Янгиликлар
23
Mámleketimizde isbilermenlik subektlerine jaratılıp atırǵan jeńillikler haqqında
Mámleketimiz ekonomikasında kishi biznes hám jeke isbilermenliktiń ornı hám abıroyı asıp barmaqda. Isbilermenlik subektlerin hár tárepleme qollap-quwatlaw boyınsha ámelge asırılıp atırǵan keń kólemli is-ilájlar múlkdarlardıń orta qatlamın qáliplestiriw, ishki bazarda básekiles ónimler menen toltırıw, jańa jumıs orınların jaratıw barısında xalıqtıń dáramatların kóbeytiriw hám párawanlıǵın asırıwǵa xızmet etip atır.
Mámleketlik uyımlardıń jeke isbilermenlik subektleri iskerligine aralasıwın sheklewge arnalǵan dawamlı ilájlar kórilip, ekonomikalıq reformalardıń normativ-huqıqıy bazasın jetilistiriw arqalı isbilermenlik baslamaların qollap-quwatlaw boyınsha keń kólemli jeńillik hám preferenciyalar sistemasın jaratılǵanı bul proceste áhmiyetli bolıp qalmaqda.
Mámleketimiz birinshi Prezidentiniń 2015-jıl 15-may kúngi “Jeke múlk, kishi biznes hám jeke isbilermenlikti isenimli qorǵawdı támiyinlew, olardı tez rawajlandırıw jolındaǵı tosıqlardı saplastırıw is-ilájları haqqında” ǵı Pármanı menen jeke isbilermenliktiń ekonomikamızdaǵı roli hám ornın túp tiykarınan asırıw, isbilermenlik iskerligin shólkemlestiriw jolındaǵı tosıq hám sheklewlerdi saplastırıw, jeke múlktiń jalpı ishki ónimdegi úlesin jánede asırıw ushın qolaylı ekonomikalıq, huqıqıy sharayat hám xoshemetlewler jaratıw barısındaǵı islerdi jańa basqıshǵa alıp shıqtı.
Pármannıń orınlanıwı dawamında “Ózbekstan Respublikasınıń ayırım nızam hújjetlerine jeke múlkti, isbilermenlik subektlerin isneimli qorǵawdı jánede kúsheytiriwge, olardı jedel rawajlandırıw jolındaǵı tosıqlardı saplastırıwǵı qaratılǵan ózgeris hám qosımshalar kiritiw haqqında” ǵı Nızam qabıl etildi. Isbilermenlik iskerligin tártipke salıwǵa tiyisli ámeldegi hákimshilik hám jınayat nızamshılıǵın jánede liberallastırıw, mámleket, huqıqtı qorǵaw, organlarınıń isbilermenlik subektleriniń iskerligine nızamsız aralasqanlıq ushın juwapkershilikti asırıw sıyaqlı is-ilájlar sáwlelengen usı Nızamǵa muwapıq, isbilermenlik subektleri iskerliginiń derlik barlıǵına tásir etetuǵın 40 tan artıq nızam hújjetlerine ózgeris hám qosımshalar kiritildi.
Ózbekstan Respublikası Prezidentiniń “Isbilermenlik iskerliginiń jedel rawajlanıwın támiyinlewge, jeke múlkti hár tárepleme qorǵawǵa hám isbilermenlik ortalıǵın sapalıq tárepinen jaqsılıwǵa tiyisli qosımsha is-ilájlar haqqında” ǵı PF-4848-sanlı Pármanında mámleket organları, birinshi náwbette, huqıqtı qorǵawshı uyımlar moynına isbilermenlik subektleriniń huqıqlı hám nızamlı mápleri ústinligi principiniń sózsiz ámelge asırılıwın támiyinlew wazıypası júkletilip, kishi biznes hám jeke isbilermenlikke keń erkinlik beriw, olardıń iskerligine mámleket iskerliginiń aralasıwın qısqartıw, huqıqbuzarlıqlardıń aldın alıw, olardıń profilaktikasınıń sapasın asırıw hám huqıqbuzarlıqqa jol qoymaw, mámleket organlarınıń birinshi dárejeli wazıypası etip belgilengenligin ayrıqsha aytıp ótiw kerek.
Pármanǵa muwapıq isbilermenlik iskerligine nızamǵa qayshı jol menen aralasıw hám tosqınlıq etiw, olardıń iskerligin tiykarsız toqtatıp qoyıw ushın lawazımlı shaxslardıń juwapkershiligi haqqındaǵı nızam xújjetleri normaları talapları qatań orınlanıwı, sonday-aq isbilermenlik subektlerine jetkizilgen zıyannıń tuwrıdan-tuwrı ayıplanıwshılardan óndiriliwin támiyinlew belgilendi.
Mámleketimizde isbilermenlik iskerligin tártipge salıwshı nızam hújjetlerin jetilistiriw boyınsha ámelge asırılıp atırǵan reformalardıń tiykarǵı jónelislerinen biri rejeden tısqarı hám alternativ tekseriwlerdi qısqartıw, hákimshilik jınayat nızamshılıǵın liberallastırıw, salıq jeńilliklerin engiziw kólemin keńeytiriw bolıp esaplanadı.
Shımbay rayonı ádillik bólimi Yuridikalıq
xızmet kórsetiw orayı bas yuriskonsultı A.Nurabullayev