04.10.2021

Korrupciyaǵa qarsı gúresiw tarawında ámelge asırılǵan jumıslar boyınsha Qaraqalpaqstan Respublikası Ádillik ministrligi tárepinen ámelge asırılǵan jumıslar boyınsha maǵlıwmat

Korrupciyaǵa qarsı gúresiw tarawında ámelge asırılǵan jumıslar boyınsha Qaraqalpaqstan Respublikası Ádillik ministrligi tárepinen ámelge asırılǵan jumıslar boyınsha maǵlıwmat

Korrupciya menen gúresiwde hár bir mámleketlik uyımnıń tiykarǵı wazıypalarınan biri bolıp esaplanadı. Sol qatarda, Ádillik ministrliginde de bul illetke qarsı gúresiw, korrupciyaǵa baylanıslı huqıqbuzarlıqlardıń aldın alıw, olarǵa shek qoyıw boyınsha áhmiyetli is-ilajlar islep shıǵıldı.    
Ministrliktiń korrupciyaǵa qarsı gúresiw siyasatı islep shıǵıldı, antikorrupciyalıq komplaens sisteması engizildi.
Sol tiykarda xızmetkerler arasında korrupciyaǵa qarsı ayawsız gúresiw hámde óz iskerliginde oǵan qarsı keskin gúresiw maqsetinde miynet shártnamalarına ózgerisler kirgizildi.
Sonı ayrıqsha atap ótiw orınlı, Ózbekstan Respublikası Ádillik ministriniń 2020-jıl 24-marttaǵı 68-um-sanlı buyrıǵı menen tastıyıqlanǵan “Ádillik uyımları hám mákemelerinde HR-menejment sisteması haqqında”ǵı Rejege kóre, ádillik uyımları hám mákemeleri xızmetkerlerin jumısqa kabıl etiw tek ǵana tańlaw tiykarında ámelge asırılıwı belgilengen.
Bunnan tısqarı, ádillik ministriniń 2020-jıl 19-marttaǵı “Ózbekstan Respublikası Ádillik ministrligi sistemasında mámleketlik satıp alıwlardı ámelge asırıwdı tártipke salıw xaqqında”ǵı 64-um-sanlı buyrıǵı qabıl etilgen bolıp, ministrlik tárepinen Ádillik uyımları hám mákemelerinde shólkemlestiriletuǵın tańlaw (tender) ótkeriw boyınsha satıp alıwlar komissiyaları haqqındaǵı Reje, mámleketlik satıp alıwlardı ámelge asırıw sheńberinde satıp alıw tártip-qaǵıydaları qatnasıwshıların tekseriw processi boyınsha Qollanba, tańlaw ótkeriw boyınsha satıp alıw komissiyası quramı tastıyıqlanǵan.    
Ádillik uyımları sistemasında korrupciyaǵa qarsı ayawsız urıs járiyalanǵan. Bunda Ádillik ministrligi quramın kiriwshi barlıq uyımlardaǵı korrupciya kórinisi haqqındaǵı maǵlıwmatlardı telegram tarmaǵında @antikorbot botı arqalı yamasa ministrlik rásmiy veb-saytındaǵı arnawlı platforma arqalı jiberiw imkaniyatı jaratılǵan. Bunda jiberilgen xabarlar belgilengen tártipte kórip shıǵıladı hámde múrájat etiwshiniń shaxsı qatań sır saqlanıwı támiyinlenedi.
Korrupciya boyınsha xabar bergen shaxslar belgilengen tártipte xoshametlenedi.
Ministrliktegi bul jumıslardı muwapıqlastırıwshı xızmetker hám jámiyetshilik tiykardaǵı “Xadallıq oficeri” lawazımı engizildi.
Bul tarawda alıp barılıp atırǵan keń kólemli isler nátiyjesinde Ádillik ministrligi korrupciyaǵa qarsı gúresiw boyınsha mámleketlik uyımlar ishinde birinshi bolıp “Korrupciyaǵa qarsı gúresiw menedjment sisteması” xalıqaralıq standartına muwapıq dep bahalandı hám sertifikatqa iye boldı.
Xabarıńız bar, “Korrupciyaǵa qarsı gúresiw haqqında”ǵı Nızamda korrupciya hám huqıqbuzarlıqlarǵa qarsı gúresiwde xalıqtıń huqıqıy sana hám huqıqıy mádeniyatın asırıw ádillik ministrligine júkletilgen tiykarǵı wazıypalardan biri esaplanadı.
Ministrlik tárepinen korrupciyaǵa qarsı gúresiw tarawında bir qatar jumıslar ámelge asırılıp kelinbekte.
