Янгиликлар
18
Mámleket shólkemleri xızmetkerleriniń korrupciyaǵa tiyisli huquq buzarlıqfaktleri haqqında xabar beriw minnetlemesi.
Hár qanday mámlekettiń óz rawajlanıw jolı boladı. Biziń mámleketimizde xalqımızdıń abadan turmısın támiyinlew, insan máplerin qorǵaw eń tiykarǵı maqset bolıp esaplanadı.
Prezidentimiz basshılıǵında alıp barılıp atırǵan ishki hám sırtqı siyasatta da xalıq mápleri eń baslı orında tur. Biz bularǵa hár kúni ǵalaba xabar quralları arqalı gúwa bolıp júrmiz. Álbette, elimizdiń rawajlanıwı ushın hámmemiz bir maqset hám bir niyet jolında birlesip, belgilengen Háreketler strategiyası boyınsha óz iskerligimizdi dawam ettirsek, biz keleshegimiz bolǵan perzentlerimizge erkin hám abat Watandı inám etemiz. Álbette, bunda joqarı lawazımdaǵı insanlardıń haq kewil hám patriot bolıwı úlken áhmiyetke iye. Sebebi, mámleket rawajlanıwına tosqınlıq etiwshi faktorlardıń biri-dámegóyshilik, yaǵnıy bir sóz benen aytqanda, korrupciya bolıp tabıladı.
Korrupciyaǵa qarsı qatań hám keskin gúres alıp barıw házirgi dáwirdiń baslı baǵdarı desek qátelespeymiz. Sebebi qaysı bir tarawda rawajlanıw, ósiw bolmasa bunıń tiykarǵı sebebi korrupciyaǵa barıp tireledi. Korrupciya mámlekette ámelge asırılıp atırǵan reformalar jolına úlken tosqınlıq jasaydı. Dún'yanıń aldıńǵı mámleketleri korrupciyaǵa qarsı milliy dárejedegi is-ilájlardı qollaw menen bir qatarda, xalıq aralıq kólemdegi baǵdarlamalardı da ámelge asırıwda belsendelik kórsetip kelmekte.
Korrupciyanıń eń keń tarqalǵan túrlerine paraxorlıq, isenimge kiriw hám tawlamashılıq kiredi.
Korrupciya xalıqtıń, puqaralardıń mámleket hám onıń uyımlarına bolǵan isenimsizligin keltirip shıǵaradı, jámiyette social-ekonomikalıq mashqalalardıń payda bolıwına sharayat jaratıp berip hám tereńlesiwine alıp keledi.
Korrupciya eń dáslep, hár bir mámlekette onıń basqarıw apparatınıń xalıq aldındaǵı minimal májbúriyatların orınlawda ázzilikti ańlatadı.
Mámleketimiz basshısı Shavkat Mirziyoev óziniń saylaw aldı bayanatlarınıń birinde «búgingi kúndegi jáne bir tiykarǵı wazıypamız-mámleketimiz rawajlanıwına tosıq bolıp bolıp kiyatırǵan jawız illet, yaǵnıy korrupciya hám uyımlasqan jınayatshılıqqa qarsı gúresiw, huquq buzarlıqlardıń aldın alıw máselelerin nátiyjeli sheshiwden ibarat» ekenligine ayırıqsha atap ótken edi.
Ótken dáwirde «Korrupciyaǵa qarsı gúresiw haqqında»ǵı Ózbekstan Respublikası Nızamı hám Prezidentimizdiń «Korrupciyaǵa qarsı gúresiw haqkında»ǵı Ózbekstan Respublikası nızamınıń qaǵıydaların ámelge asırıw is-ilájları haqqında»ǵı PQ-2752-sanlı qararı hám Ózbekstan Respublikası Prezidentiniń 2019-jıl 27-may kúni «Ózbekstan Respublikasında korrupciyaǵa qarsı gúresiw sistemasın jánede jetilistiriw is-ilájları haqqında»ǵı PF-5729-sanlı Pármanı qabıl etildi.
Sonıń menen birge Ózbekstan Respublikası Prezidentiniń 2017-jıl 7-fevral'daǵı pármanı menen tastıyıqlanǵan 2017-2021 jılları Ózbekstan Respublikasın rawajlandırıwdıń bes baslı baǵdarı boyınsha Háreketler strategiyasıda da hám hár jılı qabıl etiletuǵın mámleketlik baǵdarlamalarda korrupciyaǵa qarsı gúresiwdiń shólkemlestiriwshilik-huqıqıy mexanizimlerin jetilistiriw hám korrupciyaǵa qarsı gúresiw ilájlarınıń nátiyjeligin asırıw boyınsha anıq wazıypalar belgilengen.
