Янгиликлар
23
Mayıplıǵı bolǵan balalarǵa qaraǵanlıǵı ushın napaqa kimlerge tayınlanadı
Fizikalıq yaki intellektual kemshilikleri sebepli turmıs iskerligi sheklengenligi múnásibeti menen sociyallıq járdemge hám qorǵawǵa mútáj bolǵan shaxs mayıp esaplanadı. Shaxstıń turmıs iskerligi sheklengenligi onıń óz-ózine xızmet qılıw, júriw, joldı taba alıw, qatnasıq qılıw, óz is-háreketin baqlaw, sonday-aq miynet iskerligi menen shuǵıllanıw qábileti yaki imkániyatınıń tolıq yamasa belgili bir bólegin joǵaltqanlıǵında sáwlelenedi.
Usıǵan kóre, nágiranlıǵı bolǵan shaxslar, ásirese, turaqlı kútimge mútáj bolǵan balalarǵa qarap atırǵan shańaraqlardı mámleket tárepinen sociyallıq qollap-quwatlaw sistemasın jánede qáliplestiriw, sociyallıq járdemniń zamanagóy mexanizmlerin ámelge asırıwda jańa sistemalardı engiziw maqsetinde Ózbekstan Respublikası Prezidentiniń 2022-jıldıń 17-fevral kúni “Nágiranlıǵı bolǵan shaxslardı hámde xalıqtıń sociyallıq qorǵawǵa mútáj qatlamların qollap-quwatlawdıń qosımsha is-ilájları haqqında”ǵı 74-sanlı Pármanı qabıl qılınǵan edi.
Párman menen ózgeler kútimine mútáj nágiranlıǵı bolǵan 18 jasqa shekemgi balaları hám shaxstıń immunitet tansıqlıǵı virusın keltirip shıǵaratuǵın kesellikke jolıqqan 18 jasqa shekemgi balaları bolǵan shańaraqlarǵa hár ayda 500 mıń swm (Ózb.Res. Prezidentiniń 2023-jıl 28-mart kúngi PP-45-sanlı pármanı menen 535 mıń swmǵa asırıldı) muǵdarında jańa túrdegi napaqa engizildi hám usı Pármanǵa tiykar, Ózbekstan Respublikası Ministrler Kabinetiniń 2023-jıl 23-mart kúni “Sociyallıq qorǵawǵa mútáj ayırım taypadaǵı shaxslarǵa napaqa hám qosımsha tólemlerdi tayınlaw hám tólew tártibi haqqındaǵı rejelerdi tastıyıqlaw hám usı tarawǵa zamanagóy axborot texnologiyaların keńnen engiziw arqalı mámleketlik xızmetı sapasın asırıwǵa tiyisli qosımsha is-ilájlar haqqında”ǵı 119-sanlı qararı qabıl etildi.
Usı qarar menen tastıyıqlanǵan “Sociyallıq qorǵawǵa mútáj bolǵan ayırım taypadaǵı shaxslarǵa napaqa tayınlaw hám tólew tártibi haqqında”ǵı Rejeniń 21-bántinde, nágiranlıǵı bolǵan 18 jasqa shekemgi balalarǵa napaqa hámde olarǵa qaraǵanlıǵı ushın napaqa Kámbaǵallıqtı qısqarttırıw hám bántlik ministrligi tárepinen wákillikli organnıń “Pensiya” axborot sistemasına jiberilgen elektron maǵlıwmatlar tiykarında “proaktiv forma”da tayınlanadı. Bunda, usı Rejeniń 4-qosımshasına muwapıq ózgeler kútimine mútáj nágiranlıǵı bolǵan 18 jasqa shekemgi bolǵan balaǵa hám (yaki) onıń nızamlı wákiline “proaktiv forma” da napaqanı tayınlaw boyınsha mámleketlik xızmetin kórsetiw sxemasına tiykar tómendegi basqıshlarda ámelge asırıladı.
Birinshi basqısh. Kámbaǵallıqtı qısqarttırıw hám bántlik ministrligi ózgeler kútimine mútáj nágiranlıǵı bolǵan 18 jasqa shekemgi bolǵan balanıń nızamlı wákili haqqındaǵı maǵlıwmatlardı nágiranlıq belgilengennen soń 5 minut ishinde Ekonomika hám qarjı ministrligi janındaǵı byudjetten tısqarı Pensiya qorı bólimine jiberedi.
Ekinshi basqısh. Ekonomika hám qarjı ministrligi janındaǵı byudjetten tısqarı Pensiya qorı bólimi maǵlıwmatlar alınǵannan soń 5 minut ishinde nızamlı wákildi ózgeler kútimine mútáj nágiranlıǵı bolǵan 18 jasqa shekemgi bolǵan bala ortasındaǵı tuwısqanshılıq qatnasıqların úyreniw ushın Ádillik ministrligine soraw jiberedi.
Úshinshi basqısh. Ádillik ministrligi soraw kelip túskennen soń 5 minut ishinde nızamlı wákildi ózgeler kútimine mútáj nágiranlıǵı bolǵan 18 jasqa shekemgi bolǵan bala menen tuwısqanshılıq baylanısları haqqında maǵlıwmatlardı wákillikli organǵa jiberedi.
Tórtinshi basqısh. Ekonomika hám qarjı ministrligi janındaǵı byudjetten tısqarı Pensiya qorı bólimi maǵlıwmatlar alınǵannan soń 5 minut ishinde kelip túsken maǵlıwmatlarǵa tiykar napaqa tayınlaw yaki onı tayınlawdan bas tartıw haqqında qarar qabıl etedi hám 5 minut ishinde, napaqa tayınlanǵanlıǵı yaki onı tayınlawdan bas tartılǵanlıq sebepleri, napaqa tayınlanǵan múddet, napaqa muǵdarı, napaqanı qashan hám qay jerden alıw haqqında nızamlı wákilge SMS-xabar jiberedi.
Taxtakópir rayonı ádillik bólimi
Insan huqıqların qorǵaw hám
huqıqtı qollaw ámeliyatın úyreniw
bólimshesi bas máslahatshisi B.Q.Qaypbergen