı