Янгиликлар
12
Neke shártnaması – shańaraq tınıshlıǵı
Neke shártnaması – shańaraq tınıshlıǵı
Neke shártnaması–bul nekeden ótiwshi erli-zayıplılardıń neke dáwirinde yamasa nekeden ajırasqan táǵdirde olardıń múlkiy huqıq hám minnetlerin belgilep beriwshi kelisimi bolıp esaplanadı. Neke shártnaması- neke mámleketlik dizimge alınǵanǵa shekem hámde neke dáwirinde de dúziliwi múmkin. Nekesi mámleketlik dizimge alınǵanǵa shekem dúzilgen neke shártnaması, neke dizimge alınǵan kúnnen baslap óz kúshine kiredi. Neke shártnaması jazba túrde hám notariustıń tastıyıqlanıwı arqalı dúziledi. Neke shártnaması er hám hayaldıń bar bolǵan múlkinede, endigi mal-múlkinede dúziliwi múmkin. Er hám hayaldıń ortasında dúzilgen neke shártnaması tek olardıń múlkiy qatnasıqlarına qaratılǵan bolıp, jeke qatnasıqların tártipke salıw haqqındaǵı shártleri kirmeydi yaǵnıy nızamda bunday shártler haqıyqıy emes dep tabıladı. Kópshilik puqaralarımız nızamnıń maqsetin, onıń áhmiyetin, mazmunın túsinip jetpesten, kelte juwmaq shıǵarıp qoyadı. Mısalı, neke shártnaması haqqında túsinik aytqanımızda, ayrımlardıń «bizlerdiń turmısımızda múlkiy qarama-qarsılıqlar bolmaydı, sonıń ushın neke shártnamasın dúziwge qájet joq» degen pikirler bildiredi. Álbette, bul nadurıs. Gáp shańaraqtaǵı múlkiy tartıslarǵa, ajırasıwlarǵa qaratılǵan emes. Maqset shańaraqtaǵı múlkiy qatnasıqlardı tártipke salıwda, nızam jaratqan imkaniyatlardı durıs qabıl etip alıwda. Sebebi biziń nızamlarımız áyne puqaralardıń erteńgi kúni tınısh, táshwishsiz ótiwdi gózleydi. Nızamlar puqaralardıń turmıs tájiriybesine súyengen halda islep shıǵıladı. Neke shártnaması erli-zayıplılardıń kelisiwi menen qálegen waqtında ózgertiliwi yamasa biykarlanıwı múmkin. Neke shártnaması bir tárepleme toqtatılmaydı, sebebi bunday jaǵday táreplerdiń shártnamada belgilengen huqıqlarınıń buzılıwına alıp keledi. Huqıqıw mámleket hám puqaralıq jámiyet dúzip atırǵan kúnimizde, hár bir puqara, ásirese jaslar óz huqıqların biliwi shárt. Solay eken puqaralar ózleriniń máplerinen kelip shıqqan halda dúzilgen nızamlardıń mazmunın, maqsetin, áhmiyetin túsinip, onıń imkaniyatlarınan tolıq paydalana biliwleri-házirgi zaman talaplarınıń biri bolıp esaplanadı. Óz huqıqların bilgen halda, nızam qorǵawında bolǵan hár bir insan hesh qashan ádilsizlikke dus kelmeydi.
Kegeyli rayonı ádillik bólimi
PHAJ bólimi baslıǵı Inkar Erjanova