Qaraqalpaqstan Respublikası ádillik ministri tárepinen tastıyıqlanǵan “Mámleketlik uyımları hám shólkemlerinde xızmetkerlerdiń huqıqıy bilimin asırıwǵa qaratılǵan huqıqıy másláhát kursların shólkemlestiriw boyınsha reje-grafik” tastıyıqlanıp mámleketlik uyımları hám shólkemlerde korrupciyaǵa qarsı gúresiw boyınsha nızam hújjetleriniń mazmun-mánisin túsindiriwge qaratılǵan “Másláhát kursları”n ótkeriw jolǵa qoyılǵan.
Sonday-aq, mámleketlik emes kommerciyalıq emes shólkemleri hám ǵalaba xabar quralları xızmetkerleriniń huqıqıy bilim hám sawatlı adamlıǵın asırıw maqsetinde vebinarlar ótkerip kelinbekte.
Ministrlik tárepinen hár jılı Qaraqalpaqstan Respublikası Prokuraturası, Xalıq bilimlendiriw ministirligi, Jaslar awqamı menen birgelikte jaslarda korrupciyaǵa hám basqa huqıqbuzarlıqlarǵa qarsı taqatsızlıq sezimin qáliplestiriwge qaratılǵan “Korrupciya rawajlanıwǵa tosıq” atamasındaǵı shıǵarmalar tańlawı ótkerilip kelinbekte. Bul tańlawlarda hár jılı jaslarımız belsene qatnasıp, Ózbekstan Respublikası kóleminde sıylı orınlardı iyelep kelmekte.
Sonı ayrıqsha atap ótiwimiz lazım, ministrlik tárepinen Qaraqalpaqstan Respublikası Yuridika texnikumınıń “Ádalat qanatları” hám Qaraqalpaq mámleketlik universitetiniń “Street law” toparınıń jumısların shólkemlestiriw hám muwapıqlastırıw jolǵa qoyılǵan.
Bul úgit-násiyat topar aǵzaları jámiyetshilik arasında turaqlı túrde úgit-násiyat jumısların alıp barmaqta.
Korrupciyaǵa qarsı gúresiw boyınsha ministrlik hám rayon (qala) ádillik bólimleri tárepinen 2021-jıldıń 9 ayı dawamında 700 ge jaqın úgit-násiyat jumısları alıp barıldı.
Ǵalaba xabar qurallarında 303, orınlarda 378 úgit-násiyat ilajları, sonnan máhállelerde 131, bilimlendiriw shólkeminde 104, miynet jámáátlerinde 78, úyme-úy júriw arqalı 115 hámde basqa jerlerde 65 úgit-násiyat ilajları ótkerilip, olarǵa bes mıńnan aslam puqaralar qamtıp alınǵan.
Qaraqalpaqstan televideniesi menen birge korrupciyaǵa qarsı gúresiw boyınsha nızamshılıq hújjetleriniń mazmun-mánisin túsindiriwge qaratılǵan kórsetiwler tayarlandı.
2021-jıl 28-iyul kúni Qaraqalpaqstan Respublikası ádillik ministri tárepinen “Korrupciya mámleket hám jámiyet rawajlanıwı ushın eń tiykarǵı qáwip-qáterlerden biri ekenligin xalıq hám mámleketlik xızmetshiler sanasına sińdiriw boyınsha úgit-násiyat ilajların ámelge asırıw boyınsha Reje-grafigi”tastıyıqlanıp, grafikke tiykar Suw xojalıǵı, Awıl xojalıǵı, Mektepke shekemgi bilimlendiriw, Xalıq bilimlendiriw, Mádeniyat, Turaq-jay – kommunalıq xızmet kórsetiw ministrligi, Ekologiya hám qorshaǵan ortalıqtı  qorǵaw komiteti hám olardıń quramlıq bólimleri xızmetkerleri ushın vebinarlar ótkerildi.    
    Qaraqalpaqstan Respublikası Ádillik ministrligi hám rayon (qala) ádillik bólimleri tárepinen mámleket uyım hám shólkemler, jergilikli mámleketlik hákimiyatı uyımlarınıń yuridikalıq xızmet xızmetkerleri ushın Ózbekstan Respublikası ádillik ministriniń 2021-jıl
24-fevraldaǵı buyrıǵı menen tastıyıqlanǵan “Normativlik-huqıqıy hújjetler hám olar joybarlarınıń korrupciyaǵa qarsı ekspertizasın ótkeriw tártibi haqqında”ǵı Rejeniń mazmun-mánisin túsindiriwge qaratılǵan seminarlar ótkerildi.
    Sonıń menen bir qatarda, ministrlik hám rayon (qala) ádillik bólimleri tárepinen 38 normativ-huqıqıy hújjet korrupciyaǵa qarsı huqıqıy ekspertizadan ótkerilgen.