Янгиликлар
25
Úy –jay satıp alıw ushın puqaralarǵa subsidiya tólew tártibi
Subsidiya – ipoteka kreditleri tiykarında úy-jay satıp alıw ushın baslanǵısh tólem hám kredit payızınıń bir bólegin yaki jeke tártiptegi úy-jaylardı qurıw hám rekonstrukciya qılıw ushın kredit payızınıń bir bólegin qaplaw maqsetinde Mámleket byudjetinen puqara ushın bankte onıń atına ashılǵan tiyisli esap betine ótkerilgen qarjı.
Ipoteka kreditine Mámleketlik subsidiyasın alıwǵa arza beriw.
Arza beriwshi-ipoteka kreditleri boyınsha baslanǵısh tólem hám payız qárejetleriniń bir bólegin qaplaw ushın subsidiya alıw maqsetinde arza menen múrájat etiwshi 18 jastan 60 jasqa shekemgi Ózbekstan Respublikası puqarası.
Daramatı joqarı bolmaǵan puqara yaki shańaraq-nızamshılıq hújjetlerine muwapıq anıqlanıwı múmkin bolǵan ortasha aylıq daramatlar muǵdarı Qaraqalpaqstan Respublikası hám walayatlarda belgilengen miynetke haqı tólewdiń eń kem muǵdarınıń 2,7 esesinen 8 esesine shekem hám Tashkent qalasında belgilengen miynetke haqı tólewdiń eń kem muǵdarınıń 2,7 esesinen 9,2 esesine shekem bolǵan shańaraqlar.
Subsidiya alıw ushın arza beriw tártibi
Arza beriwshi ipoteka kreditleri boyınsha subsidiya alıw ushın qálegen rayon (qala) mámleketlik xızmetler orayına ózi kelip múrájat etedi yaki Birden-bir interaktiv mámleketlik xızmetler portalında mámleketlik xızmetinen elektron tárizde paydalanıw ushın dizimnen ótedi.
Ózi kelip múrájat etkende, Mámleketlik xızmetler orayı qánigesi arza beriwshi atınan mámleketlik xızmetten paydalanıw ushın anketa-arzanı elektron tárizde toltıradı.
Zárúr hallarda arza beriwshiniń ayrıqsha úlgi kórsetip atırǵan jas shańaraqlar qatarına kiriwin tastıyıqlawshı hújjetler Jaslar isleri agentliginiń rayon (qala) bólimlerine tapsırıladı.
Arza beriwshiden joqarıda kórsetilmegen maǵlıwmat hám hújjetlerdi hámde anketa-arzada kórsetilgen maǵlıwmatlardan tısqarı basqa hújjetlerdi talap etiw qadaǵan etiledi.
2023-jıl ushın ipoteka kreditler boyınsha subsidiyalar ajratıwǵa baylanıslı arzalar tastıyıqlanǵan parametrler tiykarında 2023-jıl 1-maydan 2023-jıl 1-dekabrge shekem qabıl etiledi.
Arza berilgennen soń tiyisli mekemeler 10 jumıs kúni ishinde arza beriwshiniń sociallıq kriteriyalarǵa muwapıqlıǵın usınılǵan hújjetler tiykarında mekemelerde bar maǵlıwmatlar bazası menen salıstırǵan halda úyrenip shıǵadı hám tiyisli mekemeler ózine tiyisli juwmaqların usınadı.
Komissiya xatkeri tiyisli mekemeler tárepinen berilgen juwmaqlardı 3 jumıs kúni ishinde arzalardı náwbet penen olardıń izbe-izligine muwapıq kórip shıǵıp, sońǵı juwmaqtı beredi.
Komissiya baslıǵı xatker tárepinen kirgizilgen sociallıq kriteriyalar boyınsha bahalaw nátiyjelerine tiykar arza beriwshige ipoteka kreditleri boyınsha subsidiya beriw yaki beriwdi biykar etiwdi elektron kóriniste tastıyıqlaydı.
Sociallıq kriteriyalar tiykarında bahalanǵan arza beriwshi 30 hám onnan joqarı ball toplaǵan jaǵdayda, talapker sıpatında tán alınıp, úy-jay satıp alıw yaki jeke tártiptegi úy-jaylardı qurıw hám rekonstrukciya qılıw ushın ipoteka krediti boyınsha subsidiya alıwǵa haqılı dep esaplanadı.
Kórip shıǵıw nátiyjeleri boyınsha subsidiya beriw yaki beriwdi biykar etiw haqqındaǵı elektron tastıyıqlanǵan QR-kod (matrik shtrixli kod) qoyılǵan qarar tiyisli rayon (qala) Mámleketlik xızmetler orayına jiberiledi.
Birden-bir interaktiv mámleketlik xızmetler portalı arqalı múrájat etkende arza beriwshige «SMS» xabar jiberiledi.
Úy-jay satıp alıw ushın dáslepki tólem hám payız tólemleriniń bir bólegin tólew menen baylanıslı qárejetlerdi qaplaw ushın dáslepki tólem ushın 32 million swm muǵdarında subsidiya ajratıladı hám payız tólemleriniń bir bólegin tólew menen baylanıslı qárejetlerdi qaplaw ushın subsidiya ipoteka kreditiniń eń kóp muǵdarınan aspaǵan ipoteka kreditleri boyınsha tólep beriledi.
Subsidiya ajratıw haqqındaǵı xabarnama berilgen waqıttan baslap 4 ay dawamında ámel etedi.
Kegeyli rayonı Ádillik bólimi,
Mámleketlik xızmetler orayı bólim baslıǵı S.Otegenov