Янгиликлар
21
Mámleketlik nıshanlardı húrmet etiwge minnetlimiz
Hár bir mámlekettiń mámleketlik nıshanları suverenitet belgisi bolıp esaplanadı. Mámleketimiz ǵarezsizlikke eriskennen soń óziniń mámleketlik nıshanlarına iye boldı. Ózbekstan Respublikası Konstituciyasınıń 5-statyasında Ózbekstan Respublikası nızam menen tastıyıqlanatuǵın óz mámleketlik nıshanlarına-bayraǵı, gerbi hám gimnine iye ekenligi belgilengen.
Sonday-aq, Ózbekstan Respublikası Konstituciyasınıń 47-statyasında bárshe puqaralar Konstituciyada belgilep qoyılǵan minnetlerdi orınlawı, 48-satyasında Konstituciya hámde nızamlarǵa ámel etiwge majbúr ekenligi belgilep qoyılǵan.
Mámleketlik nıshanlar mámleketlik suverenitetiniń belgisi bolıwı menen bir qatarda xalıq aralıq qatnasıqlarda O’zbekstan Respublikasınıń tımsalı bolıp esaplanadı.
Respublika aymaǵında hám sırt ellerde ótkeriletuǵın xalıq aralıq konferenciyalarda, kórgizbelerde, sport jarıslarında mámleketti tanıtadı.
Ózbekstan Respublikası Hákimshilik Juwapkershilik haqqındaǵı Kodekstiń 2031-statyasında mámleketlik nıshanlar haqqındaǵi nızamshılıq talapları buzılǵanlıǵı ushın juwapkershilik belgilengen bolıp, usı statyaǵa tiykar,
Ózbekstan Respublikası yáki Qaraqalpaqstan Respublikasınıń Mámleketlik bayraǵı, Mámleketlik gerbi yáki Mámleketlik gimni haqqındaǵı nızamshılıq talapların buzıw — puqaralarǵa bazalıq esaplaw muǵdarınıń úsh esesine shekem, lawazımlı shaxslarǵa úsh esesinen jeti esesine shekem járiyma salıwǵa sebep boladı.
Usınday huqıqbuzarlıq hákimshilik jaza sharası qollanılǵannan keyin bir jıl dawamında takirar sadır etilgen bolsa, — puqaralarǵa bazalıq esaplaw muǵdarınıń úsh esesinen bes esesine shekem, lawazımlı shaxslarǵa jeti esesinen on esesine shekem járiyma salıwǵa sebep boladı.
Ulıwma aytqanda Konstituciya hámde nızamlarǵa ámel etiwge hám mámleketlik nıshanlardı húrmet etiwge hár birimiz minnetlimiz.
Qanlıkól rayónı ádillik bólimi
Insan huqıqların qorǵaw hám huqıqtı qollaw
ámeliyatın úyreniw bólimshesi
bas másláhátshisi 2-da`rejeli yurist B.Matjanova