Янгиликлар
22
XIZMETKERLERGE MATERIALLIQ JÁRDEM BERIW TÁRTIBI QANDAY?
Bárshemizge belgili, xojalıq hám jeke zarúrliklerden kelip shıǵıp, kúndelikli turmısımızda dáramat tabatuǵın belgili bir jumıs penen bánt bolsaqta, kópshilik jaǵdaylarda qosımsha járdemge mútáj bolıp qalamız.
Bunday jaǵdayda, jumıs beriwshiden is-haqıdan tısqarı materiallıq járdem beriw boyınsha múrájat etiwimizge tuwrı keledi.
Eń áweli, materiallıq járdem degenimiz ne?
Materiallıq járdem¬ – bull jumıs beriwshiniń óz xızmetkerlerine málim bir hádiyseler júz bergende tóleytuǵın pul qarjıları.
Jumıs beriwshi xızmetkerlerge materiallıq járdem kórsetiw tártibi hám jaǵdayların ǵárezsiz belgileydi.
Materiallıq járdem beriliwi múmkin bolǵan ayrım jaǵdaylarǵa:
- xızmetkerdiń neke qurıwı;
- xızmetker shańaraǵında bala tuwılıwı;
- xızmetkerdi yaki onıń perzentlerin dawalaw (máselen, dári-darmaqlardı satıp alıw, pulı medicinalıq xızmetlerdi alıw hám basqalar); - xızmetkerdiń shańaraq aǵzasınıń qaytıs bolıwı (máselen, anası, atası , ómir joldası);
- xızmetkerdiń napaqaǵa shıǵıwı;
- azıq-awqat kórinisindegi járdem hám basqalar kiredi.
Qaǵıyda tárizinde, materiallıq járdem alıw ushın tiykarlar lokal hújjetlerde – jámáát kelisiwi yaki jámáám shártnamasında belgilenedi. Onda qanday hújjetler usınıw kerek ekenligi, materiallıq járdem muǵdarı, tólew shártleri hám basqa shártler kórsetiledi.
Jámáát shártnamasında materiallıq járdem tólewdiń anıq muǵdarı yaki belgili jaǵdaydan kelip shıǵıp belgileniwi múmkin.
Eger materiallıq járdem kórsetiw shártleri belgilenbegen bolsa, shólkem baslıǵı xızmetkerdiń iltimasnamasına kóre tólemlerdi ǵárezsiz ráwishte sheshiwi múmkin.
Materiallıq járdem alıw ushın xızmetker baslıq atına tiykarlantırılǵan arza jazıwı kerek. Jumıs beriwshi bull máseleni kórip shıǵadı hám unamlı nátiyje bolsa, buyrıq shıǵaradı.
Usı orında, ulıwma orta bilim beriw mektep oqıtıwshı hám xızmetkerlerine materiallıq járdem beriw tártip-qaǵıydasına toqtap ótsek.
Atap aytqanda, Ózbekstan Respublikası Ministrler Kabinetiniń 2019-jıl
30-sentyabrdegi 823-sanlı qararı menen tastıyıqlanǵan “Ulıwma orta bilim beriw mektepleriniń órnek kórsetip atırǵan xızmetkerlerin xoshametlewdiń direktor fondın shólkemlestiriw hám onıń qarjılarınan paydalanıw tártibi haqqında”ǵı Rejeniń
33-bántinde kórsetilgen talaplarǵa kóre mektep xızmetkerlerine materiallıq járdem pul beriw názerde tutılǵan.
Usı Reje talaplarına tiykar xızmetkerdiń arzasına tiykar mektepte oqıw jılı basında dúzilgen Isshi topar tárepinen kórip shıǵılıp maqullanǵan jaǵdayda usı Isshi topar qararına tiykar materiallıq járdem beriliwi názerde tutılǵan.
Rejeniń 33-bántine talaplarına kóre, ulıwma orta bilim beriw mektep xızmetkerlerine materiallıq járdem kalnedar jıl dawamında eki lawazım aylıq (oqıtıwshınıń tarif stavkası) muǵdarına shekem xızmetkerdiń ózi hám jaqın tuwısqanı (atası, anası, ómir joldası, perzenti) qaytıs bolǵanda, awıl kesellikke shalınǵanda, xızmetker tábiyǵıy apattan zıyan kórgende tólenetuǵınlıǵı belgilengen.
Juwmaqlastırıp aytqanda, qaysı bir mámleketlik uyım yaki shólkem xızmetkerlerine materiallıq járdem beriw tiykarları boyınsha óz aldına normativ-huqıqıy hújjet qabıl etilmegen bolsa, joqarıda atap ótilgenindey shólkemniń finanslıq awhalınan kelip shıǵıp, shólkemniń lokal hújjetlerinde belgilengen tártipte materiallıq járdem beriliwi támiyinleniwi múmkin.
Kegeyli rayonı Ádillik bólimi
Yuridikalıq xızmet kórsetiw
orayı baslıǵı Kazbek Paluaniyazov