Янгиликлар
08
Nızamshılıqqa tiykar xalıqtıń mámleketlik xızmetlerden paydalanıw imkaniyatları keńeytirildi.
“Mámleketlik xızmetler kórsetiw infrastrukturasın jetilistiriw hám xalıqtıń mámleketlik xızmetlerden paydalanıw imkaniyatların keńeytiriw ilajları haqqında”ǵı Prezident (24.07.2021j PP-6269) Pármanı qabıl etildi.
Pármanǵa kóre, 2021-jıl 1-noyabrden:
“Sociallıq qorǵaw birden-bir reestri” málimleme sistemasında dizimge alınǵan shaxslarǵa, sonday-aq I hám II topar mayıplıǵı bolǵan shaxslarǵa mámleketlik xızmetler orayları hám (yamasa) Birden-bir interaktiv mámleketlik xızmetler portalı (BIMXP) arqalı mámleketlik xızmetlerin kórsetiwde mámleketlik bajılar, jıyımlar hám basqa hár qanday tólemler boyınsha 50 payız muǵdarında shegirme qollanıladı (isbilermenlik iskerligi maqsetlerinde yamasa yuridikalıq shaxslar wákili sıpatında múrájat etken jaǵdaylar bunnan tısqarı);
Mámleketlik xızmetler orayları, “Licenziya” málimleme sisteması hámde BIMXP arqalı kórsetilip atırǵan mámleketlik xızmetler belgilengen múddetinen 3 jumıs kúninen artıq waqıtqa keshiktirilgende, arza beriwshilerdiń múrájatlarına tiykar, xızmetten paydalanıw ushın tólengen mámleketlik bajılar, jıyımlar hám basqa hár qanday tólemlerdiń 50 payızı olarǵa 1 jumıs kúninde qaytarıladı. Bunda arza beriwshige tiyisli mámleketlik xızmet biypul kórsetiledi.
2022-jıl 1-yanvardan ayırım mámleketlik xızmetlerin (8) kórsetiwde óndiriletuǵın mámleketlik bajılar, jıyımlar hám basqa tólemler muǵdarı kemeytiriledi.
Atap aytqanda, Advokatlıq byuroların, advokatlıq hayatı hám advokatlar komissiyaların mámleket diziminen ótkeriw BEM 2 esesinen BEM 1esesine qıskartırıldı..Ózbekstan Respublikasınıń puqaralarına shet elge shıǵıw ushın biometrik pasport beriw BEM 2 esesinen BEM 1esesine qıskartırıldı.
2022-jıl 1-yanvardan mámleketlik uyımlar, xojalıq birlespeleri, jergilikli atqarıwshı hákimiyat uyımları, mámleketlik shólkemler tárepinen xalıqtan, sonıń ishinde isbilermenlerden tómendegilerdi yaǵnıy faktlerdi tastıyıqlawshı maǵlıwmatlardı talap etiw biykar etiledi::
● isbilermenlik subekti mámleketlik dizimnen ótkerilgenligi haqqındaǵı guwalıq maǵlıwmatların;
● licenziya, ruqsat etiw qásiyetine iye hújjetler hám xabarnamalar qabıl etilgenligi haqqında tastıyıqnama bar ekenligi boyınsha maǵlıwmatlardı;
● mámleketlik bajı, jıyımlar hám basqa tólemler tólengenligi haqqında maǵlıwmatlardı;
● qımbatlı qaǵazlar, qımbatlı qaǵazlar menen ámelge asırılǵan operaciyalar, dividendler alınǵanlıǵı haqqındaǵı maǵlıwmatlardı;
● kem támiyinlenen shańaraq yamasa shaǵaraq aǵzası sıpatında dizimge alınǵanlıǵı haqqındaǵı maǵlıwmatlardı;
● fizikalıq shaxslar tárepinen tólengen hám alınǵan alimentler haqqındaǵı maǵlıwmatlardı;
● joqarı maǵlıwmat haqqındaǵı diplom maǵlıwmatların;
● fizikalıq shaxs orta arnawlı, kásip-óner bilimlendiriw mákemesin tamamlanǵanlıǵı haqqında maǵlıwmatlardı;
● fizikalıq shaxs ulıwma orta bilimlendiriw (11-klass negizinde) mákemesin tamamlaǵanlıǵı haqqında maǵlıwmatlardı;
● puqara «Jaslar dápteri» yamasa «Hayallar dápteri»nde bar ekenligi haqqındaǵı maǵlıwmatlardı;
● ózin-ózi bánt etken shaxslar haqqındaǵı maǵlıwmatlardı;
● joqarı bilimlendiriw mákemelerine oqıwǵa kiriw ushın jeńillikke iye bolǵan abiturientlerdiń jeńillik huqıqın tastıyıqlawshı hújjet haqqındaǵı maǵlıwmatlardı;
● finanslıq esabatlar nusqaların;
● fizikalıq shaxslardıń aqırǵı 12 aydaǵı is xaqın tastıyıqlawshı maǵlıwmatnamalardı;
● sociallıq napaqa hám pensiyalar tólengenligi haqqındaǵı maǵlıwmatnamalardı.
Nókis qalası ádillik bolimi mámleketlik xızmetler
orayı bolim baslıǵı K.Ospanova