Янгиликлар
19
Franshizing shártnaması qanday shártnama?
Rawajlanıp baratırǵan bazar ekonomikası sharayatında tovarlar hám jumıslardıń, hár qıylı túrdegi múlkiy huqıqlardıń puqaralıq aylanısındaǵı háreketin ámelge asırıwda, bunday obektlerdiń barlıǵınıń bir waqıtta aylanısta bolıwı kompleks isbilermenlik licenziyasi (franshizing) shártnaması arqalı tártipke salınadı.
Ózbekstan Respublikası Puqaralıq kodeksiniń 862-statyasına muwapıq, kompleks isbilermenlik licenziyası (franshizing) shártnaması boyınsha bir tárep (kompleks licenziar) ekinshi tárepke (kompleks licenziatqa) haqı esesine licenziardıń firma atınan hám de qorǵalatuǵın kommerciyalıq málimlemeden, sonday-aq, shártnamada názerde tutılǵan absolyut huqıqlarǵa kiriwshi basqa obektlerden (tovar belgisi, xızmet kórsetiw belgisi hám oylap tabıwlar hám de basqalardan) licenziattıń isbilermenlik jumısında paydalanıw huqıqın óz ishine alatuǵın absolyut huqıqlar kompleksin (licenziya kompleksi) beriw minnetlemesin aladı.
Kompleks isbilermenlik licenziyası shártnamasınıń predmetin licenziar tárepinen licenziatqa berilip atırǵan absolyut huqıqlar kompleksi quraydı. Bul huqıqlarǵa firma ataması, qorǵalatuǵın kommerciyalıq málimleme, tovar belgisi, xızmet kórsetiw belgisi, oylap tabıwlar hám licenziattıń isbilermenlik jumısında paydalanıw huqıqın óz ishine alatuǵın basqa da absolyut huqıqlar kompleksi kiredi. Shártnamaǵa muwapıq, bul huqıqlardıń hámmesi yaki bir neshewi ya bolmasa birewi licenziatqa isbilermenlik jumısında paydalanıw ushın beriliwi múmkin.
Ápiwayılastırıp aytqanda, Franshiza – bul basqa birewdiń brendi astında biznes júrgiziw huqıqı. Franshiza qarıydarına texnologiya, processler xarakteristikası hám biznes modeli, reklama materialları, sonday-aq, huqıqıy hám texnikalıq járdem kórsetiledi.
Franshizing haqqındaǵı shártnamanı mámleketlik dizimnen ótkeriw ushın qanday hújjetler usınılıwı kerek?
Ministrler Kabinetiniń 2022-jıl 24-iyundegi 346-sanlı qararı menen franshizing shártnamasın mámleketlik dizimnen ótkeriw tártibi belgilendi.
Bul qararǵa muwapıq, franshizing shártnamasın mámleketlik dizimnen ótkeriwdi 2022-jıl 1-iyulden baslap Mámleketlik xızmetler orayı yaki internet tarmaǵı arqalı onlayn tárizde Birden-bir interaktiv xızmetler portalı arqalı ámelge asırıw múmkin.
Arza beriwshi franshizing shártnamasın mámleketlik dizimnen ótkeriw ushın dizimnen ótkeriwshi uyımǵa ózi kelip múrájat etedi yaki BIMXP arqalı Sistemada dizimnen ótedi.
Arza beriwshi ózi kelip múrájat etken jaǵdayda, dizimnen ótkeriwshi uyım xızmetkeri arza beriwshi atınan, BIMXP arqalı múrájat etken jaǵdayda bolsa, arza beriwshi biyǵárez ráwishte sorawnamanı elektron ráwishte toltıradı.
Arza beriwshi tárepinen franshizing shártnamasın mámleketlik dizimnen ótkeriwde sorawnamaǵa franshizing shártnaması, eger arza beriwshi sırt elli licenziar bolsa sırt el mámleketiniń tiyisli mámleketlik reestrinen kóshirme yaki onıń ornın basıwshı tiyisli hújjetler elektron túrde pdf formatında qosımsha etiledi.
Sonday-aq, arza beriwshi franshizing shártnamasın áhmiyetli ózgertiw qosımshalardı mámleketlik dizimnen ótkeriw ushın múrájat etkende franshizing shártnamasına kirgizilip atırǵan áhmiyetli ózgeris hám qosımshalardıń nusqası, sud organınıń qararı tiykarında franshizing shártnamasına ózgeris hám qosımshalar kirgizilip atırǵan bolsa usı hújjettiń nusqası usınıladı.
Bunda usınday jaǵdaylarda arza beriwshi isenim xat tiykarında is kóretuǵın shaxs bolsa, kórsetip ótilgen shaxstıń wákilligin tasıyıqlaytuǵın, belgilengen tártipte tastıyıqlanǵan hújjettiń nusqası da usınıs etiledi.
Usınılǵan hújjetler mámleketlik til yamasa rus tiline notarial tártipte awdarılǵan bolıwı talap etiledi.
Franshizing shártnamasın mámleketlik dizimnen (qayta dizimnen) ótkeriw ushın bazalıq esaplaw muǵdarınıń úshten biri muǵdarında jıyım óndiriledi.
A.ORAZÍMBETOV,
Taqıyatas rayonı Ádillik bólimi Mámleketlik xızmetler orayınıń xızmetkeri.