Янгиликлар
22
Orındaslıq tiykarında hámde bir neshe kásipte hám lawazımda islew tártibi qanday?
Kópshilik puqaralar hám kadrlar xızmetinde islewshi xızmetkerler tárepinen orındaslıq tiykarında hámde bir neshe kásipte hám lawazımda islew tártibi hám olardıń ayırmashılıqları, parqı haqqında túsinikke iye bolmawı mumkin.
Sonlıqtan usılar haqqında keń túrde túsintirip ótiwge xáreket etip kóremiz. Demek bul jaǵdaylar Ózbekstan Respublikası Miynet kodeksiniń 432-442 statyaları hám Ózbekstan Respublikası Ministrler Kabinetiniń 2012 jıl 18 oktyabr kungi «Orındaslıq tiykarında hámde bir neshe kásipte hám lawazımda islew tártibi haqqındaǵı rejeni tastıyıqlaw haqqında»ǵı 297-sanlı qararı menen tártipke salınadı.
Usı qarar menen «Orındaslıq tiykarında hámde bir neshe kásipte hám lawazımda islew tártibi haqqında»ǵı Reje tastıyıqlanǵan bolıp, usı reje múlkshiliktiń barlıq túrlerindegi kárxáná, mekeme hám shólkemlerde miynet shártnamasına muwapıq orındaslıq tiykarında hámde bir neshe kásipte hám lawazımda islewshi fizikalıq shaxslar – Ózbekstan Respublikası puqaraları, sonday-aq shet el puqaraları hám puqaralıǵı bolmaǵan shaxslardıń miynet qatnasıqların tártipke salıw qaǵıydaların belgileydi.
Endi ámeliyatta xalıq arasında tiykarǵı hám orındaslıq yaki saatbay degen terminler kóp qollanıladı. Rejede usı terminlerdiń huqıqıy mazmun-mánisi kórsetip berilgen:
tiykarǵı jumıs ornı — bul Ózbekstan Respublikası Jańa Miynet kodeksiniń 432-statyasına muwapıq yaǵnıy usı jumıs tolıq tolıq yaki tolıqsız jumıs waqtı shártleri tiykarında atqarılıwına qaramastan is beriwshi tárepinen xızmetkerdiń miynet dáptershesi juritiletuǵın shólkem túsiniledi.
orındaslıq tiykarında islew — bul xızmetkerdiń óziniń tiykarǵı jumısın atqarıwdan tısqarı tiykarǵı jumısınan bos waqtında miynet shártnaması tiykarında turaqlı túrde basqa is haqı tólenetuǵın jumıstı atqarıw túsiniledi. Orındaslıq tiykarındaǵı jumıs xızmetker tárepinen óziniń tiykarǵı jumıs ornında (ishki orındaslıq) yaki basqa is beriwshide (sırtqı orındaslıq) atqarılıwı mumkin.
On segiz jasqa shekemgi bolǵan shaxslardıń qolaysız miynet sharayatlarında orındaslıq tiykarında islewge, eger orındastıń tiykarǵı isi tap sonday sharayatlar menen baylanıslı bolsa (bunnan den-sawlıqtı saqlaw sisteması shólkemleri xızmetkerleri kirmeydi) hám nızamshılıqta názerde tutılǵan basqa jaǵdaylarda jol qoyılmaydı.
Orındaslıq tiykarında jumısqa qabıl etiw miynet shártnaması tiykarında ámelge asırıladı hám is beriwshiniń buyrıǵı menen rásmiylestiriledi. Orındaslıq tiykarında islew haqqındaǵı miynet shártnamaları, eger bul nızamshılıqqa qarsı bolmasa, bir yaki bir neshe is beriwshi menen dúziliwi mumkin. Orındaslıq tiykarında islew haqqındaǵı dúzilgen miynet shártnamasında jumıs orındaslıq tiykarında atqarılıp atırǵanlıǵı kórsetiliwi shárt.
Xızmetker tárepinen miynet shártnamasında kórsetilgen óziniń tiykarǵı jumısı menen bir qatarda tap usı shólkemde tiykarǵı kásip hám lawazım boyınsha nızamshılıqta belgilengen jumıs waqtı dawamında (ishinde) basqa kásip hám lawazımdaǵı qosımsha jumıstı atqarıwı bir neshe kásipte hám lawazımda islew esaplanadı.
Xızmetker tárepinen miynet shártnamasında kórsetilgen óziniń tiykarǵı jumısı menen bir qatarda tap usı shólkemde tiykarǵı kásip hám lawazım boyınsha nızamshılıqta belgilengen jumıs waqtı dawamında (ishinde) sol kásip hám lawazımdaǵı qosımsha jumıstı atqarıwı xızmet kórsetiw sheńberin keńeytiriw, jumıslar kólemin kóbeytiriw esaplanadı.
Bir neshe kásipte hám lawazımda islewge, xızmet kórsetiw sheńberin keńeytiwge, jumıslar kólemin kóbeytiwge sonday kásip hám lawazım boyınsha bos jumıs ornı bar bolǵanda yaki nızamshılıqta názerde tutılǵan jaǵdaylarda xızmetker tárepinen waqtınsha joq bolǵan xızmetkerdiń wazıypaların atqarıwǵa jol qoyıladı.
Kegeyli rayonı Ádillik bólimi
Yuridikalıq xızmet kórsetiw orayı
bas yuriskonsultı S.Bazarbaev