Янгиликлар
31
Kontrafakt ónimler degenimiz ne?
Bárshemiz kúndelik mútajliklerimiz ushın málim ónimlerdi satıp alamız. Biraq original ónim satıp alıw hám kontrafakt ónimge aldanıp qalmaw ushın nelerge itibar qaratıwımız kerek.
Birinshi náwbette kontrafakt ózi ne ekenin túsinip alsaq. Kontrafakt ónim – bul, qarıydarlardıń isenimine kirgen, bazarda óziniń ornın tapqan hám tez satılıp atırǵan ónimlerdiń tovar belgilerinen yaǵnıy brendlerinen nızamsız paydalanǵan halda islep shıǵarılǵan olardıń qálbeki nusqaları túsiniledi. Kontrafakt ónim islep shıǵarıwshı “Isbilermen” shaxslardıń tiykarǵı maqseti “Miynet qılmastan payda alıw”, bul ne degeni – yaǵnıy original brend iyesi bul tovardı tanıqlı dárejege alıp kelemen degenshe qanshadan-qansha ǵárejetler, qanshadan-qansha miynetler etip reklamalar qılǵan hám óniminiń sapalı bolıwına itibar qaratqan bolsa, al kontrafakt ónim islep shıǵarıwshılar hech qanday miynet etpesten onıń tayar brendinen paydalanadı.
Kontrafakt ónimler birinshi náwbette original ónimge salıstırǵanda arzanıraq hám sapası tómen boladı.
Qániygelerdiń pikirine kóre, hár qanday tavardı quramalılıǵına qaray qálbekilestiriw múmkin. Mısalı, spirtli ishimliklerdi qálbekilestiriw ańsat. Sebebi ónimniń tiykarǵı komponenti ápiwayı spirtten ibarat hám shiysha ıdıslardı qadaqlaw qıyınshılıq tuwdırmaydı. Keyingi basqısh texnologiya máselesi: shiysha ıdıslar kafe, barlar arqalı satıp alınadı hám markalanıp satıwǵa shıǵarıladı. Bunday ónimlerdiń bahası tómen, biraq satıwdan túsetuǵın payda joqarı boladı.
Kontrafakt ónimlerdiń jáne bir kóp ushıraytuǵın túri - bul avtomobil awısıq bólekleri sawdası esaplanadi. Kontrafakt ónim hesh qanday sawda markası hám qadaqsız alıp keliniwi múmkin. Bul ónimler jabıq cexlarda islep shıǵarılıp satıwǵa usınıladı. Biraq hár qanday kontrafakt ónim itibar menen qaralsa originalınan parıqlasa boladı.
Eń ashınarlısı kontrafakt ónimler dári-dármaqlar arasındada kóp ushırasadı. Adamlar den-sawlıǵı bolmaǵanlıǵı sebepli dawa izlep dári-dármaqlardı satıp aladı, al kontrafakt dáriler bolsa den-sawlıǵıńızdı better jamanlasıwına alıp keliwi múmkin.
Sonlıqtan kontrafakt ónimlerge qarsı gúresiwdin eń nátiyjeli usılı bul olardı satıp almaw bolıp esaplanadı. Bazarlarda kontrafakt ónimge degen talap joq bolsa, usınısta óz-ózinen toqtaydı.
Qaraqalpaqstan Respublikası Ádillik ministrliginiń
Intellektuallıq múlk huqıqların qorqaw bólimi bas máslahatshısı Nurali Esnazarov.