Янгиликлар
07
Jańa redakciyadaǵı “Hújdan erkinligi hám diniy shólkemler haqqında”ǵı Ózbekstan Respublikası Nızamı qabıl etildi
Jańa redakciyadaǵı “Hújdan erkinligi hám diniy shólkemler haqqında”ǵı Ózbekstan Respublikası Nızamı qabıl etildi
Nızam menen, bir qatar jańalıqlar kirgizildi:
Birinshiden, Nızam tiykarında diniy shólkemlerdi dizimnen ótkeriw hám saplastırıw menen baylanıslı tártip ápiwayılastırılıp, bul baǵdarda áhmiyetli jeńillikler engizilmekte.
Atap aytqanda, jergilikli diniy shólkemler, sonıń ishinde meshitler hám basqa konfessiyalardıń ibadatxanaların shólkemlestiriw boyınsha baslamashı puqaralar sanı eki ese kemeytirilip, 50 den kem bolmaǵan dep belgilendi.
Diniy shólkemdi mámleketlik dizimnen ótkeriw menen baylanıslı xızmetler tolıq elektron formada, insan faktorısız ámelge asırılıwı engizildi.
Dizimnen ótkeriwshi ádillik uyımlarına usınılatuǵın hújjetler sanı qısqardı, olardı kórip shıǵıw múddeti 3 aydan 1 ayǵa túsirildi.
Diniy shólkemniń iskerligin toqtatıp qoyıw hám saplastırıw tek ǵana sud arkalı bolıwı, dizimnen ótkeriletuǵın hám basqa mámleketlik uyımlar buǵan haqlı emes ekenligi, lawazımlı shaxslardıń arnawlı diniy shólkem nızamlı máplerin buzıwshı háreketleri ústinen sudqa múrájat etkende diniy shólkem mámleketlik bajını tólewden azat etiliwi sıyaqlı qosımsha kepillikler názerde tutıldı.
Ekinshiden, diniy tálimniń professional statusı rásmiy belgilendi, Ózbekstan Respublikası puqaralarınıń dinge bolǵan múnásibetine qaramastan, dún'yalıq tálim alıw huqıqı támiyinleniwi belgilendi.
Diniy bilimlendiriw mákemesinen tısqarıda diniy tálim beriw nızamsız iskerlik sıpatında belgilendi.
Úshinshiden, “ibádat kiyimi” túsiniginiń sıpatlaması joq ekenligi sebepli jámiyelik orınlarda ibádat kiyiminde júriwge qadaǵan Nızamnan shıǵarıp taslandı.
Sonıń menen bir qatarda, ámeldegi basqa nızamshılıq hújjetlerine tiykar, mámleketlik uyımlar hám mákemelerde xızmetkerlerdiń kiyiniwine baylanıslı talaplar olardıń ishki hújjetleri menen tartipke salınadı.
Tórtinshiden, diniy shólkemdi dúziw ushın talap etip kelingen máhálle puqaralar jıyınları razılıǵın alıw tártibi biykar etildi.
Besinshiden, Nızamda, jámiyette hár túrli jat qaraslardı úgit-násiyatlap atırǵan toparlardıń iskerligi, olar tárepinen tarqatılıp atırǵan buzǵınshı ideyalardıń unamsız tásirinen xalıqtı qorǵaw maqsetinde diniy mazmundaǵı materiallardı dintanıwshılıq ekspertizasınıń unamlıjuwmaǵın alǵannan keyin tayarlaw, alıp kiriw hám tarqatıw belgilep qoyıldı.
Bunnan tısqarı, mámleketlik uyımlar tárepinen nızam normaları qalıs emes túrde talıqlawı hám hár túrli qollanılıwınıń aldın alıw maqsetinde atama hám túsiniklerge túsindiriwler keltirildi.
Diniy qaras hám táliymatlardıń hár túrli talıqlanıwına jol qoymaw maqsetinde “nızamsız diniy iskerlik” penen “nızamlı diniy iskerlik” ortasındaǵı shegara anıq belgilep qoyıldı hámde “diniy tálim” túsinigine huqıqıy tárepten anıqlıq kirgizildi.