Янгиликлар
28
Hákimshilik islerdi kóriwde nızamshılıqqa kiritilgen ózgerisler
Mámleketimizde mámleket uyımları hám lawazımlı shaxslardıń xızmeti ústinen nátiyjeli sud baqlawın ornatıw, sonday-aq puqaralar hám isbilermenlik subektleriniń ádil sudlawǵa erisiw dárejesin asırıw, orınlawshı hákimiyat uyımlarınıń hám jergilikli hákimiyat uyımlarınıń, lawazımlı shaxslardıń Ózbekstan Respublikası Konstituciyasına hám nızamlarına muwapıq xızmet júritiwin támiyinlew barısında dawalı reformalar ámelge asırılmaqta.
«Mámleketlik uyımlar menen múnásibetlerde puqaralar hám isbilermenlik subektleri huqıqlarınıń nátiyjeli qorǵalıwın támiyinlew boyınsha qosımsha ilájlar kóriliwi múnásibeti menen Ózbekstan Respublikasınıń ayırım nızam hújjetlerine ózgeris hám qosımshalar kiritiw haqqında»ǵı Ózbekstan Respublikasınıń
2023-jıl 26-aprel kúngi 833-sanlı Nızamı qabıllandı.
Nızam menen Ózbekstan Respublikası Hákimshilik sud islerin júritiw haqqındaǵı kodeksine hám basqada nızam hújjetlerine ózgeris hám qosımshalar kirgizildi.
Atap aytqanda, sudqa tiyislilik qaydaların buzǵan halda hákimshilik sudına berilgen bolsa, arza (shaǵım) tiyisligi boyınsha puqaralıq isleri boyınsha sudqa yaki ekonomikalıq sudqa kórib shıǵıw ushın ótkeriledi.
Eger arza (shaǵım) sudqa tiyislilik qaydaların buzǵan halda is júritiwge qabıl etilgenligi isti kórip atırǵan waqıtta anıqlansa, hákimshilik sud is materialdı sudqa tiyisligi boyınsha puqaralıq isleri boyınsha sudqa yaki ekonomikalıq sudǵa kórib shıǵıw ushın ótkeridi hám hákimshilik isti is júritiwden tamamlaw haqqında uyǵarıw shıǵaradı.
Bunnan tısqarı, basqa sudtan tiyisliligi boyınsha kelip túsken arza (shaǵım)da kemshilikler bolsa onı da arza iyesine qaytarmastan, usı kemshiliklerdi saplastırıw ushın arza beriwshige on kúnge shekem múddet beriledi, arza iyesi bul múddette kemshilikti saplastırmaǵan jaǵdayda ǵana arza (shaǵım) iyesine qaytarıladı. Eger kemshilik saplastırılsa, is júritiwge qabıl etiledi.
Nızamlarǵa kirgizilgen ózgerisler puqaralarǵa hám isbilermenlik subektlerine hákimshilik sudlarǵa múrájáát etiwde jeńillikler payda etedi hám hákimshilik sudlar tárepinen olardıń buzılǵan huqıqların tiklewde oǵada áhemiyetke iye.
Bul bolsa xalıqtıń sudqa bolǵan isenimin bekkemlewge, sudlardıń islerdi kóriw nátiyjeliligin asırıwǵa xızmet etedi.
B.Dosımbetov
Nókis rayonlar aralıq hákimshilik sudı baslıǵı