Nızam menen sistemalı, mámleket hám puqaralıq jámiyetiniń birge islesiwi, korrupciyanıń aldın alıwǵa baylanıslı is-ilájlardıń baslı baǵdarları, juwapkershiliktiń ayqın belgilengenligi korrupciyaǵa qarsı gúresiwdiń tiykarǵı principleri sıpatında belgilep qoyıldı.
Korrupciyaǵa qarsı gúresiw tarawında mámleket siyasatınıń tiykarǵı baǵdarları nızamlı dárejede bekkemlendi.
Mámleketlik baǵdarlama 51 bántten ibarat is-ilájlardı qamarap alǵan. Onda korrupciyanıń sistemalı sebepleri hám shárayatlarınıń aldın alıwǵa baǵdarlanǵan 10 nızam, bir qatar nızam astı hújjetleri, is-ilájlar rejeleri joybarların islep shıǵıw hám qabıl qılıw, qatar úgit-násiyat jumısların ámelge asırıw kózde tutılǵan.
Sonday-aq, Ózbekstan Respublikası Prezidentiniń 2019-jıl 27-may kúni «Ózbekstan Respublikasında korrupciyaǵa qarsı gúresiw sistemasın jánede jetilistiriw is-ilájları haqqında»ǵı PF-5729-sanlı Pármanı menen Korrupciyaǵa qarsı gúresiw sisteması nátiyjeligin asırıw, eń joqarı dárejedegi qolay isbilermenlik ortalıǵın jaratıw, mámlekettiń xalıq aralıq maydandaǵı unamlı abıroy-itibarın arttırıw maqsetinde:-2019-2020 jıllarda korrupciyaǵa qarsı gúresiw boyınsha mámleketlik dástúr (35-bántten ibarat);
- Korrupciyaǵa qarsı gúresiw boyınsha respublikalıq mekemeler aralıq komissiya quramı;
- Korrupciyaǵa qarsı gúresiw tarawındaǵı iskerliktiń nátiyjeligin asırıwǵa qaratılǵan is-ilájlardı islep shıǵıw boyınsha arnawlı komissiya quramı tastıyıqlandı.
Sonıń menen birge Ózbekstan Respublikası Oliy Majlisiniń palatalarında korrupciyaǵa qarsı gúresiw hám sud-huqıq máseleleri boyınsha komitetler shólkemlestirildi.
Qaraqalpaqstan Respublikası Joqarǵı Keńesi, wálayatlar hám Tashkent qalası xalıq deputatları keńesleri, rayon hám qalalıq xalıq deputatları keńesleriniń quramında korrupciyaǵa qarsı gúresiw komissiyaların shólkemlestiriw usınıs etildi.
Pútkil tariyx dawamında mámleketler óz ǵárezsizligine erise almawı tek ǵana urıs maydanlarındaǵı jeńilisler ǵana emes, bálkim ámeldarlardıń satqınlıǵı, óz máplerin jámiyet máplerinen ústin qoyǵanlıǵı, yaǵnıy korrupciya hám sebep bolǵan.
Hár qanday máseleniń sheshimin para berip emes, al bara berip sheshiw-bul sol puqaranıń joqarı huqıqıy sawatı bar ekenliginen dárek beredi.
Eger jámiyetshiligimizde hár bir adam ózine júklengen wazıypalar menen minnetlemelerin tolıq hám hadal orınlap barsa, sol jerde rawajlanıw ushın jaqsı ortalıq payda bolıwı anıq. Bul óz gezeginde, isenimdi bekkemleydi.
Juwmaqlaw ornında sonı aytıwımız kerek, korrupciyaǵa qarsı gúresiw háreketiniń maqseti hám ob'ekti sıpatında ayrıqsha alınǵan korrupcioner emes, yaǵnıy jámiyetimizde usı is-háreketlerdi ámelge asırıwǵa shart-shárayat jaratıp beriwshi halatlardı saplastırıw hám profilaktikalıq aldın alıw ilájların kóriwmiz tiyis.
Demek, korrupciyaǵa qarsı gúresiw ǵárezsizligimizdi bekkemlew, watanımızdıń azatlıǵın hám abadanshılıǵın támiyinlew ushın turmıslıq zárúrlik bolıp tabıladı.
Bozataw rayonı ádillik bólimi yuridikalıq xızmet kórsetiw orayı bas yuriskonsultı T.Tańatarov.