Янгиликлар
15
Mámleketlik xızmetlerden paydalanıw tártibi
Mámleketimizde puqaralarģa hám yuridikalıq shaxslarģa mámleketlik xızmetlerdi kórsetiw sistemasi rawajlandırılmaqta hám modernizaciya qılınbaqta, bul xalqtıń jasaw jaģdayın, investiciya ortalıģın jaqsılaw, biznesti rawajlandırıw imkánin bermekte.
2016-jıl 1-yanvar kúninen baslap rayon (qala) hákimlikleri janındaģı isbilermenlik subyektlerin dizimge alıw inspeksiyaları negizinde Isbilermenlik subyektlerine “bir ayna” prinsipinde mámleketlik xızmetlerin kórsetiw birden-bir orayları” shólkemlestirilgen.
2017-jıl 1-fevral kúni Birden-bir oraylardıń rayon (qala) hákimlikler sistemasınan Ózbekstan Respublikası Ádillik ministrligi basqarıwına ótkeriliwi bul tarawdı rawajlandırıw boyınsha úlken ózgeris boldı. Ózgeris na’tiyjesinde vertikal basqarıw shólkemlestirildi, nátiyjeli iskerlik kórsetiwdi támiyinlew imkaniyatı júzege keltirildi.
2017-jıl 12-dekabr kúni Ózbekstan Respublikasi Prezidentiniń PF-5278-sanlı “Xalıqqa mámleket xızmetlerin kórsetiwdiń milliy sistemasın túpkilli reformalaw is-ilajları” haqqındaģı Pármanı járiyalanıwı menen fizikalıq hám yuridikalıq shaxslarģa mámleketlik xızmet kórsetiw sapası joqarı dárejege ósiwin támiyinlep kelmekte. Bunda “xalıq mámleket organlarına emes, mámleket organları xalıqımızģa xızmet xızmet qılıwı lazım” degen ideya basshılıqqa alınģan.
Sońģı jılları mámleketlik xizmetlerdi kórsetiw tarawında reformalar ámelge asırılıp puqaralarģa kóp ģana múmkinshilikler jaratılmaqta. Atap aytqanda, birden bir interaktiv mámleketlik xızmetleri portalı arqalı puqaralarģa onlayn xizmet kórsetiw jolģa qoyılģan.
Birden bir portal arqalı interaktiv mámleketlik xızmetlerin kórsetiw "Ózbekstan Respublikası Birden bir interaktiv mámleketlik xızmetleri portalı haqqında"ģı dizimge muwapıq dizim alıw hàm avtorizaciya qılıw processlerinen ótken puqaralar ushın ámelge asırıladı.
Paydalanıwshılarģa mámleket organlarına tuwrıdan-tuwrı muráját etiw, paydalanıwshılar menen mámleket organları menen birge islesiwi nátiyjeligin asırıw, mámleket organlarına muráját qılģanda paydalanıwshılar ushın byurakratik tosıqlardı qısqartıw hám olardı saplastırıw maqsetinde Ózbekstan Respublikası Birden-bir interaktiv mámleket xızmetleri portalı shólkemlestirilgen hám házirgi kúnde de óz iskerligin dawam ettirmekte.
2023-jıl 01-mart kúninen baslap málimleme qawipsizligi talaplarına ámel etken jaǵıdayda, múlkshilik formasına qaramastan, barlıq yuridikalıq shaxslarǵa Birden-bir interaktiv mámleketlik xızmetleri portalı arqalı kommerciyalıq xızmetlerin kórsetiwge ruxsat berildi. Bul ilaj Ózbekstan Respublikası Prezidentiniń 2022-jıl 09-noyabr kungi “Isbilermenlik iskerligin mámleket tárepinen tártipke salıwdı ápiwáyilastırıw is-ilajlari haqqında”ǵı PF-244-sanlı parmanına muwapıq ámelge asırıldı.
2023-jıl basınan házirgi kúnlerge shekem puqaralarģa Birden-bir interaktiv mámleketlik xızmetleri portalı arqalı 4,5 millionnan artıq xizmetler kórsetilgen hám portal arqalı 40 túrdegi jańa elektron xizmetler túsirilgen. Birden-bir interaktiv mámleketlik xızmetleri portalında 2023-jılda iske túsirilgen xizmetlerdiń jıl dawamında eń kóp paydalanılģanları tómendegilerden ibarat:
- aydawshılıq guwalıģın almastırıw;
- eksternat tártibinde imtihanlar alıw ushın arza beriw;
- notarial háreketler tariyxı menen tanısıw;
- Imaratlar tiyisliligi hám quramı boyınsha maģlıwmatnama alıw;
- Qala jolawshılar transportında biypul júriw huqıqın beriwshi transport kartaların rásmiylestiriwge arza beriw.
