Янгиликлар
11
Normativ-huqıqıy hújjetlerdiń gender eskpertizası
Gender-huqıqıy ekspertiza normativ-huqıqıy hújjetlerdiń hámde olardıń joybarlarınıń hayal-qızlar hám erkekler ushın teń huqıq hámde múmkinshilikler kepilliklerin támiynlew principlerine muwapıqlıǵı boyınsha analizi bolıp esaplanadı.
Ózbekistan Respublikasi Ministrler Kabinetiniń 2022-jıl 30-mart kúngi 192-sanlı qararı menen “Normativ-huqıqıy hújjetler joybarların gender-huqıqıy ekspertizadan ótkeriw tártibi haqqında”ǵı Reje tastıyıqlanǵan. Rejege muwapıq Ádillik ministrligi mápdar shólkemler menen birgelikte ózleri qabıl etken normativ-huqıqıy hújjetlerdi bir aylıq múddette usı qararǵa muwapıqlastırılıwı belgilengen.
Jınsıy kelip shıǵıwına qaramastan, shaxslardıń huqıqları, minnetlemeleri, múmkinshilikleri hám juwapkershiliklerin belgilewde júzege keliwi múmkin bolǵan teńsizliklerdi saplastırıw maqsetinde jámiyet turmısı hám iskerliginiń barlıq tarawların tártipke salıwshı normativ-huqıqıy hújjetler hám olardıń joybarları gender-huqıqıy ekspertizadan ótkeriledi.
Gender-huqıqıy ekspertiza tómendegilerge qaratılǵan.
-jınıs boyınsha hár qanday kemsitiw múmkinshiligin jaratatuǵın normativ-huqıqıy hújjettiń yamasa onıń joybarınıń gender teńlikti támiynlew principlerine muwapıq emesligin anıqlawǵa;
-jınıs boyınsha hár qanday kemsitiw múmkinshiligin jaratatuǵın normativ-huqıqıy hújjet joybarın qabıl etiw aqıbetlerin bahalawǵa;
-normativ-huqıqıy hújjetlerdi qollaw processinde júzege keliwi múmkin bolǵan kemsitiw qásiyetine iye qáwiplerdi anıqlawǵa;
-jınsı boyınsha hár qanday kemsitiwge jol qoyatuǵın hám anıqlanǵan normalardı saplastırıwǵa baǵdarlanǵan usınıslardı islep shıǵıw.
Gender-huqıqıy ekspertiza tómendegi tiykarǵı principlerdi esapqa alǵan halda ótkeriledi.
gender-huqıqıy ekspertizanı ótkeriwdiń májbúriyligi;
nızamlılıq;
xalıslıq;
komplekslik.
Gender-huqıqıy ekspertiza mámleketlik uyımları hám basqa shólkemleriniń usınıslarına tiykar islep shıǵıladı, Ózbekstan Respublikası Ádillik ministrligi tárepinen hár úsh jılda bir márte gender-huqıqıy ekspertizasın ótkeriw rejesi tastıyıqlanadı.
Mámleketlik uyımları tárepinen olar iskerligine gender teńlik priciplerine muwapıq bolmaǵan qaǵıydalar anıqlanǵan jaǵdayda usı muwapıq emeslik saplastırılıwı ushın gender-huqıqıy ekspertiza belgilengen tártipte ótkeriledi.
Normativ-huqıqıy hújjettiń yamasa onıń joybarın hayal-qızlar hám erkekler ushın teń huqıq hámde múmkinshilikler kepilliklerin támiynlew principlerine muwapıq emesligi anıqlanǵanda gender-huqıqıy ekspertiza juwmaǵı usı normativ-huqıqıy hújjetti islep shıqqan yamasa qabıl etken uyımǵa qayta kórip shıǵıw ushın jiberiledi.
Sonday-aq, “Jámiytshilik qadaǵalawı haqqında”ǵı Nızamǵa tiykar normativ-huqıqıy hújjetler hám mámleketlik uyımlarınıń basqa qararları joybarları puqaralardıń, yuridikalıq shaxslardıń huqıqları hám nızamlı máplerine, jámiyet máplerine muwapıqlıǵın anıqlaw ushın jámiyetshilik ekspertizası ótkeriledi. Jámiyetshilik ekspertizasın mámleketlik emes kommerciyalıq emes shólkemler, puqaralardıń ózin-ózi basqarıw uyımları hám ǵalaba xabar quralları nızam hújjetlerinde názerde tutılǵan jaǵdaylarda ótkeriwi múmkin.
Qaraqalpaqstan Respublikası Ádillik ministrligi
huqıqıy málimleme boyınsha
bas másláhátshisi Zebo Bazarbaeva