Янгиликлар
20
Bir múrájat izinen
Ózbekstan Respublikası Prezidentiniń 2018-jıl 13-aprel kúngi “Ózbekstan Respublikası Ádillik Ministrligi iskerligin jánede jetilistiriwge baylanıslı shólkemlestirilgen is-ilájları haqqında”ǵı PQ-3666-sanlı qararı menen puqaralardıń huqıqları, erkinlikleri hám nızamlı máplerin huqıqıy tárepten qorǵaw boyınsha is-ilájlardı ámelge asırıwı, sonday-aq fizikalıq hám yuridikalıq shaxslardıń óz huqıqları, erkinlikleri hám nızamlı mápleriniń buzılǵanlıǵı haqqındaǵı múrájatlerdi kórip shıǵıwı ádillik uyımlarıniń áhmiyetli wazıypalarınan biri etip belgilengen.
Usı múnásibet penen, Shomanay rayonı ádillik bólimi jumıslarında fizikalıq ham yuridikalıq shaxslardan kelip túsip atırģan múrájatlarģa ayırıqsha itibar qaratıladı. Shomanay rayonı Ádillik bólimine puqara R.M. qaytıs bolǵan perzentleri ushın ólgenligin tastıyıqlawshı gúwalıq alıwda ámeliy járdem sorap múrájat etti.
Múrájattı úyreniw dawamında tórt perzenti qaytıs bolǵanlıǵı, lekin olarǵa óz waqıtında turaqlı jasaw yáki waqtınsha turǵan ornı yamasa ólim júz bergen orındaǵı PHAJ uyımına múrájat etpegenligi sebepli ólim haqqındaǵı gúwalıǵı alınbaǵanlıǵı, házirde qaytıs bolǵan perzentleri Qanlıkól rayonı abadanlastırıw basqarması esabındaǵı “Ótesh batır” qábiristanında jerlengenligi málim boldı.
Ózbekstan Respublikası Oliy Sudı Plenumınıń 1991-jıl 20-dekabr kúngi “Yuridikalıq áhmiyetke iye bolǵan faktlerdi belgilew haqqındaǵı isler boyınsha sud ámeliyatı haqqında”ǵı 5-sanlı Qararınıń 20-bántinde Eger shaxstıń málim waqıt hám málim jaǵdayda qaytıs bolǵanlıǵın tastıyıqlawshı isenimli dáliller bar bolsa, Puqaralıq processual kodeksiniń 295-statyasınıń 4-bántine tiykar sud ólgenlik faktın belgileydi. Sudqa múrájat qılıp atırǵan mápdar shaxslar puqaralıq halatı aktlerin belgilewshi uyımlardıń ólgenlikti dizimge alıwdan bas tartqanlıǵı haqqındaǵı hújjetti usınıwı lazım, -dep kórsetilgen.
Joqarıdaǵılardan kelip shıǵıp, puqara R.M.nıń qaytıs bolǵan perzentleriniń ólgenlik faktın belgiletiw maqsetinde Puqaralıq isleri boyınsha Qońırat rayonlar aralıq sudına arza kiritildi.
Shomanay rayonı Ádillik bólimi tárepinen puqara R.M.nıń qaytıs bolǵan perzentleriniń óimin tastıyıqlawshı gúwalıǵın alıwda islengen ámeliy jumısları nátiyjesinde Puqaralıq isleri boyınsha Qońırat rayonlar aralıq sudı tárepinen puqara R.M.nıń múrájatı qanaatlandırılıp perzentlerinin ólim faktları tastıyıqlap berildi.
Shomanay rayonı ádillik bólimi baslıǵı E.Qannazarov