Birden bir interaktiv mámleketlik xızmetleri portalı arqalı arqalı tómendegi tarawlarda mámleketlik xızmetleri kórsetiledi:
- puqaralıq;
- ádillik;
- licenziyalaw;
- shańaraq hám balalar;
- mádeniyat hám sport;
- salıq;
- bilimlendiriw;
- uy-jay kommunal xızmetleri;
- bajıxana;
- jaslar;
- kóshpes múlik;
- xabar hám baylanıs;
- sociallıq qorģaw;
- transport;
- ekologiya hám geologiya;
- maģlıwmatnamalar;
- ekonomika hám biznes.
Birden-bir interaktiv mámleketlik xızmetleri portalı (my.gov.uz) arqalı milliy aydawshılıq gúwalıǵın alıw imkaniyatı shólkemlestirildi. “Milliy aydawshılıq gúwalıǵın rásmiylestiriw tártibin ápiwayılastırıwdıń qosımsha ilajları haqqında”ǵı Ózbekstan Respublikası húkimet qararı (152-san, 12.04.2023-j.) qabıl etildi. Qararǵa kóre, 2023-jıl 15-aprelden milliy aydawshılıq gúwalıǵın, sonıń ishinde, Birden-bir interaktiv mámleketlik xızmetleri portalı (my.gov.uz) arqalı da arza beriwshilerdiń tikkeley qatnasıwısız rásmiylestiriw tártibi engizildi. Bunda:
milliy aydawshılıq gúwalıǵına arza beriwshilerdiń bas barmaq izi maǵlıwmatları jaylastırıladı, eger málimleme sistemalarında arza beriwshilerdiń bas barmaq izi maǵlıwmatları bar bolmaǵan jaǵdayda arza beriwshiler ózleriniń imza úlgisin elektron formada usınadı;
milliy aydawshılıq gúwalıqların alıw hámde eski úlgidegi aydawshılıq gúwalıqların jańasına almastırıw boyınsha arzalar arza beriwshilerdiń Birden-bir interaktiv mámleketlik xızmetleri portalındaǵı jeke kabineti arqalı onlayn tarizde hár kúni, dem alıs hám bayram kúnlerine qaramastan, 24 saat dawamında jiberiliwi múmkin.
Birden-bir ınteraktiv mámleketlik xızmetleri portalı (my.gov. uz) arqalı mámleket xızmetlerin kórsetiwde puqaralarǵa bir qansha jeńillikler shólkemlestirilgen. Máselen: “Sociallıq qorǵaw birden-bir reestri” málimleme sistemasında dizimge alınǵan shaxslarǵa, sonday-aq, I hám II topar mayıplıǵı bolǵan shaxslarǵa mámleketlik xızmetleri orayları, Birden-bir ınteraktiv mámleketlik xızmetleri portalı (my.gov. uz) arqalı mámleket xızmetlerin kórsetiwde mámleketlik bajıları, jıyımlar hám basqa hár qanday tólemler boyınsha 50 procent muǵdarında shegirme qollanıladı (isbilermenlik iskerligi maqsetlerinde yaki yuridikalıq shaxslar wákili sıpatında múrájat etilgen jaǵdaylar bunnan tısqarı).
Sonday-aq, 2021-jıl 29-iyun kúni Ózbekstan Respublikasi Prezidentiniń PQ-5168-sanlı “Mámleket organları hám shólkemlerine yuridik xızmet kórsetiw iskerligin jetilistiriw is-ilajları” haqqındaģı Qararı qabıllanģan. Qararģa muwapıq 2021-jıl 1-oktyabr kúninen baslap Qaraqalpaqstan Respublikası Ádillik ministrligi, walayatlar hám Tashkent qalası ádillik basqarmaları janındaģı Yuridikalıq xızmet kórsetiw orayları shólkemlestirilgen. Yuridikalıq xızmet kórsetiw oraylarınıń iskerliginiń baslı baģdarları etip tómendegiler belgilengen:
- Mámleket organları hám shólkemleri iskerligin huqıqıy jaqtan támiyinlew;
- Mámleket shólkemlerge sapalı hám qánigeli yuridikalıq járdem kórsetiw;
- Mámleketlik shólkemler xızmetkerleriniń huqıqıy sawatxanlıģı hám mádeniyatın asırıw;
- Mámleketlik shólkemlerdiń mulkiy hámde basqa huqıqları hám nızamlı mápleri óz waqtında , hár tárepleme hám nátiyjeli qorģalıwın támiyinlew;
- Mámleket organları hám shólkemleri tárepinen qabıllanıp atırģan hújjetlerdiń joybarlarındaģı korrupsiyalıq faktorlardı saplastırıwģa kómeklesiw.
Joqarıdaģılardan ulıwmalastırıp aytqanda sońģı jıllarda mámleketimizde alıp barılıp atırģan huqıqıy reformalar nátiyjesinde jámiyet turmısınıń hár bir tarawında mámleketlik xızmet kórsetiw jetilistirilip barılmaqta.
Beruniy rayonı
Yuridikalıq xızmet kórsetiw orayı
bas yuriskonsultı A.Kurbaniyazov