Янгиликлар
24
Sud hákimiyatı ǵarezsizliginiń konstituciyalıq tiykarları
Ózbekstan Respublikası Konstituciyasınıń mámleketimiz keleshegi, jámiyetimizdiń rawajlanıwı hámde insan huqıq hám erkinliklerin támiynlewdegi áhmiyeti oǵada kúshli. Konstituciyada bekkemlep qoyılǵan insan huqıqları hám erkinliklerin támiynlewde, jámiyette nızamlılıq hám sud hákimiyatınıń haqıyqıy ǵarezsizligin támiynlewde óz aldına orın tutadı.
Ózbekstan Respublikası Konstituciyasınıń 136-statyasında sudyalar ǵarezsiz ekenligi, tek ǵana Konstituciya hám nızamǵa boysınıwı, sudyalardıń ádil sudlawdı ámelge asırıw baǵdarındaǵı jumısına qandayda bir tárizde aralasıwǵa jol qoyılmaslıǵı hám bunday aralasıw nızamǵa muwapıq juwapkershilikke sebep bolıwı sıyaqlı áhmiyetli normalar bekkemlep qoyılǵan.
Sonı atap ótiw kerek, sudyalardıń ǵarezsiz hám tek ǵana nızamǵa boysınǵan halda jumıs alıp barıwınıń konstituciya dárejesinde kepilleniwiniń tiykarǵı sebeplerinen biri – sud hákimiyatına basqa hesh qaysı uyım wákilligine tiyisli bolmaǵan huqıq - ádil sudlawdı ámelge asırıw huqıqı berilgenligi menen tiykarlanadı. Sebebi, mámleketimiz turmısında, puqaralarımızdıń huqıq hám erkinliklerin tolıq támiynlenwine erisiwde ádil sudlawdıń áhmiyeti girewli. Ádil sudlaw jámiyet turmısında, jámiyet aǵzalarınıń huqıqıy mádeniyatı ва huqıqıy sanasın jetilistiriwde, insanlardı nızamlarǵa húrmet ruwxında tárbiyalawda úlken áhmiyetli orın tutadı.
Mámleketimiz ǵarezsizliginiń dáslepki jıllarında Konstituciyada názerde tutılǵan sudyalardıń ǵarezsizligi hám tek ǵana nızamǵa boysınıwı principin ámelge asırıwǵa qaratılǵan qatar nızamlarımız qabıl qılındı.
Atap aytqanda Ózbekstan Respublikası Prezidenti SH.M.Mirziyoyev tárepinen 2016-jıldıń 21-oktyabr kúni járiyalanǵan PF-4850-sanlı “Sud-huqıq sistemasın jánede reformalaw, puqaralardıń huqıq hám erkinliklerin isenimli qorǵaw kepilliklerin kúsheyttiriw is-ilájları haqqında”ǵı Pármanı sudyalardıń ǵarezsizligi hám tek ǵana nızamǵa boysınıwına baylanıslı konstituciyalıq normanı ámelde tolıq júzege shıǵıwına imkániyat jarattı.
“Ózbekstan Respublikası Sudyalar joqarı keńesi haqqında”ǵı nızamda usı dúzilmeniń iskerligine baylanıslı máseleler tolıq qamrap alındı. Usı Keńes konstituciyalıq statusqa iye boldı.
Konstituciyasınıń 136-statyasına kóre, Ózbekstan Respublikası Sudyalar joqarı keńesi sudyalar jámiyetshiliginiń ǵarezsiz uyımı bolıp, ol Ózbekstan Respublikasında sud hákimiyatınıń ǵarezsizligi konstituciyalıq principine ámel etiliwin támiynlewge kómeklesiwi belgilep berildi.
Juwmaqlastırıp aytqanda, jámiyette sud uyımlarınıń abıroyın asırıw, sudyalardıń haqıqıy ǵarezsizligin hám tek ǵana nızamlarǵa tiykarlanıp jumıs alıp barıwın támiynlew mámleketimiz konstituciyası hám usı tiykarında qabıl etilip atırǵan nızamlar áhmiyetli orın tutadı. Sebebi, sud hákimiyatınıń haqıqıy ǵarezsizligin támiynlew huqıqıy demokratiyalıq mámleket hám kúshli puqaralıq jámiyetin qurıwdaǵı áhmiyetli shártlerden biri esaplanadı.
Shımbay rayonı ádillik bólimi
Yuridikalıq xızmet kórsetiw
orayı bas yuriskonsultı D.T.Yerjanov