Янгиликлар
25
Mámleketlik xızmetlerdi kórsetiwdegi qolaylıqlar
Mámleketimizde puqaralar hám isbilermenlik sub'ektlerine mámleketlik xızmetlerdi kórsetiw sisteması basqıshpa-basqısh jetilistirilip kelinbekte. Tiykarınan tarawda alıp barılıp atırǵan jetiskenlikler nátiyjesinde 70 ten zıyat mámleketlik xızmetler ápiwayılastırıldı hám mámleketlik xızmetler orayları tárepinen qamtıp alınǵan xızmetlerdi kórsetiw múddeti hám talap etiletuǵın hújjetler sanı eki esege qısqartırıldı.
Ózbekstan Respublikası Prezidentiniń 2021-jıl 24-iyul' kúngi Mámlektlik xızmetlerdi kórsetiw infradúzilmesin jetilistiriw hám halıqtıń mámleketlik xızmetlerden paydalanıw imkaniyatların keńeytiw is-ilájları haqqında 6269-sanlı Pármanına tiykar:
Sociallıq qorǵaw birden bir reestr málimleme sistemasında dizimge alınǵan shaxslarǵa, sonday aq, I-II-topar nágiranlıǵı bolǵan shaxslarǵa mamleketlik xızmetler orayları hám (yaki) Birden-bir interaktiv mámleketlik xızmetler portalı arqalı mámleketlik xızmetlerdi kórsetiwde nızamshılıq hújjetlerinde belgilengen mámleketlik bajılar, jıyımlar hám basqa hár qanday tólewler boyınsha 50 payız muǵdarında shegirme qollanıladı. Bunday imtiyaz isbilermenlik iskerligi maqsetlerinde yaki yuridik shaxslar wákili sıpatında múrájat etilgen jaǵdaylarda ámel etilmeydi.
Sonday aq, Mámleketlik xızmetler orayları, “Licenziya” málimleme sisteması hám de Birden-bir interaktiv mámleketlik xızmetler portalı arkalı kórsetilip atırǵan mámleketlik xızmetleri nızamshılıq hújjetlerinde belgilengen múddetinen úsh is kúninen artıq waqıtqa keshiktirilgen jaǵdaylarda arza beriwshilerdiń múrájatlarına tiykar, xızmetten paydalanǵanı ushın tólengen mámleketlik bajıları, jıyımlar hám basqa hár qanday tólewlerdiń 50 payızı olarǵa bir is kúninde qaytarıladı. Bunda:
Arza beriwshige tólemler Mámleketlik xızmetler agentliginiń byudjetten tısqarı xorı qárejetleri esabınan qaytarıladı hám Mámleketlik xızmetler agentligi tárepinen mámleketlik xızmeti kórsetiw múddetin keshiktirgen mámleketlik organı hám shólkeminiń byudjetten tısqarı hám basqa qárejetleri esabınan sózsiz(akceptsiz) tártipte óndirip alınadı. Arza beriwshige tiyisli mámleketlik xızmet tolıǵı menen kórsetiledi.
Sonıń menen birge 2022-jıl 1-yanvardan Advokatlıq byuroların, advokatlıq firmalardı hám advokatlar hay'atların mámlektlik dizimnen ótkeriw BEM 2 esesinen BEM 1 esesine kemeytiriledi. Ózbekstan Respublikasınıń puqaralarına shet elge shıǵıw ushın biometrik pasport beriw BEMınıń 1,2 esesinen BEM 1 esesine, isbilermenlik sub'ektlerine mámleketlik dizimnen ótkerilgenligi haqqında jańa úlgidegi guwalıq beriw BEM 1 esesinen BEM 20 payızǵa kemeytirildi.
2021-jıl 1-dekabrden baslap, shet elde turaqlı jasawshı Ózbekstan Respublikası puqaraları, sonday aq, shet ellik yuridikalıq hám fizikalıq shaxslar hám de puqaralıǵı bolmaǵan shaxslarǵa elektron sanlı qol tańbalarınıń sertifikatların Ózbekstan Respublikasınıń diplomatik wákilxanaları hám konsullıq mekemeler tárepinen beriw arqalı elektron mámleketlik xızmetler kórsetiw imkaniyatları jaratıladı.
Ózbekstan Respublikasında turaqlı jasamaytuǵın shet el puqaraları hám puqaralıǵı bolmaǵan shaxslarǵa fizikalıq shaxstıń shaxsıy identifikaciya nomerin ápiwayılastırılǵan tártipte qala rayon migraciya hám puqaralıqtı rásmiylestiriw bólimlerinde hám de mámlektlik xızmetler oraylarında ámelge asırılıwı hám de 2022-jıl 1-yanvardan baslap, Ózbekstan Respublikası puqarası, Ózbekstan Respublikasında turaqlı jasawshı shet el puqarası, puqaralıǵı bolmaǵan shaxslarǵa ID-kartasın beriwdi hám de Ózbekstan Respublikası puqarasına shet elge shıǵıwǵa biometrik pasport rásmiylestiriw hám beriw mámleketlik xızmetler orayları arqalı ámelge asrılıwı nazerde tutılǵan.
Eń tiykarǵısı, xalqımız mámleketlik xızmetlerdi kórsetiwdegi bunday jeńillikler hám qolaylıqlar jaratılıp atırǵanlıǵın kórip, qabıl etilip atırǵan qarar hám pármanlardıń eń birinshi insan mápi ushın ekenligininiń gúwası bolmaqta.
Taqıyatas rayonı ádillik bólimi Mámleketlik
xızmetler orayı direktorı
Z.Djumabaev