Янгиликлар
25
Mámleketlik xızmetlerin orınlarǵa shıqqan halda kórsetiw tártibi belgilendi
Mámleketlik xızmetlerin orınlarǵa shıqqan halda kórsetiw tártibi belgilendi
Búgingi kúnde xalqtıń mámleketlik xızmetlerine bolǵan talabı kúnnen-kúnge asıp barmaqta. Xalıqtıń social qorǵawǵa mútáj qatlamların qollap-quwatlaw jumısların jedellestiriwde, «Hár bir puqara — itibar orayında» principi tiykarında xalıqtıń barlıq qatlamlarına sapalı hám operativ mámleketlik xızmetlerin kórsetiwdi jolǵa qoyıw maqsetinde Ózbekstan Respublikası Ministrler Kabinetiniń 2023-jıl 31-avgust kúni “Mámleketlik xızmetlerin orınlarǵa shıqqan halda kórsetiwdiń hákimshilik reglamentin tastıyıqlaw haqqında”ǵı 435-sanlı qararı qabıl etildi.
Usı qarar menen mámleketlik xızmetlerin Ádillik ministrliginiń Baylanıs orayına (“Call-oray”) yamasa onıń rásmiy veb-saytına múrajat etiw, mámleketlik xızmetlerinen paydalanıw ushın arza jiberiw boyınsha sorawnamalardı qabıl etiw hám kórip shıǵıw, mámleketlik xızmetlerin orınlarǵa shıqqan halda arnawlı texnik qurılmalar járdeminde (planshet yamasa kompyuterge ornatılǵan daktiloskopiya, printer hám basqalar) kórsetiw belgilendi.
Sonday-aq arnawlı texnik qurılmalar járdeminde (planshet yamasa kompyuterge ornatılǵan daktiloskopiya, printer hám basqalar) mámleketlik xızmetlerin orınlarǵa shıqqan halda kórsetiw (“Call-oray”) yamasa onıń rásmiy veb-saytdan paydalanǵan halda 2023-jıl 1-oktyabrden baslap ámelge asırıladı.
Usı qarar qosımshası menen tastıyıqlanǵan mámleketlik xızmetlerin orınlarǵa shıqqan halda kórsetiwdiń hákimshilik reglamentine kóre, “Call-oray” arqalı sorawnamalar saat 09 :00 den 18:00 ge shekem jumıs waqtı dawamında qabıl etiledi. Rásmiy veb-sayt arqalı kúnniń qálegen waqtında múrajat etiw múmkin. Mámleketlik xızmetlerin kórsetiw waqıtı Mámleketlik xızmetleri orayları (wákillikli organ)nıń jumıs waqıtı sheńberinde ámelge asırıladı.
“Call-oray” juwapker xızmetkeri arza beriwshige mámleketlik xızmetlerin kórsetiw tártibin belgilewshi nızamshılıq hújjetlerinde názerde tutılǵan mámleketlik xızmetlerinen paydalanıw ushın zárúr bolǵan barlıq hújjetler (maǵlıwmatlar) haqqında maǵlıwmat beredi. Arza beriwshi sorawnamada kórsetilgen mámleketlik xızmetlerinen paydalanıw ushın mámleketlik xızmetlerin kórsetiwde talap etiletuǵın barlıq hújjetlerdi (maǵlıwmatlardı) tayarlap qoyıwı kerek. Sorawnama qáliplestirilip, sorawnamadaǵı tiyisli maǵlıwmatlar arza beriwshi tárepinen tastıyıqlanǵannan keyin onıń mobil telefon nomerine usı Reglamenttıń 4-bándinde belgilengen muǵdardaǵı tólemdi ámelge asırıw ushın invoys avtomatikalıq túrde jiberiledi. Arza beriwshi tárepinen tólem ámelge asırılǵan waqıttıń ózinde sorawnama wákillikli organǵa avtomatikalıq túrde jiberiledi.
Wákillikli organnıń juwapker xızmetkeri tárepinen mámleketlik xızmetleri tómendegi formalarda kórsetiledi.
- mámleketlik xızmetlerin tolıq kórsetiw (mámleketlik xızmetler orayları mámleketlik xızmetlerin kórsetiwge juwapker bolǵanda);
- mámleketlik xızmetlerinen paydalanıw ushın mámleketlik xızmetlerin kórsetiwge juwapker bolǵan wákillikli organlarǵa arza jiberiw.
Keyin ala juwapker xızmetker arza beriwshi menen telefon arqalı baylanısıp, sorawnamada kórsetilgen orınǵa shıǵadı hámde arnawlı texnikalıq qurılmalar járdeminde (planshet yamasa kompyuterge ornatılǵan daktiloskopiya, printer hám basqalar) mámleketlik xızmetlerin kórsetedi yamasa mámleketlik xızmetlerinen paydalanıw ushın arza jiberedi (sorawnamada belgilengen múddetlerde).
