Янгиликлар

Қонун ҳужжатларини туркумлаш

Ўзбекистон Республикаси Президентининг 2011 йил 23 августдаги қарори билан тасдиқланган “Ўзбекистон Республикаси Адлия вазирлиги тўғрисида”ги Низомга мувофиқ, Адлия вазирлигига норма ижодкорлиги ва ҳуқуқни қўллаш амалиёти соҳасида ягона давлат сиёсатини изчил амалга ошириш соҳасида давлат бошқаруви органлари ва маҳаллий давлат ҳокимияти органларида қонун ҳужжатларининг туркумлаштирилган ҳисобини юритиш қоидаларини белгилаш ва уларга риоя қилиш устидан назоратни амалга ошириш вазифаси юклатилган.

Шу муносабат билан, Адлия вазирлиги тизимида қонун ҳужжатларининг туркумлаштирилган ҳисобини юритиш қоидаларининг ўз вақтида аниқ ва сифатли ижросини таъминлаш ҳамда бу соҳадаги масъул бўлган ходимларнинг малакасини янада ошириш мақсадида, Қорақалпоғистон Республикаси Адлия вазирлиги томонидан Нотариал идоралари, ФҲДЁ булимлари ҳамда маҳаллий давлат ҳокимияти органлари юридик хизмати ходимлари (юрисконсульт) учун ўқув-семинари ташкил этилди.

Семинарда сўзга чиққанлар бу масаланинг қанчалик бугунги кун учун аҳамиятли эканлигини, шу билан бир қаторда бу борада галдаги вазифалар ҳақидаги масалаларга атрофлича тўхталиб ўтдилар.

Семинар давомида ҳозирги вақтда ушбу соҳада йўл қўйилаётган хато-камчиликлар, қонун ҳужжатларининг туркумлаштирилган ҳисобини юритиш борасида амалга оширилаётган ишларга юзаки қарашлар ҳамон давом этаётгани ҳолати танқидий муҳокама қилиниб, бу бўйича аниқ кўрсатмалар, тушунчалар берилди.

Семинар мобайнида иштирокчилар ўзлари қизиқтирган саволлари билан фаол иштирок этиб, тегишли жавобларини олишди.