Янгиликлар
29
Nızamshılıqtaǵı jańalıqlar
Baqshalardaǵı joqarı maǵlıwmatlı táprbiyashılar aylıǵı oqıtıwshılar aylıǵına teńlestiriledi
“Mektepke shekemgi hám mektep bilimlendiriwi ministrligi hámde onıń sistemasındaǵı shólkemler jumısların nátiyjeli shólkemlestiriw ilajları haqqında”ǵı Prezident pármanı (PP–79-san, 26.05.2023-j.) qabıl etildi
Pármanǵa kóre, 2023/2024-oqıw jılınan basqıshpa-basqısh:
-mekteplerdiń 1–4-klasslarında oqıwshılarǵa baslanǵısh, 5–9-klasslarında tayanısh hámde 10–11-klass oqıwshılarınıń qızıǵıw hám qábiletine say oqıw dástúrleri hám oqıw-metodikalıq qollanbalar jıyındılar engiziledi;
-bahalawdıń jańa tártibi engiziledi. Bunda oqıwshınıń ótilgen temanı ámeliyatta qollay alıwı, kritikalıq pikirlew hám analiz kónikpeleri bahalanadı;
-baslanǵısh klasslarda informatika, orta klasslarda bolsa finanslıq sawatlılıq sabaqları ótiledi;
-barlıq pánler boyınsha ámeliy shınıǵıwlar úlesi 60 procentke jetkeriledi.
2024-jıl 1-yanvardan mektepke birinshi márte jumısqa qabıl etilip atırǵan oqıtıwshılardı kásiplik sertifikatlaw engiziledi.
Bunda 2023/2024-oqıw jılınan oqıtıwshılar stajyor-oqıtıwshı sıpatında isleydi hám 1 jılda sertifikat alıwı talap etiledi.
2024-jıl 1-yanvardan mámleketlik baqsha, mektep hám mektepten tısqarı bilimlendiriw shólkemleri pedagoglarına mamanlıq taypasın beriwdiń jańa tártibi engiziledi.
Bunda mamanlıq taypası ushın sınawlar 1 jılda keminde bir mártebe eki basqıshta ótkeriledi hámde birinshi basqıshda talapkerdiń qánigelik páni hám kásip standartı boyınsha bilim dárejesi, ekinshi basqıshta – pedagogikalıq sheberligi bahalanadı.
2024-jıl 1-iyunnen baqshalardaǵı joqarı maǵlıwmatlı tárbiyashılardıń aylıǵı mektep oqıtıwshıları aylıǵına teńlestiriledi.
Pármanǵa (https://t.me/huqiqiymalimleme/7379) kóre, 2023-jıl 1-sentyabrden:
-mektep direktorına óz orınbasarların jumısqa qabıl etiw hám jumıstan bosatıw, ajıratılǵan ulıwma saatlar sheńberinde oqıw rejelerine 15 procentke shekem ózgertiw kirgiziw máselelerin ǵárezsiz sheshiw huqıqı beriledi;
-rayon (qala) mektepke shekemgi hám mektep bilimlendiriwi bólimleriniń mektep jumısların tekseriw hám bilimlendiriw sapasın bahalaw boyınsha wákillikleri biykar etiledi;
-aymaqlarda eń tájiriybeli mektep direktorlarınan ibarat Direktorlar keńesleri dúziledi;
-mektep direktorları Direktorlar keńesi usınısına tiykar aymaqlıq basqarmalar tárepinen ashıq tańlaw tiykarında lawazımǵa tayarlanadı.
2024-jıl 1-yanvardan mektep direktorların hár 5 jılda bir mártebe kásiplik sertifikaciyalaw sisteması engiziledi.
Bunda, sertifikaciyadan óte almaǵan direktorlar belgilengen tártipte lawazımınan azat etiledi.
Pármanǵa muwapıq, tómendegiler biykar etiledi:
ruwxıy-aǵartıwshılıq jumıslar boyınsha direktor orınbasarların lawazımǵa tayınlawda rayon (qala) ruwxıy-aǵartıwshılıq orayı tárepinen usınıs beriw ámeliyatı;
fizikalıq tárbiya páni oqıtıwshıların jumısqa qabıl etiwde sport tarawındaǵı wákillikli mámleketlik uyımınıń aymaqlıq bólimleri hámde sport mektepleri metodistleri tárepinen jollama beriw tártibi.
2024-jıl 1-yanvardan:
-bala tuwılǵanınan soń, turaqlı jasaw mánzilindegi aymaqqa biriktirilgen mektepte onlayn esapqa qoyıladı;
-mekteplerdiń hár oqıw jılı ushın qabıllaw rejesi my.maktab.uz elektron platformasında qáliplestiriledi.
Sonday-aq, 2023/2024-oqıw jılınan “Sırdárya tájiriybesi” tiykarında hár bir aymaqta bir zamanagóy “Barkamal áwlad” balalar mektepleri shólkemlestiriledi.
Qaraόzek rayonı ádillik bόlimi baslıǵı A.Otarbaev