Янгиликлар
15
Jańa redakciyadaģı Miynet kodeksi
Kúshke kiriw waqtı 2023-jıl 30-aprel bolģan jańa redakciyadaģı Miynet kodeksi 7 bólim, 34 bap, 581 statyadan ibarat bolıp, Kodeks Ózbekstan Respublikası Prezidentiniń 2019-jıl 17-yanvardaģi PF-5635-sanlı Pármani menen tastıyıqlanģan “2017-2021 jıllarda Ózbekstan Respublikasın rawajlandırıwdıń bes áhmiyetli baģdarı boyınsha háreketler strategiyasınıń “Jedel investiciyalar hám social rawajlandırıw jılı”nda ámelge asırılıwına baylanıslı mámleketlik baģdarlamanıń 135-punktine tiykar islep shıģılģan. Jańa redaksiyadaģı Miynet kodeksi islep shıģılıwı processinde 10 nan artıq xalıqaralıq shólkemler, 94 xalıq aralıq konvensiyalar, 63 mámlekettiń tájriybesi úyrenilgen.
Miynet kodeksi qabıl etiliwiniń tiykarģı sebepleri sıpatında tómendegiler kórsetilgen:
- Ámeldegi Miynet kodeksi 1995-jıl bazar ekonomikasına ótiw dáwirinde qabıllanģan bolıp, házirgi kúndegi bazar ekonomikası talaplarına juwap bermesligi;
- Ámeldegi Miynet kodeksinde belgilengen qatnasıqlar mámleketlik shólkemler hám sanaattiń iri kárxanalarına qaratılģan bolıp, házirgi waqıtta túrli múlik formaları, ásirese kishi hám orta biznes sub’iektlerindegi miynet qatnasıqları tolıq esapqa alınbaģanlıģı;
- Miynet huqıqların tártipke salıwda boslıqlar bolıwı;
- Ayrım taraw xizmetkerleri miynet qatnasıqlarınıń ózine tán tárepleri esapqa alınbaģanlıģı.
Miynet kodeksinen 100-statya 2-bólimi 7-punkti, 282-294-statyaları shıģarıp taslanbaqta.
Jańa redaksiyadaģı Miynet kodeksi 11-statyasında miynet nızamshılıģınıń ámel etiw sheńberi belgilengen bolıp, onda Miynet kodeksiniń ámel etiw sheńberi júdá keń ekenligin bilse boladı. Bir ģana mısal sudyalarģa, prokuratura organları xizmetkerlerine baylanıslı miynet nızamshılıģınıń sudlar haqqındaģı nızamshılıqta hám de prokuratura organları iskerligin tártipke salıwshı nızamshılıqta tártipke salınbaģan miynet qatnasıqlarına qollanılıwı Miynet kodeksiniń ámel etiwi sheńberiniń qanday dárejede ekeninen derek beredi. Maģlıwmat retinde ámeldegi miynet nızamshılıģında bul tarawda xizmet etiwshilerdiń jumısqa tiklew máselesi tártipke salınbaģan edi.
Sonday-aq, jámáát shártnaması imzalanģan kúnnen yáki jámáát shártnamasında belgilengen kúnnen kúshke kiriwi hám shártnamada kórsetilgen múddetke shekem, biraq kóbimenen 3 jıl ámeletiwi;
Jumıs beriwshi jámáát shártnaması kúshke kirgennen keyin 10 kúnnen keshiktirmey xizmetkerlerdi jámáát shártnaması menen imza qoydırıp tanıstırıw shártligi;
Jumısqa qabıllawda dáslepki sınaw múddeti 3 (úsh) aydan, shólkemlerdiń basshıları hám olardıń orınbasarları, bas esapshıları hámde bólim baslıqları ushın 6 (altı) aydan aspawı lazımlıģı;
Jumıstan bosatıwda 200 % ke shekem kompensatsiya pulı tóleniwi;
Dem alıs kúni bayram kúnine tuwrı kelse dem alıs kúni bayramnan keying kúnge kóshiriliwi;
Jıllıq miynet demalısı 21 (jigirma bir) kalendar kún etip belgilenligi, mámleket hákimyatı hám basqarıw organları xizmetkerlerine 27 kalendar kúninen ibarat jıllıq miynet dem alıs beriliwi, xizmetkerlerge bir shólkemde islegen hár 5 (bes) jıl ushın 2 (eki) kalendar kun, biraq jámi 8 (segiz) calendar kúninen ibarat qosımsha miynet dem alısı beriliwi;
Xizmet tekseriwin ótkeriw institutı kiritilgenligi;
Jeke tártiptegi miynet dawlarınıń kórip shıģılıwı ushın sudqa muraját qılıwdıń múddetleri jumısqa tiklew boyınsha xizmetkerge ol menen dúzilgen miynet shártnaması biykar qılınģanlıģı haqqında jumıs beriwshi buyruģınıń kóshirme nusqası tapsırılģan kúnnen baslap 3 (úsh) ay, basqa miynet dawları boyınsha xizmetker óziniń miynet huqıqları buzılģanlıģın bilgen yáki biliwi lazım bolģan kúnnen baslap 6 (altı) ay etip kórsetilgenligi; (maģlıwmat retinde ámeldegi miynet nızamshılıģında bul múddetler jumısqa tiklew boyınsha 1 (bir) ay, basqa miynet dawları boyınsha 3 (úsh) ay etip belgilengen.)
Xizmetker jumıs baslaģan kúnnen baslap 3 (úsh) kúnlik múddette xizmetker menen ámeldegi nızamshılıqta belgilengen tártipte miynet shártnaması dúziliwi hám shártnama tiykarında jumısqa qabıl etiw buyruģı rásmiylestiriliwi lazımlıģı;
Jumıs beriwshi xizmetkerdiń is haqqı hám basqa da tólemleri keshiktiriliwine juwapkershilikke tartılıwı belgilengen.
Ulıwmalastırıp aytqanda jańa redaksiyadaģı Miynet kodeksi miynet qatnasıqlarınıń kóp tarawların óz ishine qamtıp almaqta.
Beruniy rayonı ádillik bólimi
Yuridikalıq xizmet kórsetiw orayı
bas yuriskonsultı A.Kurbaniyazov