Arza beriwshi mámleketlik xızmetlerinen paydalanıwda onıń hár qanday basqıshında bas tartıw huqıqına iye. Arza beriwshi mámleketlik xızmetlerinen paydalanıwdan bas tartǵanda, onıń sorawnaması ko'rilmesden qaldırıladı hám tólengen tólem summası qaytarılmaydı.
Eger wákillikli organnıń juwapker xımetkeri sorawnamada kórsetilgen orınǵa jetip kelgen waqıttan baslap 30 minut dawamında arza beriwshi sorawnamada kórsetilgen waqıtta hám mánzilde bolmasa, mámleketlik xızmetlerin kórsetiw ushın tiyisli nızamshılıq hújjetlerinde belgilengen hújjetler (maǵlıwmatlar)in usınıs etpese, mámleketlik xızmetlerin kórsetiw yamasa mámleketlik xızmetlerinen paydalanıw ushın arza jiberiw biykar etiledi.
Bunda wákillikli organnıń juwapker xızmetkeri tárepinen arza beriwshige mámleketlik xızmetlerin kórsetiw yamasa mámleketlik xızmetlerinen paydalanıw ushın arza jiberiw biykar etilgenligi tuwrısında SMS-xabarnama jiberiledi (biykar etiw sebepleri tolıq kórsetiledi).
Sonday-aq wákillikli organ juwapker xızmetkeriniń ayıbı (keshigiwi yamasa kelmewi, informaciya sisteması yamasa arnawlı texnikalıq qurılmalardaǵı buzılıwlar) menen mámleketlik xızmetlerin belgilengen múddetlerde hám tártipte kórsetilmegen jaǵdaylarda mámleketlik xızmetlerin orınlarǵa shıqqan halda kórsetiwde óndiriletuǵın tólem muǵdarları arza beriwshiniń múrajatına tiykar oǵan qaytarıladı.
Sonıń menen birge arza beriwshi joqarıdaǵı jaǵdayda mámleketlik xızmetlerin orınlarǵa shıqqan halda kórsetiwde óndiriletuǵın tólemlerdi qaytarıp alıwı yamasa mámleketlik xızmetlerin orınlarǵa shıqqan halda kórsetiwde óndiriletuǵın tólemdi tákirariy ámelge asırmastan mámleketlik xızmetlerinen basqa waqıtta paydalanıwı múmkin. Bunda arza beriwshi mámleketlik xızmetlerinen paydalanıw ushın joqarıda belgilengen tártipte múrajat etedi.
Arza beriwshiniń qálewine kóre, mámleketlik xızmetlerin kórsetiw nátiyjesin Mámleketlik xızmetleri oraylarına tikkeley kelip, informacion-kommunikaciya texnologiyalarınan paydalanǵan halda yamasa pochta baylanısı arqalı alıwı múmkin. Bunda pochta ǵárejetleri arza beriwshiniń esabınan qaplanadı.
Pochta baylanısı tárepinen kórsetilgen xızmet ushın tólem muǵdarı pochta xızmeti tárepinen belgilenedi.
Mámleketlik xızmetlerin orınlarǵa shıqqan halda kórsetiw yamasa mámleketlik xızmetlerinen paydalanıwǵa arza jiberiw ushın Tashkent qalasında BEMnıń 50 payızı, wálayat oraylarında BEMnıń 40 payızı, rayon (qala)larda BEMnıń 30 payızı muǵdarında bir mártelik tólem óndiriledi. Bunda ózgeler járdemine mútáj qariyalar, den-sawlıgınıń jaǵdayına kóre erkin háreketleniwi sheklengen hámde I hám II topar mayıplıǵı bolǵan shaxslarǵa mámleketlik xızmetlerin kórsetilgenligi ushın tólem óndirilmeydi.
Sonday-aq bul Reglament milliy aydawshılıq gúwalıǵın rásmiylestiriwge, Ózbekstan puqarası, Ózbekstanda turaqlı jasawshı sırt el puqarası hám puqaralıǵı bolmaǵan shaxstıń identifikaciyalaytuǵın ID-kartasın hámde shet elge shıǵıw biometrik pasportın rásmiylestiriwge, fizikalıq shaxstıń jeke identifikaciya nomerin beriw boyınsha mámleketlik xızmetlerin kórsetiwge qollanılmaydı.
Óz gezeginde bulardıń bárshesi xalqımızǵa jaratılıp atırılǵan qolaylıq hám jeńilliklerdiń biri esaplanadı. Xalqımızǵa tez, qolaylı, sapalı hámde ashkara xızmetler kórsetiw hám sol arqalı puqaralarımızdı razı qılıw bizdiń eń tiykarǵı maqsetimiz.
J.Toreniyazov
Bozataw rayonı Ádillik bólimi
Mámleketlik xızmetler orayı bas qánigesi